ភ្នំពេញ៖ សម្តេចតេជោ ហ៊ុន សែន បានបញ្ជាក់ថា គ្មានការ រុះរើស្ពានថ្មចាស់ សល់ពីសម័យបារាំង ដែលមានអាយុកាលជាង១០០ឆ្នាំ ដែលស្ថិតនៅមុខសាលាខេត្តបាត់ដំបង ក្នុងភូមិកម្មករ សង្កាត់ ស្វាយប៉ោ ក្រុងបាត់ដំបង ខេត្តបាត់ដំបង ។ សម្តេចតេជោ បានថ្លែងបែបនេះ នៅព្រឹកថ្ងៃព្រហស្បតិ៍ ទី២៦ ខែធ្នូ ឆ្នាំ២០១៩នេះ ក្នុងពិធីប្រគល់សញ្ញាបត្រជូននិស្សិតបញ្ចប់ការសិក្សា មកពីសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច (RULE)។
ទាក់ទងទៅនឹងការផ្អើលផុសរឿងអាជ្ញាធរខេត្តបាត់ដំបង ចង់វាយស្ពានបុរាណមួយ ដែលមានអាយុកាលប្រមាណជាង១០០ឆ្នាំនោះ សម្តេចតេជោនាយករដ្ឋមន្ត្រី បានមានប្រសាសន៍ថា សម្បតិ្តអ្វីដែលមានអាយុកាលដែលបន្សល់ទុកលើកពី៥០ឆ្នាំ គឺត្រូវតែរក្សាទុក មិនត្រូវបំបាត់ចោលនោះទេ តែទោះជាយ៉ាងណាក៏ដោយ ដើម្បីបំពេញតម្រូវការដែលខ្វះខាត យើងត្រូវជំនួសមកវិញនូវស្ពានថ្មីបន្ថែមទៀត ដោយមិនមែនវាយរបស់ចាស់ចោលនោះទេ។
បន្ទាប់ពីរដ្ឋបាលខេត្តបាត់ដំបង សុំគោលការទៅថ្នាក់ជំនាញ ដើម្បីរុះរើស្ពានថ្មចាស់សម័យបារាំងដែលមានវ័យជាង១០០ឆ្នាំ ឆ្លងកាត់ស្ទឹងសង្កែ នៅមុខសាលាខេត្ដរួចមកថ្មីៗនេះស្រាប់តែខាងមន្ត្រីក្រសួងវប្បធម៌និងវិចិត្រសិល្បៈ បានធ្វើលិខិតអន្តរាគមន៍ទៅរដ្ឋមន្ត្រីក្រសួងក្រសួងរៀបចំដែនដី នគរូបនីយកម្ម និងសំណង់ ដោយសូមរក្សាទុកថែទាំជួសជុលឡើងវិញ ដោយសំអាងថា ជាសំណង់បេតិកភណ្ឌទីក្រុង ហើយនៅសល់តែមួយគត់ក្នុងខេត្តបាត់ដំបង និងនៅសល់តែមួយគត់នៅកម្ពុជា ដែលមានតម្លៃប្រវត្តិសាស្ត្រស្ថាបត្យកម្ម នគរូបនីយកម្ម និងបរិស្ថាន ។
យោងតាមលិខិតលេខ១៣២១/១៩លស ចុះថ្ងៃទី០៤ ខែធ្នូ ឆ្នាំ២០១៩ របស់រដ្ឋបាលខេត្តបាត់ដំបង ជម្រាបទៅលោក ជា សុផារ៉ា ឧបនាយករដ្ឋមន្ត្រី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ ស្នើសុំគោលការណ៍អនុញ្ញាតធ្វើការរុះរើស្ពានចាស់សម័យបារាំង ស្ថិតនៅមុខសាលាខេត្ត ភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ។
ក្នុងកម្មវត្ថុរដ្ឋបាលខេត្តបាត់ដំបងស្នើសុំបែបនេះ រដ្ឋមន្ត្រីក្រសួងវប្បធម៌ និងវិចិត្រសិល្បៈយល់ឃើញថា ពុំគួរធ្វើការរុះរើស្ពានថ្មចាស់សម័យបារាំងនោះទេ ដោយសារស្ពាននេះ មានអាយុកាលដ៏ចំណាស់ជាង១០០ឆ្នាំមកហើយ ដែលបានកសាងនៅក្នុងសម័យអាណានិគមបារាំង ជាសំណង់បេតិកភណ្ឌទីក្រុងនៅសល់តែមួយគត់ ក្នុងខេត្តបាត់ដំបងនិងនៅសល់តែមួយគត់នៅកម្ពុជា ដែលមានតម្លៃប្រវត្តិសាស្ត្រស្ថាបត្យកម្ម នគរូបនីយកម្ម និងបរិស្ថាន។
ខ្លឹមសារក្រសួងវប្បធម៌សុំអន្តរាគមន៍បញ្ជាក់ទៀតថា ម្យ៉ាងទៀតស្ពាននេះ ចាត់ទុកជាមរតកដ៏កម្រមួយ ដែលបន្សល់ទុកតាំងពីសម័យអាណានិគមបារាំង គួរតែថែរក្សាទុក និងធ្វើការជួសជុលឡើងវិញ ហើយប្រើប្រាស់ជាស្ពានថ្មើរជើង។ ក្រសួងស្នើសុំកិច្ចសហការជាមួយអ្នកជំនាញពីក្រសួងរៀបចំដែនដី នគរូបនីយកម្ម និងសំណង់ ដើម្បីចុះទៅពិនិត្យសិក្សាផ្ទាល់ដល់ទីតាំង នៅថ្ងៃទី១៩ និង២០ ខែធ្នូ ឆ្នាំ២០១៩នេះ ក្នុងគោលបំណងរកដំណោះស្រាយមួយដ៏ល្អ ក្នុងន័យអភិរក្ស ដើម្បីអភិវឌ្ឍន៍និងអភិវឌ្ឍន៍ ដើម្បីអភិរក្សប្រកបដោយចីរភាព ។
សូមបញ្ជាក់ថា កាលពីថ្ងៃទី១៣ខែធ្នូ រដ្ឋបាលខេត្ដបាត់ដំបងបានចេញសេចក្ដីជូនដំណឹង ស្ដីពីការហាមឃាត់ក្នុងការធ្វើដំណើរឆ្លងកាត់ស្ពានថ្មចាស់ នៅមុខសាលាខេត្ដបាត់ដំបងនេះបានបញ្ជាក់ថា សភាពស្ពាននេះបានចាស់ទ្រុឌទ្រោម និងបែកប្រេះស្រាំមិនអាចប្រើប្រាស់បន្តទៀតបានឡើយ ជាការចាំបាច់គឺត្រូវបញ្ឈប់ការធ្វើដំណើរឆ្លងកាត់ស្ពាននេះតែម្ដង។ រដ្ឋបាលខេត្ដបាត់ដំបងបន្ថែមថា៖ ដើម្បីទប់ស្កាត់គ្រោះថ្នាក់ដែលអាចនឹងកើតមានឡើងជាយថាហេតុ ក្នុងការពុកផុយបាក់ស្រុតរបស់ស្ពានថ្មចាស់ រដ្ឋបាលខេត្ដសូមជម្រាបជូនដំណឹងសាធារណជនទាំងអស់ ត្រូវផ្អាកការធ្វើដំណើរឆ្លងកាត់ស្ពានថ្មចាស់នេះ ចាប់ពីថ្ងៃទី ១៣ ខែធ្នូនេះតទៅ៕ ដោយ៖កូឡាប
