ភ្នំពេញ៖ គណៈកម្មការតាមដានការផ្សព្វផ្សាយព័ត៌មានក្លែងក្លាយនៃក្រសួងព័ត៌មាន បើកកិច្ចប្រជុំពេញអង្គលើកដំបូង។ បើយោងរបាយការណ៍របស់គណៈកម្មការតាមដានការផ្សព្វផ្សាយព័ត៌មានក្លែងក្លាយបានឲ្យដឹងថា ចាប់ថ្ងៃទី២១ មីនា មកដល់ថ្ងៃទី២៧ ឧសភា ឆ្នាំ២០២០នេះ គណៈកម្មការបានស្រង់ប្រភពដែលផ្សព្វផ្សាយដំណឹងក្លែងក្លាយព័ត៌មានមិនពិត ញុះញង់ រិះគន់ និងជេរប្រមាថថ្នាក់ដឹកនាំ សរុបចំនួន៣៣១ ករណី ក្នុងនោះ ក្រសួងក៏លុបអាជ្ញាប័ណ្ណប្រព័ន្ធផ្សព្វ ផ្សាយដែលផ្សាយព័ត៌មានបំពានច្បាប់ធ្ងន់ធ្ងរចំនួន៣អង្គភាព។
ឯកឧត្តម អ៊ុក ប្រាថ្នា រដ្ឋលេខាធិការក្រសួងព័ត៌មាន និងជាប្រធានគណៈកម្មការតាមដានការផ្សព្វផ្សាយព័ត៌មានក្លែងក្លាយ នៅថ្ងៃទី២៨ ខែឧសភា ឆ្នាំ២០២០ នៅទីស្តីការក្រសួងព័ត៌មាន បានបើកកិច្ចប្រជុំពេញអង្គ របស់គណៈកម្មការតាមដានកាផ្សព្វផ្សាយព័ត៌មានក្លែងក្លាយ។ មានប្រសាសន៍លើកឡើង នាឱកាសនោះ ឯកឧត្តម អ៊ុក ប្រាថ្នា បានជំរុញដល់អង្គភាពផ្សព្វផ្សាយរបស់រដ្ឋទាំងអស់ ត្រូវឈានមុខគេក្នុងការផ្សាយព័ត៌ មានពិតត្រឹមត្រូវ ច្បាស់លាស់ ទាន់ពេលវេលា ដើម្បីរួមគ្នាប្រឆាំង ឆ្លើយតបទាន់ពេលនូវរាល់ ព័ត៌មានក្លែងក្លាយ ដែលកើតមានឡើងជាច្រើន នាពេលបច្ចុប្បន្ននេះ។ ជាងនេះទៅទៀតក៏ ត្រូវមានវិធានការរដ្ឋបាលចំពោះអ្នក ដែលបានផ្សព្ធផ្សាយព័ត៌មានមិនពិត នាំអោយមានការ ប៉ះពាល់ដល់កិត្តិយស និងសេចក្តីថ្លៃថ្នូររបស់ថ្នាក់ដឹកនាំ ។
ឯកឧត្តម បានបន្ដថា គណៈកម្មការនេះ មានភារកិច្ចតាមដានការផ្សាយព័ត៌មានក្លែងក្លាយ តាមប្រព័ន្ធផ្សព្វផ្សាយនានា និងដំណឹងមិនពិត តាមបណ្តាញទំនាក់ទំនងសង្គម។ ធ្វើការឆ្លើយតបជូន សាធារណជនអោយបានទាន់ពេលវេលា តាមគ្រប់មធ្យោបាយដែលមានស្រាប់ ជាពិសេសត្រូវសហការជាមួយក្រសួងស្ថាប័នពាក់ព័ន្ធ ឬក្រុមហ៊ុនបណ្តាញទំនាក់ទំនងសង្គម ដើម្បីរាំងខ្ទប់ (Block) គេហទំព័រ គណនី ឬទំព័រ(Page) ទាំងឡាយដែលផ្សព្វផ្សាយព័ត៌មានមិនពិត និងព័ត៌មាននាំឲ្យមាន ការជ្រួលច្របល់ក្នុងសង្គម និងស្នើសុំគោលការណ៍ ដើម្បីអនុវត្តន៍ ចាត់វិធានការតាមផ្លូវច្បាប់។
ឯកឧត្តម សង្ឃឹមជឿជាក់ថា ថ្នាក់ដឹកនាំ និងសមាជិកគណៈកម្មការតាមដានការផ្សព្វផ្សាយព័ត៌មានក្លែងក្លាយ នឹងបន្តរួមសហការគ្នាតាមដានរាល់ព័ត៌មានក្លែងក្លាយ ដើម្បីក្រុមការងារវាយបក ឆ្លើយតបចំពោះអ្វីដែលមិនមែនជាការពិត។
