វៀតណាម៖ នៅថ្ងៃទី១៥ ខែវិច្ឆិកា ឆ្នាំ២០១៩ ឆ្លៀតក្នុងឱកាសនៃការអញ្ជើញចូលរួមកិច្ចប្រជុំរដ្ឋមន្ត្រីជឹកជញ្ជូនអាស៊ានលើកទី២៥ និងកិច្ចប្រជុំជាមួយដៃគូពិភាក្សាពាក់ព័ន្ធ នៅទីក្រុងហាណូយ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូនបានជួបពិភាក្សាទ្វេភាគីជាមួយលោក Minorikawa Nobuhide អនុរដ្ឋមន្ត្រីនៃក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ និងជាប្រធានគណៈប្រតិភូជប៉ុន ដើម្បីពង្រឹងនិងពង្រីកកិច្ចសហប្រតិបត្តិការវិស័យហេដ្ឋារចនាសម្ព័ន្ធ និងដឹកជញ្ជូនរវាងកម្ពុជានិងជប៉ុន។
លោកទេសរដ្ឋមន្ត្រីជួសមុខឲ្យក្រសួងសាធារណការ និងដឹកជញ្ជូន បានសម្តែងនូវអណរគុណដ៏ជ្រាលជ្រៅចំពោះការផ្តល់ជំនួយ និងកិច្ចសហប្រតិបត្តិការល្អដល់កម្ពុជា ពិសេសនៅក្នុងវិស័យសាធារណការ ដឹកជញ្ជូន និងកំពង់ផែ។
លោកទេសរដ្ឋមន្ត្រីបានជម្រាបជូនភាគីជប៉ុនពីស្ថានភាពយោបាយនិងភាពរីកចម្រីនសេដ្ឋកិច្ច-សង្គមនៅកម្ពជា ក្រោមការដឹកនាំប្រកបដោយគតិបណ្ឌិត និងឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
ភាគីទាំងពីរបានពិភាក្សាផ្តោតសំខាន់លើកិច្ចសហប្រតិបត្តិការផ្នែកហេដ្ឋារចនាសម្ព័ន្ព ផ្លូវថ្នល់-ស្ពាន សុវត្ថិភាពចរាចរណ៍ ប្រព័ន្ធទឹកកខ្វក់ និងកំពង់ផែ។
ភាគីទាំងពីរបានកត់សម្គាល់លើអត្ថប្រយោជន៍នៃការសាងសង់ផ្លូវ ស្ពាន ការស្តារ និងជួសជុលផ្លូវក្រោមជំនួយជប៉ុន ពិសេស ដំណើរការសាងសង់ពង្រីកផ្លូវជាតិលេខ៥ ប្រវែង៣៦៦ គីឡូម៉ែត្យដែលកំពុងប្រព្រឹត្តទៅ។
លោកទេសរដ្ឋមន្ត្រីបានស្នើភាគីជប៉ុនពិនិត្យលទ្ធភាពវិនិយោគរថភ្លើងទីក្រុងភ្នំពេញ ដើម្បីសម្រួលការធ្វើដំណើរ និងបន្ថយការស្ទះចរាចរណ៍នៅទីក្រុងភ្នំពេញ។ ឯកឧត្តមទេសរដ្ឋមន្ត្រីបានផ្តល់តម្លៃខ្ពស់ចំពោះជំនួយរបស់ភាគីជប៉ុននាពេលថ្មីៗនេះ សម្រាប់សាងសង់ស្ថានីយចម្រោះទឹកកខ្វក់ និងប្រព័ន្ធគ្រប់គ្រងចរាចរណ៍ថ្មី នៅរាជធានីភ្នំពេញ និងស្នើសុំភាគីជប៉ុនផ្តល់ជំនួយសាងសង់ប្រព័ន្ធ និងស្ថានីយចម្រោះទឹកកខ្វក់នៅខេត្តមួយចំនួន និងខេត្តជាប់សមុទ្រ ដូចជា កំពត និងកោះកុង ផងដែរ។
ភាគីទាំងពីរបានកត់សម្គាល់លើភាពជឿនលឿន នៃដំណើរការពង្រីក និងធ្វើទំនើបកម្មកំពង់ផែកម្ពុជា និងការអភិវឌ្ឍប្រព័ន្ធផ្លាស់ប្តូរទិន្នន័យតាមអេឡិចត្រូនិចសម្រាប់នាវាចេញចូលកំពង់ផែក្រោមជំនួយជប៉ុន។ ភាគីទាំងពីរក៏បានពិភាក្សាផងដែរអំពីការរៀបចំផែនការមេកំពង់ផែរបស់ជាតិ ជាពិសេសការរៀបចំផែនការមេកំពង់ផែក្រុងព្រះសីហនុ។
លោកទេសរដ្ឋមន្ត្រីបានជម្រាបភាគីជប៉ុន អំពីគម្រោងបង្កើតឡើងវិញនូវវិទ្យាស្ថានសាធារណការ និងដឹកជញ្ជូន និងស្នើសុំជួយការបណ្តុះបណ្តាលលើផ្នែកវិស្វកម្មសំណង់ហេដ្ឋារចនាសម្ព័ន្ធ និងផ្នែកសេដ្ឋកិច្ចដឹកជញ្ជូន។ ទន្ទឹមនឹងនេះ ឯកឧត្តមទេសរដ្ឋមន្ត្រីបានស្នើសុំភាគីជប៉ុនផ្តល់នូវអ្នកជំនាញខាងលើសំរាប់បណ្តុះបណ្តាលមន្ត្រីកម្ពុជា និងជួយបណ្តុះបណ្តាលនៅក្នុងវិទ្យាស្ថានខាងលើ។
លោកទេសរដ្ឋមន្ត្រី បានអញ្ជើញលោកMinorikawa Nobuhide មកបំពេញទស្សនកិច្ចនៅរាជធានីភ្នំពេញ ក្រុងព្រះសីហនុ និងខេត្តសៀមរាប។
ភាគីទាំងពីរបានសម្តែងការកោតសរសើរខ្ពស់ ចំពោះកិច្ចសហការល្អរវាងក្រសួងទាំងពីរ ជាពិសេស JICA កន្លងមក និងបានសន្យាជំរុញបង្កើនកិច្ចសហប្រតិបត្តិការទាំងនេះឲ្យកាន់តែប្រសើរថែមទៀតនាពេលអនាគត៕ដោយ៖កូឡាប
