បាត់ដំបង៖ ក្នុងប៉ុន្មានថ្ងៃនេះ កត់សម្គាល់ឃើញថាមាន អ្នកប្រើប្រាស់បណ្តាញសង្គមមួយចំនួន បាននិងកំពុងធ្វើការផ្សព្វផ្សាយ នូវព័ត៌មានមិនពិត ទាក់ទងនឹងករណីឆ្លងវីរ៉ូស COVID-19 នៅក្នុងមូលដ្ឋានខ្លះ ក្នុងខេត្តបាត់ដំបងនោះ ឧត្តមសេនីយ៍ទោ អ៊ុច សុខុន នឹងចាត់វិធានការតាមផ្លូវច្បាប់ ចំពោះអ្នកផ្សព្វផ្សាយ ព័ត៌មានក្លែងក្លាយទាំងនោះ ។
ក្រុមការងារប្រតិកម្មរហ័ស នៃស្នងការដ្ឋាននគរបាលខេត្តបាត់ដំបង សូមជម្រាបជូនសាធារណជនជាពិសេសអ្នកប្រើប្រាស់បណ្តាញសង្គម បានជ្រាបថា ក្នុងប៉ុន្មានថ្ងៃនេះ ស្នងការដ្ឋាននគរបាលខេត្តបាត់ដំបង កត់សម្គាល់ឃើញថាមាន អ្នកប្រើប្រាស់បណ្តាញសង្គមមួយចំនួន បាននិងកំពុងធ្វើការផ្សព្វផ្សាយនូវព័ត៌មានមិនពិត ទាក់ទងនឹងករណីឆ្លងវីរ៉ូសCOVID-19 នៅក្នុងមូលដ្ឋានខ្លះក្នុងខេត្តបាត់ដំបង ដែលព័ត៌មានទាំងនោះ គឺជាព័ត៌មាន (ក្លែងក្លាយ) ឬព័ត៌មានដែលចេញពីប្រភព (មិនផ្លូវការ) បានប្រឌិតឡើង និងធ្វើការផ្សព្វផ្សាយចែករំលែក ក្នុងហេតុផលបង្កនូវការភ័យខ្លាច និងបង្កភាពចលាចល នៅក្នុងមូលដ្ឋាន។
ផ្អែកលើស្ថានភាពបែបនេះ ស្នងការនៃស្នងការដ្ឋាននគរបាលខេត្តបាត់ដំបង និងចាត់វិធានការ តាមផ្លូវច្បាប់ ចំពោះអ្នកប្រើប្រាស់បណ្តាញសង្គម ឬបុគ្គលណាដែលធ្វើការផ្សព្វផ្សាយ (Poste) ឬចែករំលែក (Share) នូវរាល់ព័ត៌មាន (ក្លែងក្លាយ) ជាហេតុនាំបង្កឲ្យមានការភាន់ច្រឡំ បង្កឲ្យមានការភ័យខ្លាច ឬចលាចលនៅក្នុងមូលដ្ឋាន។
ជាមួយនេះ ក៏សូមធ្វើការអំពាវនាវ ចំពោះប្រជាពលរដ្ឋទូទៅ ជាពិសេសអ្នក ប្រើប្រាស់បណ្តាញសង្គម មេត្តាចូលរួមលុបបំបាត់នូវរាល់ព័ត៌មាន (ក្លែងក្លាយ) ពិសេសករណីទាក់ទង ជាមួយជំងឺឆ្លងវីរ៉ូស COVID-19នេះ ៕ដោយ៖កូឡាប