មានប្រសាសន៍ក្នុងកិច្ចប្រជុំនោះដែរ ឯកឧត្តម ផុស សុវណ្ណ ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកព័ត៌មាន និងសោតទស្សន៍ នៃក្រសួងព័ត៌មាន ក៏បានបញ្ជាក់ថា យើងមិនត្រឹមតែតាមដានព័ត៌មានក្លែងក្លាយប៉ុណ្ណោះទេ សម្រាប់ព័ត៌មានញុះញង់ ជេរប្រមាទថ្នាក់ដឹកនាំ ក៍ត្រូវត្រួតពិនិត្យតាមដានដែរ ។
ទាក់ទងជាមួយនឹងការងារប្រយុទ្ធប្រឆាំងព័ត៌មានក្លែងក្លាយ យើងឃើញថា ក្នុងអំឡុងពេលដែលមានបញ្ហាប្រឈម ទាក់ទងជំងឺកូវីដ១៩នេះ ក្នុងចន្លោះខែមីនា និងខែមេសា យើងឃើញមានការរីកលូតលាស់ច្រើន ប៉ុន្តែមកដល់ពេលនេះ យើងឃើញវាមានចំនួនថយចុះ ប៉ុន្តែក្រុមការងារយើងនេះមិនមែនធ្វើតែការងារទាក់ទងជាមួយកូវីដទេ គឺយើងធ្វើការងារទាក់ទងប្រឆាំងនិង ព័ត៌មានក្លែងក្លាយ ព័ត៌មានញុះញង់ ជេរប្រមាទថ្នាក់ដឹកនាំ ក៏យើងត្រួតពិនិត្យមើលការងារនេះដែរ។
ឯកឧត្តម ផុស សុវណ្ណ បានបញ្ជាក់ថា យើងនឹងបន្តធ្វើការងារតាមដានការងាររហូតទាំងអស់ នេះរហូតទៅ ទើបបានជាថ្ងៃនេះ យើងមានកិច្ចប្រជុំដូចជាកិច្ចប្រជុំលើកដំបូងមួយ ដើម្បីធ្វើយ៉ាងណាយើងកំណត់នូវភារកិច្ច កំណត់នូវសកម្មភាពមួយចំនួន សម្រាប់ឲ្យក្រុមដែលជាសមាជិកសមាជិកាយើងនៅតែបន្តតាមដានការងារនេះតទៅទៀត។
សូមបញ្ជាក់ថា ក្នុងចំណោមដំណឹងក្លែងក្លាយព័ត៌មានមិនពិត ញុះញង់ រិះគន់ និងជេរប្រមាថថ្នាក់ដឹកនាំ ចំនួន៣៣១ គណៈកម្មការបានចាត់វិធានការដូចខាងក្រោម៖ សេចក្តីជូនដំណឹងរបស់អគ្គនាយកដ្នានព័ត៌មាន និងសោតទស្សន៍ចំនួន៤៩ ករណី។
អគ្គស្នងការនគបាលជាតិចំនួន២៤ ករណី (សម្រាប់មុខសញ្ញានៅក្នុងប្រទេស បានចាត់វិថានការជាបន្តបន្ទាប់ ដោយឡែកមុខសញ្ញាភាគច្រើន នៅក្រៅប្រទេស កំពុងកសាងសំណុំរឿង ដោយសារកិច្ចសហការជាមួយបណ្តាប្រទេសទាំងនោះ នៅមានកម្រិតហើយអគ្គនាយកដ្ឋានគ្រោងបញ្ជូនថ្មី២០ករណីទៀត។ និយ័តករទូរគមនាគមន៍កម្ពុជា ចំនួន២ករណី (បានបិទគេហទំព័រ) ក្រុមហ៊ុនហ្វេសប៊ុកចំនួន៨ករណី (លុបមាតិកា១ និងបិទគណនី២)។ អគ្គនាយកដ្ឋាន បានអញ្ជើញប្រព័ន្ធផ្សព្វផ្សាយ ដែលបានផ្សាយព័ត៌មានមិនពិត មិនគោរពក្រមសីលធម៌វិជ្ជាជីវៈសារព័ត៌មាន មកអប់រំ ណែនាំចំនួន២អង្គភាព (k01 និងផែនដីថ្មីPDT-News)។ លុបអាជ្ញាប័ណ្ណប្រព័ន្ធផ្សព្វផ្សាយដែលផ្សាយព័ត៌មាន បំពានច្បាប់ធ្ងន់ធ្ងរចំនួន ៣ អង្គភាព គឺ(គេហទំព័រTVFB គេហទំព័រចក្រវាឡធីវីអនឡាញ និងវីទ្យុរិទ្ធីសែន)៕
ដោយ៖កូឡាប
