បាត់ដំបងៈ ស្ពានដែកបេឡេថ្មីបន្ថែមមួយខ្សែទៀត ជាសរសៃឈាមសេដ្ឋកិច្ច តភ្ជាប់ទៅស្រុកចំនួន៤ នៅស្រុកបាណន់ ដែលជាអំណោយរបស់សម្តេចក្រឡាហោមស ខេង តាមរយៈក្រុមការងារចុះជួយក្នុងស្រុកបាណន់ បានកំពុងដំណើរការសាងសង់ ស្ថិតនៅក្នុងឃុំកន្ទឺ១ ស្រុកបាណន់ ខេត្តបាត់ដំបង។
ឯកឧត្តមសន្តិបណ្ឌិត សុខ ផល រដ្ឋលេខាធិការក្រសួងមហាផ្ទៃ និងជាប្រធានក្រុមការងារចុះជួយស្រុកបាណន់ បានមានប្រ
សាសន៍ថា នៅពេលចុះត្រួតពិនិត្យមើលការដ្ឋានសាងសង់ស្ពានបេឡេ កាលពីចុងសប្តាហ៍ថ្មីៗ ស្ថិតនៅក្នុងឃុំកន្ទឺ១ ស្រុកបាណន់ ខេត្តបាត់ដំបង ដែលជាអំណោយដ៏ថ្លៃថ្លារបស់សម្តេចក្រឡាហោមស ខេង តាមរយៈក្រុមការងារចុះជួយ ក្នុងស្រុកបាណន់។ ការផ្តល់ស្ពានដែកបេឡេថ្មីបន្ថែមមួយខ្សែទៀតនេះ គឺជាស្ពានដែលផ្តល់នូវសរសៃឈាម សេដ្ឋកិច្ច ដើម្បីតភ្ជាប់ទៅកាន់បណ្តាស្រុកសំខាន់ៗចំនួន៤ រួមមានស្រុកសង្កែ ស្រុកបាណន់ ស្រុកគាស់ក្រឡ និងស្រុកសំឡូត។
ស្ពានដែកបេឡេថ្មីមួយខ្សែនេះ ពិតជាផ្តល់នូវសារប្រយោជន៍ យ៉ាងសំខាន់ជួយដល់ប្រជាពលរដ្ឋ ក្នុងស្រុកបាណន់ ជាពិសេសបងប្អូនប្រជាពលរដ្ឋ រស់នៅក្នុងឃុំកន្ទឺ១នេះតែម្តង។ កន្លងមកនៅអំឡុងឆ្នាំ២០១២-២០១៣ សម្តេចក្រឡាហោម បានទទួលយកសំណូមព រដោយទទូចពីប្រជាពលរដ្ឋ រស់នៅក្នុងភូមិឃុំខាងលើ ដែលចង់បានស្ពាន ដើម្បីងាយស្រួលឆ្លងកាត់ ក្នុងការដឹកកសិផលកសិកម្ម ទៅកាន់ទីផ្សារនានា។
ស្ពានបេឡេថ្មី ដែលកំពុងតែសាងសង់នេះ គឺមានប្រវែង១២៦ម៉ែត្រ និងទទឹង៤,២០ម៉ែត្រ បានចាប់ផ្តើមសាងសង់ កាលពីថ្ងៃទី១០ ខែមីនា ឆ្នាំ២០២០ ដោយកងកម្លាំងវិស្វកម្ម ស្ថិតនៅក្នុងភូមិសាស្ត្រ ភូមិសេកសកជាប់នឹងព្រំប្រទល់ភូមិទួលធ្នង់ ឃុំកន្ទឺ១ ស្រុកបាណន់ ខេត្តបាត់ដំបង។
ឯកឧត្តម ងួន រតនៈ អភិបាលខេត្តបាត់ដំបង បានមានប្រសាសន៍ថា ការសាងសង់ស្ពានថ្មីមួយខ្សែនេះ ដែលមានតម្លៃប្រមាណជា ២៧ម៉ឺនដុល្លារអាមេរិក។ ស្ពាននេះគ្រោងនឹងបញ្ចប់ក្នុងការសាងសង់ នៅក្នុងអំឡុងខែសីហា ឆ្នាំ២០២០ ខាងមុខនេះ។
ឯកឧត្តម ងួន រតនៈ បានសំណូមពរ និងជំរុញឲ្យកងកម្លាំងវិស្វកម្ម ធ្វើការកែលម្អបន្ថែមជើងសសរទម្រស្ពានចំនួន៦សសរបន្ថែមទៀត ដើម្បីជាការត្រៀមទុកជាស្រេច ទៅថ្ងៃអនាគត ដោយអាចប្រែក្លាយស្ពានបេឡេនេះ ឲ្យទៅជាស្ពានថ្ម នៅពេលណាដែលប្រទេសជាតិ រីកចម្រើនផ្នែកសេដ្ឋកិច្ច។ កម្លាំងវិស្វកម្ម ដែលកំពុងតែអនុវត្គគម្រោងសាងសង់ ត្រូវយកចិត្តទុកដាក់ក្នុងការសាងសង់ស្ពាន ឲ្យបានត្រឹមត្រូវតាមស្តង់ដារបច្ចេកទេស៕
ដោយៈ អ៊ុងសារុំ
