ភ្នំពេញ ៖ ក្រោយពីស្រាវជ្រាវ តាមចាប់ឃាត់ជនសង្ស័យ២នាក់ សមត្ថកិច្ចនគរបាលបានបន្តទៅតាមចាប់ជនសង្ស័យប្រុសស្រីកំពុងសង្ងំលាក់ខ្លួនក្នុងផ្ទះសំណាក់ ពេជ្យកែវមរកត បានចំនួន១៦នាក់ រួមទាំងអ្នកគ្រប់គ្រងផ្ទះសំណាក់និងរកឃើញអាវុធខ្លីមួយដើម និងថ្នាំញៀនមួយចំនួន។
លោកវរសេនីយ៍ឯក យឹម សារ៉ាន់ អធិការខណ្ឌពោធិសែនជ័យ បានឲ្យដឹងថា ផ្ទះសំណាក់ ពេជ្យកែវមរកត មានទីតាំងស្ថិតនៅតាមផ្លូវ២០១១ ភូមិតាងួន សង្កាត់កាកាប ហើយត្រូវបានចុះឆែកឆេរនៅវេលាម៉ោង១០និង៣០នាទីព្រឹក ថ្ងៃទី៥ ខែមករា ឆ្នាំ២០១៨នេះ បានស្រាវជ្រាវបង្ក្រាបចាប់ជនសង្ស័យ ជួញដូរគ្រឿងញៀន២នាក់ ត្រង់ចំណុចផ្លូវរថភ្លើង ភូមិតាងួន ហើយឈានទៅចាប់បក្ខពួកជនសង្ស័យ ដែលកំពុងសង្ងំលាក់ខ្លួន តាមបន្ទប់ផ្ទះសំណាក់ ពេជ្រកែវមរកត ឃាត់ខ្លួនជនសង្ស័យ១៤នាក់ ស្រី៦នាក់ រកឃើញកាំភ្លើងខ្លី ម៉ាក កា៥៤មួយដើម គ្រាប់ពេញបង់ និងសម្ភារៈពាក់ព័ន្ធថ្នាំញៀន ម៉ូតូចំនួន៨គ្រឿង ថ្នាំញៀន ជញ្ជីងថ្លឹងថ្នាំញៀន ។ ក្នុងប្រតិបត្តិការ ឃើញថា ការប្រើប្រាស់ និងការជួញដូរគ្រឿងញៀន ជាប្រព័ន្ធ ទាំងអ្នកគ្រប់គ្រងផ្ទះសំណាក់ មេការ បុគ្គលិក និងភ្ញៀវ ឃុបឃិតគ្នា យកទីតាំងផ្ទះខាងលើ ធ្វើជាទីកន្លែង ប្រមូលផ្តុំជក់ ប្រើប្រាស់ ចែកចាយ ។
លោកអធិការបានឲ្យដឹងថា ជនសង្ស័យម្នាក់ មានលាក់អាវុធ មានឈ្មោះ ប៊ិច សុចថុន ភេទប្រុស អាយុ៣២ឆ្នាំ មុខរបរ កម្មករសំណង់ ស្នាក់នៅការដ្ឋានសំណង់ ភូមិក្បាលដំរី សង្កាត់កាកាប២ ខណ្ឌពោធិសែនជ័យ មានស្រុកកំណើត ស្រុកសំរោងទង ខេត្តកំពង់ស្ពឺ ៕ ដោយ៖បញ្ញាស័ក្តិ
