ខេត្តកណ្ដាល ៖ បុរសម្នាក់បានជិះរថយន្ដមួយគ្រឿងធ្វើដំណើរពីរាជធានីភ្នំពេញឆ្ពោះមកក្រុងតាខ្មៅ ដោយយកប្រាក់ដុល្លារក្លែងក្លាយបន្លំទិញឥវ៉ាន់របស់ប្រជាពលរដ្ឋជាអាជីវករជាបន្ដបន្ទាប់គ្នា ចុងក្រោយបែកការត្រូវពលរដ្ឋជាអាជីវករប្ដឹងសមត្ថកិច្ចជួយអន្ដរាគមន៍ចាប់ខ្លួន នៅវេលាម៉ោង១៨និង៣០នាទី ថ្ងៃទី២៣ ខែមករា ឆ្នាំ២០១៨ ត្រង់ចំណុចផ្ទះលក់ភេសជ្ជៈ ស្ថិតក្នុងភូមិភូមិតាក្តុល សង្កាត់តាក្តុល ក្រុងតាខ្មៅ ខេត្តកណ្តាល ។
លោកវរសេនីយ៍ ស កែវពិសិដ្ឋ អធិការក្រុងតាខ្មៅ បានឲ្យដឹងថា ជនសង្ស័យចាប់ខ្លួនបានឈ្មោះ សឺ ប៊ុនទ្រី ភេទប្រុស អាយុ៦៧ឆ្នាំ ជនជាតិខ្មែរ មុខរបរលក់ដូរ មានទីលំនៅផ្ទះលេខ១០៩ ផ្លូវ២៧៤ សង្កាត់បឹងព្រលឹត ខ័ណ្ឌ៧មករា រាជធានីភ្នំពេញ ។ ចំណែកឯជនរងគ្រោះមាន៣នាក់ទី១-ឈ្មោះ ផាវ សារិទ្ធ ភេទប្រុស អាយុ៦១ឆ្នាំ ជនជាតិខ្មែរ មុខរបរលក់ដូរេ មានទីលំនៅភូមិតាក្តុល សង្កាត់តាក្តុល ក្រុងតាខ្មៅ ខេត្តកណ្តាលទី២-ឈ្មោះ លឹម លីម ភេទប្រុស អាយុ៥២ឆ្នាំជនជាតិខ្មែរ មុខរបរលក់ដូរ មានទីលំនៅភូមិក្រពើហា សង្កាត់ព្រែកឫស្សី ក្រុងតាខ្មៅ ខេត្តកណ្តាល និងទី៣-ឈ្មោះ ម៉ន អៀង ភេទប្រុស អាយុ២៨ឆ្នាំ ជនជាតិខ្មែរ មានទីលំនៅភូមិព្រែកឫស្សី សង្កាត់ព្រែកឫស្សី ក្រុងតាខ្មៅ ខេត្តកណ្តាល ។ ក្នុងការចាប់ខ្លួននេះផងដែរសមត្ថកិច្ចធ្វើការដកហូតវត្ថុតាងមួយចំនួនរួមមាន៖ រថយន្ត១គ្រឿងម៉ាកTOYOTA pruis ពណ៌ក្រហម បិទស្កុតពណ៌ស ពាក់ស្លាកលេខ ភ្នំពេញ2AS-1163 ,ប្រាក់ដុល្លារក្លែងក្លាយចំនួន២,៧០០ដុល្លារសហរដ្ឋអាមេរិក ,ប្រាក់ដុល្លារពិតប្រាកដចំនួន២៩ដុល្លារសហរដ្ឋអាមេរិក ,ប្រាក់រៀលចំនួន១០២,៨០០រៀល ,ស្រាបៀរABCចំនួន៣កេស ,ប្រេងសាំងចំនួន១ប៊ីដុង មានចំណុះ៣០លីត្រ ,អាគុយម៉ាកROCKETចំនួន២គ្រឿង និងទូរស័ព្ទដៃចំនួន១គ្រឿងម៉ាកLG ពណ៌ស ។
លោកអធិការបានបន្ដថា នៅមុនពេលកើតហេតុ ជនសង្ស័យឈ្មោះ សឺ ប៊ុនទ្រី បានជិះរថយន្តម៉ាក TOYOTA pruis ពណ៌ក្រហម បិទស្កុតពណ៌ស ពាក់ស្លាកលេខ ភ្នំពេញ2AS-1163 ពីធ្វើដំណើរពីរាជធានីភ្នំពេញឆ្ពោះមកក្រុងតាខ្មៅ ដោយយកប្រាក់ដុល្លារក្លែងក្លាយ ក្រដាស់១០ៗចំនួន២៧០០ដុល្លារសហរដ្ឋអាមេរិក រួចចុះពីលើឡានទៅទិញស្រាបៀរនិងសាំងរបស់ជនរងគ្រោះចំនួន៣នាក់ដូចរៀបរាប់ខាងលើជាបន្តបន្ទាប់គ្នា ខណៈដែលទិញរួច ជនសង្ស័យក៏បានបើករថយន្ដចេញពីកន្លែងលក់ឆ្ពោះទៅទិញកន្លែងផ្សេងទៀត ។ ក្រោយមកជនរងគ្រោះបានដឹងថា ជនសង្ស័យទិញទំនិញរបស់ខ្លួនជាប្រាក់ដុល្លារក្លែងក្លាយ ភ្លាមនោះជនរងគ្រោះក៏តាមរកជនសង្ស័យឃើញនៅម្តុំផ្សារព្រែកហូរ ភ្លាមនោះក៏បានឃាត់ខ្លួន រួចប្រគល់ជូនសមត្ថកិច្ចដើម្បីចាត់ការតាមច្បាប់ ។
នៅចំពោះសមត្ថកិច្ចជនល្មើសបានឆ្លើយសារភាពថាខ្លួនពិតជាបានយកប្រាក់ដុល្លារក្លែងក្លាយទៅទិញទំនិញរបស់ជនរងគ្រោះពិតប្រាកដមែននិងកាលពីថ្ងៃទី១៩ខែឆ្នាំដដែលក៏ធ្លាប់បានយកប្រាក់ដុល្លារក្លែងក្លាយចំនួន១០០ដុល្លារទៅដូរយកប្រាក់រៀលនៅចំណុចស្តុបស្ពានព្រែកហូរម្តងរួចមកហើយ៕ ដោយ៖បញ្ញាស័ក្តិ
