ភ្នំពេញ៖ គណៈបញ្ជាការឯកភាពរាជធានីភ្នំពេញ នៅរសៀលថ្ងៃសុក្រ ៤រោច ខែបុស្ស ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៥ ខែមករា ឆ្នាំ២០១៨ បានបើកកិច្ចប្រជុំមួយ ជាមួយកងកម្លាំងមានសមត្ថកិច្ចនិងអាជ្ញាធរខណ្ឌទាំង១២ ដើម្បីដាក់ចេញជាវិធានការថ្មីៗទៀតលើការពង្រឹងសន្តិសុខ សុវត្ថិភាពជូនប្រជាពលរដ្ឋ នៅក្នុងរាជធានីភ្នំពេញ ជម្រុញការចុះបិទអាជីវកម្មកុងស៊ីបញ្ចាំដែលគ្មានច្បាប់និងការជំរុញឲ្យប្រជាពលរដ្ឋគោរពច្បាប់ចរាចរណ៍ទាំអស់គ្នា។
លោកឃួង ស្រេង អភិបាលរាជធានីភ្នំពេញ ក្នុងកិច្ចប្រជុំនោះបានលើកឡើងថា ការបើកឲ្យមានកិច្ចប្រជុំគណៈបញ្ជាការឯកភាពរាជធានីភ្នំពេញ នេះឡើងដោយផ្តោតសំខាន់លើការពង្រឹងសន្តិសុខ សុវត្តិភាពជូនប្រជាពលរដ្ឋ ពិសេសកិច្ចការពារសន្តិសុខ នៅក្នុងពិធីបុណ្យជាតិ៧មករា។ បញ្ហាពិនិត្យលើកុងស៊ីបញ្ចាំ និងបញ្ហាការរៀបចំសណ្តាប់ធ្នាប់លើកំណាត់ផ្លូវទាំ១១ខ្សែ ដែលរដ្ឋបាលរាជធានីភ្នំពេញបានដាក់ចេញជាវិធានការនាប៉ុន្មានខែកន្លងមកនេះ។
លោក ចេវ ហាក់ ស្នងការរងរាជធានីភ្នំពេញ បានឲ្យដឹងថា បញ្ហាកកស្ទះចរាចរណ៍មកដល់ពេលនេះ មិនមានការធូរស្រាលនោះទេ ពោលគឺមានការកកស្ទះស្ទើគ្រប់ម៉ោងពេល ដែលបញ្ហានេះ តម្រូវឲ្យកម្លាំងប៉ូលិសត្រូវដាក់កម្លាំងសម្រួលចរាចរណ៍ជាប្រចាំ។
ក្នុងអង្គប្រជុំនោះលោកឃួង ស្រេងក៏បានណែនាំ នូវវិធានការមួយចំនួនដើម្បីឲ្យកម្លាំងនិងអាជ្ញាធរពាក់ព័ន្ធទាំងនោះអនុវត្តក្នុងនោះរួមមាន ៖ ស្នងការនគរបាលរាជធានីភ្នំពេញ ត្រូវយកចិត្តទុកដាក់ក្នុងការរឹតបន្តឹងច្បាប់ចរាចរណ៍ផ្លូវគោកក្នុងរាជធានីភ្នំពេញ ព្រោះកំណើនយានយន្តក្នុងរាជធានីភ្នំពេញ និងការមិនគោរពច្បាប់ចរាចរណ៍របស់អ្នកបើកបរលើដងផ្លូវ កំពុងបង្កឱ្យមានការកកស្ទះ និងគ្រោះថ្នាក់ចរាចរណ៍យ៉ាងធ្ងន់ធ្ងរនាពេលបច្ចុប្បន្ន។ ការរៀបចំសណ្តាប់ឆ្នាប់ របៀបរៀបរយសាធារណៈ តាមដងមហាវិថី វិថីទាំង១១ខ្សែក្នុងរាជធានីភ្នំពេញនៅតែបន្តទៅមុនជានិច្ច ហើយត្រូវធ្វើដោយទន់ភ្លន់ ម៉ឺងម៉ាត់ និងម៉ត់ចត់បំផុត។ ស្នងការនគរបាលរាជធានីភ្នំពេញ បញ្ជាការដ្ឋានកងរាជអាវុធហត្ថរាជធានីភ្នំពេញ និងរដ្ឋបាលខណ្ឌទាំង១២ត្រូវសហការគ្នាបន្តចុះពិនិត្យ និងបិទអាជីវកម្មទទួលបញ្ចាំ ដែលពុំមានច្បាប់។
ចំពោះបញ្ហាផ្សេងៗ រដ្ឋបាលខណ្ឌទាំង១២ ត្រូវបន្តចុះពន្យល់ណែនាំ ដល់ម្ចាស់ផ្ទះជួល បន្ទប់ជួល មិនឲ្យដំឡើងថ្លៃឈ្មួលជួលដល់កម្មករ កម្មការិនី និងបន្តពិនិត្យបញ្ហាតម្លៃទឹក ភ្លើង ក្នុងមូលដ្ឋានរបស់ខ្លួន៕ ដោយ៖កូឡាប
