ភ្នំពេញ៖ សម្តេចពិជ័យសេនា ទៀ បាញ់ បានថ្លែងថា ក្នុងដំណើរប្រយុទ្ធប្រឆាំងនឹងជំងឺវីរុស ភាគីទាំងពីរ(កម្ពុជានិងចិន) បានសាមគ្គីគ្នា សហការគ្នាយ៉ាងស្អិតល្មួត ហើយការជួយផ្នែកវេជ្ជសាស្ត្រ ដែលបានផ្តល់ដោយចិន ពិសេសក្រុមអ្នកជំនាញវេជ្ជសាស្ត្រយោធាចិន បានជួយកម្ពុជា កាន់តែមានទំនុកចិត្ត និងកាន់តែមានភាពកក់ក្តៅ។
ស្ថានទូតចិនប្រចាំកម្ពុជា បានឲ្យដឹងថា នាថ្ងៃទី២២ ខែឧសភា ក្រសួងការពារជាតិកម្ពុជា បានរៀបចំពិធីបំពាក់គ្រឿង ឥស្សរយយស ជូនដល់ក្រុមអ្នកជំនាញវេជ្ជសាស្ត្រយោធាចិន ដែលជាក្រុមជំនួយទប់ស្កាត់នឹងជំងឺវីរុស ជូនចំពោះកម្ពុជា ហើយពិធីនេះត្រូវបានរៀបចំឡើងក្នុងរាជធានីភ្នំពេញ ដើម្បីជាការសរសើរ ជូនដល់ក្រុមអ្នកជំនាញ ដែលបានរួមចំណែកកិច្ចទប់ស្កាត់នឹងជំងឺវីរុស ជូនដល់កងយោធពលខេមរភូមិន្ទកម្ពុជា។ ឯកឧត្តម Wang Wentian ឯកអគ្គរដ្ឋទូតចិនប្រចាំកម្ពុជា, លោកLi Jingfeng អនុព័ន្ធយោធា នៃស្ថានទូតចិនប្រចាំកម្ពុជា និងមន្ត្រីផ្សេងទៀត អញ្ជើញមានវត្តមានក្នុងពិធី។
សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានបំពាក់គ្រឿងឥស្សរិយយស ដោយផ្ទាល់ ជូនដល់អ្នកជំនាញទាំង៤រូប។
សម្តេចពិជ័យសេនា មានប្រសាសន៍ថា ភាគីកម្ពុជាសូមថ្លែងអំណរគុណ ដល់ភាគីចិន ដែលបានចាត់បញ្ជូនក្រុមជំនាញយោធាវេជ្ជសាស្ត្រ ទប់ស្កាត់នឹងជំងឺវីរុស មកកាន់ប្រទេសកម្ពុជា និងព្រមទាំងបានផ្តល់ជំនួយជាសម្ភារទប់ស្កាត់ជាច្រើនផងដែរ។ កិច្ចការនៃក្រុមជំនាញយោធាវេជ្ជសាស្ត្រចិន មានភាពលេចធ្លោខ្លាំង បានជួយបណ្តុះបណ្តាលដល់មន្ត្រីយោធាវេជ្ជសាស្ត្រកម្ពុជា យ៉ាងច្រើនផងដែរ ហើយក៏បានចែករំលែក បទពិសោធន៍ និងមធ្យោបាយ នៃការទប់ស្កាត់នឹងជំងឺវីរុស ជួយលើកកម្ពស់សមត្ថភាព និងអត្ថប្រយោជន៍សំខាន់ៗ ក្នុងការតបទល់ជាមួយនឹងជំងឺវីរុសមួយនេះ។ ក្នុងដំណើរប្រយុទ្ធប្រឆាំងនឹងជំងឺវីរុស ភាគីទាំងពីរបានសាមគ្គីគ្នា សហការគ្នាយ៉ាងស្អិតល្មួត ហើយការជួយផ្នែកវេជ្ជសាស្ត្រ ដែលបានផ្តល់ដោយចិន បានជួយកម្ពុជាកាន់តែមានទំនុកចិត្ត និងកាន់តែមានភាពកក់ក្តៅ។
