ភ្នំពេញ៖ សម្តេច សាយ ឈុំ បានស្នើឧត្តមក្រុមប្រឹក្សាពិគ្រោះ និងផ្តល់យោបល់ បន្តបេសកកម្មដ៏ឧត្តុង្គឧត្តម របស់ខ្លួនតាមស្មារតី នៃអង្គសន្និបាតនាពេលនេះបានដាក់ចេញ។
នាព្រឹកថ្ងៃទី២៧ ខែធ្នូ ឆ្នាំ២០១៩ សម្តេចវិបុលសេនាភក្តី សាយ ឈុំ ប្រធានព្រឹទ្ធសភានៃព្រះរាជាណាចក្រកម្ពុជា បានអញ្ជើញជាអធិបតីភាពដ៏ខ្ពង់ខ្ពស់ ក្នុងឱកាសបើកសន្និបាតបូកសរុបការងារ១៦ខែដំបូង និងទិសដៅការងារឆ្នាំ២០២០ របស់ឧត្តមក្រុមប្រឹក្សាពិគ្រោះ និងផ្តល់យោបល់ ដោយមានការចូលរួម ពីគណបក្សនយោបាយចំនួន១៦ ដែលជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់ នៅសាលប្រជុំសណ្ឋាគារសុខារ៉េស៊ីដង់ ស្ថិតក្នុងសង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ។
នៅក្នុងឱកាសនោះ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា បានថ្លែងនូវអំណរសរសើរ និងវាយតម្លៃខ្ពស់ ចំពោះថ្នាក់ដឹកនាំកំពូល នៃគណបក្សនយោបាយចំនួន១៦ ដែលបានឯកភាពគ្នា បង្កើតឧត្តមក្រុមប្រឹក្សាពិគ្រោះ និងផ្តល់យោបល់នេះឡើង ស្របតាមសភាពការណ៍ជាក់ស្តែង របស់ព្រះរាជាណាចក្រកម្ពុជា។ យោងតាមព្រះរាជក្រឹត្យស្តីពី ការរៀបចំ និងការប្រព្រឹត្តទៅនៃឧត្តមក្រុមប្រឹក្សាពិគ្រោះ និងផ្តល់យោបល់ លេខ៖ នស/រកត/០៩១៨/៩៣២ ចុះថ្ងៃទី០៦ ខែកញ្ញា ឆ្នាំ២០១៨ ឧត្តមក្រុមប្រឹក្សាពិគ្រោះ និងផ្តល់យោបល់ គឺជាយន្តការពិគ្រោះ និងផ្តល់យោបល់ របស់គណបក្សនយោបាយ ជូនរាជរដ្ឋាភិបាល ក្រៅក្របខ័ណ្ឌសភា ក្នុងគោលដៅលើកស្ទួយប្រសិទ្ធភាពការងារ ដើម្បីជាប្រយោជន៍ ដល់ការបម្រើសេវាប្រជាជន និងការអភិវឌ្ឍសង្គមជាតិ ប្រកបដោយសក្តានុពល។
សម្តេចប្រធានព្រឹទ្ធសភា បានសង្កេតឃើញថា ថ្នាក់ដឹកនាំកំពូល នៃគណបក្សនយោបាយទាំង១៦ បានខិតខំប្រឹងប្រែង សម្រេចបានលទ្ធផល គូរជាទីមោទនភាពយ៉ាងក្រៃលែង មានជាអាទិ៍ ៖ ១-លទ្ធិប្រជាធិបតេយ្យ សេរី ពហុបក្ស ត្រូវបានពង្រឹងពង្រីក ស្របតាមរដ្ឋធម្មនុញ្ញ នៃព្រះរាជាណាចក្រកម្ពុជា។ ២-រាជរដ្ឋាភិបាលទទួល បាននូវធាតុចូលពី យន្តការក្រៅក្របខ័ណ្ឌសភា ដើម្បីលើកស្ទួយ ប្រសិទ្ធភាពការងាររបស់ស្ថាប័នរដ្ឋ និងអាជ្ញាធរគ្រប់ជាន់ថ្នាក់។ ៣-ការចូលរួមមតិដ៏ល្អៗ របស់ឧត្តមក្រុមប្រឹក្សាពិគ្រោះ និងផ្តល់យោបល់ លើសេចក្តីព្រាងច្បាប់ និងលើលិខិតបទដ្ឋានគតិយុត្តនានា របស់រាជរដ្ឋាភិបាល បានចូលរួមចំណែក ធ្វើឲ្យខ្លឹមសារនៃសេចក្តីព្រាងច្បាប់ និងលិខិតបទដ្ឋាន គតិយុត្តទាំងនោះ កាន់តែសុក្រិតថែមទៀត។ ៤-លទ្ធផលនានារបស់ឧត្តមក្រុមប្រឹក្សាពិគ្រោះ និងផ្តល់យោបល់ បានរួមចំណែក ដល់ការថែរក្សាសន្តិភាព ស្ថិរភាពនយោបាយ សន្តិសុខសាធារណៈ និងអភិវឌ្ឍន៍ប្រទេសជាតិ ស្របតាមបំណងប្រាថ្នា ដ៏ពិសិដ្ឋរបស់ប្រជាជន។ និង៥-បានទប់ស្កាត់នូវការប៉ុនប៉ងជ្រៀតជ្រែក ពីខាងក្រៅមកលើកិច្ចការផ្ទៃក្នុងកម្ពុជា ក្រោមលេសប្រជាធិបតេយ្យ និងសិទ្ធិមនុស្ស។ ហើយលទ្ធផលសរុបមក១៦ខែកន្លងទៅនេះ ឧត្តមក្រុមប្រឹក្សាពិគ្រោះ និងផ្តល់យោបល់ បានរួមវិភាគទានយ៉ាងមានប្រសិទ្ធភាព ដល់ការអនុវត្តគោលនយោបាយ របស់រាជរដ្ឋាភិបាល នៃរដ្ឋសភា នីតិកាលទី៦នេះ។
សម្តេចប្រធានព្រឹទ្ធសភា បានគូសបញ្ជាក់ថា ក្រោមការដឹកនាំដ៏ត្រឹមត្រូវ ឈ្លាសវៃ និងប្រកបដោយគតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ព្រះរាជាណាចក្រកម្ពុជា បាននឹងកំពុងបោះជំហានទៅមុខ លើមាគ៌ាសន្តិភាព ប្រជាធិបតេយ្យ នីតិរដ្ឋ សហប្រតិបត្តិការ និងអភិវឌ្ឍន៍ ក្រោមម្លប់នៃសន្តិភាព និងការអភិវឌ្ឍន៍។ ប្រជាជនបាននិងកំពុងរស់នៅ ដោយសុខដុមរមនា ក្នុងសង្គមជាតិ ដោយគ្មានការរើសអើង អំពីអតីតកាល ភេទ ពូជសាសន៍ ជំនឿសាសនា និន្នាការនយោបាយ និងឋានៈក្នុងសង្គមឡើយ។ បើគ្មានសន្តិភាព គ្មានការអភិវឌ្ឍន៍ទេ គឺមានតែការវិនាសហិនហោច ខ្លោចផ្សារ និងការបែកបាក់ ដូចក្នុងដំណាក់កាលដែល ប្រជាជាតិធ្លាប់ឆ្លងកាត់ ក្នុងសម័យសង្រ្គាម និងរបបប្រល័យពូជសាសន៍ប៉ុលពត។
សម្តេចប្រធានព្រឹទ្ធសភា បានសង្កត់ធ្ងន់ថា យើងទាំងអស់គ្នាត្រូវខិតខំថែរក្សា សន្តិភាព ឯករាជ្យភាព អធិបតេយ្យភាព និងបូរណភាពដែនដីរបស់ប្រទេសជាតិ ឱ្យបានរឹងមាំក្នុងគ្រប់ស្ថានភាព និងគ្រប់កាលៈទេសៈ និងស្ថិតស្ថេរគង់វង្សជានិច្ចនិរន្តរ៍ ដើម្បីជាគុណប្រយោជន៍ដ៏ធំធេង សម្រាប់កូនចៅយើង ទាំងក្នុងជំនាន់បច្ចុប្បន្ន និងជំនាន់តរៀងទៅ។ ជាមួយនោះ សម្តេចក៏ស្នើឧត្តមក្រុមប្រឹក្សាពិគ្រោះ និងផ្តល់យោបល់ បន្តបេសកកម្មដ៏ឧត្តុង្គឧត្តម របស់ខ្លួនតាមស្មារតី នៃអង្គសន្និបាតនាពេលនេះបានដាក់ចេញ។
ក្នុងនាមព្រឹទ្ធសភា និងសម្តេចផ្ទាល់ សម្តេចប្រធានព្រឹទ្ធសភា មានសុទិដ្ឋិនិយមខ្ពស់ថា ឧត្តមក្រុមប្រឹក្សាពិគ្រោះ និងផ្តល់យោបល់ នឹងសម្រេចបាន នូវសមិទ្ធផលថ្មីៗ និងធំៗ ជាងនេះទៅទៀត ចាប់ពីក្រោយសន្និបាត ប្រកបដោយអត្ថន័យនេះតទៅ៕ ដោយ៖កូឡាប