ឯកអគ្គរដ្ឋទូតចិន មានប្រសាសន៍ថា ចិននិងកម្ពុជា ជួយយកអាសាគ្នាទៅវិញទៅមក ពួតដៃគ្នាក្នុងកិច្ចទប់ស្កាត់នឹងជំងឺវីរុស យកសកម្មភាពជាក់ស្តែង មកបង្ហាញពីភាពត្រចះត្រចង់ នៃសហគមន៍ជោគវាសនារួម បង្កើតគំរូសម្រាប់កិច្ចទប់ស្កាត់នឹងជំងឺវីរុស សម្រាប់កិច្ចសហប្រតិបត្តិការសហគមន៍អន្តរជាតិ។ ខណៈពេលដែលចិន កំពុងតែជួបការលំបាកបំផុត ក្នុងកិច្ចទប់ស្កាត់នឹងជំងឺវីរុសក្នុងប្រទេស កម្ពុជា បានផ្តល់ការគាំទ្រយ៉ាងមុតមាំបំផុត ជូនដល់ភាគីចិន។ ភាគីចិន សូមវាយតម្លៃខ្ពស់ដល់កម្ពុជា ដែលបានប្រកាន់ភ្ជាប់ភាពទៀងត្រង់ សច្ចធម៌ លើឆាកអន្តរជាតិ បានប្រឆាំងនឹងជាមួយការប្រើស្ថានភាព នៃជំងឺវីរុសមកជាលក្ខណៈនយោបាយ និងលាបពណ៌បង្ខូចឈ្មោះអ្នកដទៃ។ ឆ្នាំនេះ ជាខួបអនុស្សាវរីយ៍១០ឆ្នាំ នៃការបង្កើតទំនាក់ទំនងដៃគូ កិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយ រវាងចិននិងកម្ពុជា ជាខួបអនុស្សាវរីយ៍១ឆ្នាំ នៃការចុះហត្ថលេខាអនុវត្តផែនការសកម្មភាព កសាងសហគមន៍ជោគវាសនារួម រវាងចិននិងកម្ពុជា។ យើងត្រូវតែអនុវត្តកុងសុងស៊ីស ដែលបានកំណត់ដោយថ្នាក់ដឹកនាំយោធាទាំងពីរប្រទេស ឲ្យបានល្អ រៀបចំកិច្ចទប់ស្កាត់ និងកិច្ចសហប្រតិបត្តិជាក់ស្ដែង សម្រាប់ជំងឺវីរុស។ ក្រោយពីឆ្លងកាត់ការលត់ដំនៃជំងឺវីរុស នឹងជួយជំរុញទំនាក់ទំនងយោធាទាំងពីរប្រទេស ឈានទៅរកដំណាក់កាលថ្មីមួយ និងរួមគ្នាចូលរួមលះបង់ ក្នុងបញ្ហាប្រឈមនេះ លើសកលលោក និងក្នុងតំបន់។
គួរបញ្ជាក់ថា ក្រុមអ្នកជំនាញវេជ្ជសាស្ត្រ ដែលជាក្រុមជំនួយក្នុងកិច្ចទប់ស្កាត់នឹងជំងឺវីរុស ដែលបានចាត់បញ្ជូនដោយកងទ័ពរំដោះប្រជាជនចិន ជូនចំពោះប្រទេសកម្ពុជា បានមកដល់រាជធានីភ្នំពេញ កាលពីថ្ងៃទី២៤ ខែមីនា ហើយរយៈពេល២ខែកន្លងមកនេះ ក្រុមអ្នកជំនាញនិងភាគីកម្ពុជា បានរួមសុខទុក្ខជាមួយគ្នា បានខិតខំប្រឹងប្រែងពុះពារក្នុងសង្គ្រាមជំងឺវីរុសនេះ ហើយក៏បានបង្កើតជាមនោសញ្ចេតនាដ៏សែនជ្រាលជ្រៅបំផុត ដែលមិនអាចកាត់ផ្ដាច់បាន៕
ដោយ៖កូឡាប
