ភ្នំពេញ៖ លោកជំទាវ Carmen Moreno ឯកអគ្គរដ្ឋទូតសហភាពអឺរ៉ុបប្រចាំកម្ពុជា បានថ្លែងរដ្ឋមន្ត្រីក្រសួងទេសចរណ៍ថា សហភាពអឺរ៉ុប បានចេញមុខបន្តគាំទ្រការអភិវឌ្ឍវិស័យទេសចរណ៍កម្ពុជា និងការអភិវឌ្ឍអេកូទេសចរណ៍ និងធនធានមនុស្សក្នុងវិស័យទេសចរណ៍ ដោយប្ដេជ្ញាបង្កើនកិច្ចសហប្រតិបត្តិការ ឱ្យកាន់ខ្លាំងជាមួយរាជរដ្ឋាភិបាល ក៏ដូចជា ក្រសួងទេសចរណ៍កម្ពុជា។
ជាមួយលោកជំទាវ ខាមិន ម៉រីណូ (Carmen Moreno) ឯកអគ្គរដ្ឋទូតសហភាពអឺរ៉ុបប្រចាំកម្ពុជា បានថ្លែងបែបនេះ ក្នុងជំនួបពិភាក្សាការងារជាមួយឯកឧត្ដមបណ្ឌិត ថោង ខុន រដ្ឋមន្ត្រីក្រសួងទេសចរណ៍ នាថ្ងៃទី២៨ ខែឧសភា ឆ្នាំ២០២០ នៅទីស្ដីការក្រសួងទេសចរណ៍។
នាឱកាសនោះ ឯកឧត្ដមរដ្ឋមន្ត្រី ថោង ខុន បានលើកឡើងពីបច្ចុប្បន្នភាព នៃវិស័យទេសចរណ៍កម្ពុជា ដែលកំពុងរងផលប៉ះពាល់យ៉ាងខ្លាំង ដោយសារវិបត្តិជំងឺកូវីដ១៩ ធ្វើឱ្យប្រជាជនមួយចំនួន ដែលធ្លាប់បម្រើការក្នុងវិស័យសេវាកម្ម បាត់បង់ការងារធ្វើ។ នារយៈពេលចុងក្រោយនេះ កម្ពុជាក៏នៅទទួលបានភ្ញៀវទេសចរក្នុងស្រុកខ្លះដែរ ដោយក្នុងរយៈពេល ៣ សប្ដាហ៍នៃខែឧសភានេះ មានភ្ញៀវទេសចរក្នុងស្រុកប្រមាណជិត ៤ សែននាក់បានចេញដើរទស្សនាទូទាំងប្រទេស។ កម្ពុជាបានដាក់ចេញវិធានការមួយចំនួន ដោយគ្រោងប្រមូលអ្នកបាត់បង់ការងារពីវិស័យទេសចរណ៍ ឱ្យមកទទួលការបណ្ដុះបណ្ដាលជំនាញទេសចរណ៍បន្ថែម ដើម្បីត្រៀមខ្លួនចូលមកបម្រើការងារនៅពេលភ្ញៀវទេសចរត្រលប់មកវិញ។
ឯកឧត្ដមរដ្ឋមន្ត្រី ថោង ខុន បានស្នើឱ្យសហភាពអឺរ៉ុបជួយគាំទ្រដល់កិច្ចការដ៏ចាំបាច់នានា ពិសេសគឺការបង្រៀនតាមប្រព័ន្ធឌីជីថល ឬហៅថា E-learning។ ឯកឧត្ដមរដ្ឋមន្ត្រី ក៏បានស្នើដល់សហភាពអឺរ៉ុបជួយគាំទ្រ និងផ្ដល់កិច្ចសហប្រតិបត្តិការ ពិសេសចែករំលែកបទពិសោធន៍ លើការរៀបចំវិធានការដោះស្រាយបញ្ហាជំងឺកូវីដ និងការស្ដារវិស័យទេសចរណ៍ឡើងវិញ តាមបែបផែនថ្មី New Normal life ក្នុងប្រទេសកម្ពុជា ក៏ដូចជាក្នុងតំបន់អាស៊ានទាំងមូល។
លោករដ្ឋមន្ត្រី ថោង ខុន ស្នើទៅកាន់លោកស្រីឯកអគ្គរដ្ឋទូត ចំពោះការផ្សព្វផ្សាយ អំពីគោលដៅទេសចរណ៍កម្ពុជា ទៅកាន់ទីផ្សារទេសចរណ៍អឺរ៉ុប ដើម្បីជំរុញឱ្យមានចលនាទេសចរអន្តរជាតិ មកកម្ពុជាវិញ នៅក្រោយវិបត្តិជំងឺកូវីដ។ រមណីយដ្ឋានទេសចរណ៍ តំបន់អេកូទេសចរណ៍នានា ពិសេសតំបន់សៀមរាប-អង្គរ តំបន់អេកូទេសចរណ៍ ភូមិភាគឦសាន តំបន់ឆ្នេរសមុទ្រនាភាគនិរតី ក៏កំពុងរៀបចំកែលម្អសោភ័ណភាព ប្រព័ន្ធគមនាគមន៍ និងសេវាកម្មជាច្រើនផ្សេងទៀតផងដែរ ដើម្បីត្រៀមចំស្វាគមន៍ការត្រលប់មកវិញនៃភ្ញៀវទេសចរអន្តរជាតិ។
ឯកឧត្ដមរដ្ឋមន្ត្រី ក៏បានស្នើសហភាពអឺរ៉ុប ដែលមានបទពិសោធន៍ខាងរៀបចំរចនាសម្ព័ន្ធទីក្រុងស្អាត ទីក្រុងវៃឆ្លាត (Smart City) ឱ្យជួយគាំទ្រជ្រោមជ្រែងដល់កម្ពុជាបន្តទៀត ។ ប្រការនេះក៏ត្រូវបានចាត់ទុកថា ជាផលិតផលទេសចរណ៍ដ៏សំខាន់មួយ ហើយក៏ស្របពេលដែលកម្ពុជាកំពុងរៀបចំខ្លួនធ្វើជាម្ចាស់ផ្ទះ «វេទិកាទេសចរណ៍អាស៊ាន ២០២១ និងកិច្ចប្រជុំរដ្ឋមន្ត្រីទេសចរណ៍អាស៊ាន និងការត្រៀមខ្លួនធ្វើម្ចាស់ផ្ទះ ព្រឹត្តិការណ៍កីឡាស៊ីហ្គេម ២០២៣ផងដែរ។
ជាមួយនឹងសំណើរបស់ឯកឧត្តមរដ្ឋមន្ត្រី ត្រូវបានលោកជំទាវឯកអគ្គរដ្ឋទូត ខាមិន ម៉រីណូ ទទួលយក និងបានប្ដេជ្ញា បន្តកិច្ចសហប្រតិបត្តិការឱ្យកាន់តែជិតស្និទ្ធ ជាមួយរាជរដ្ឋាភិបាលកម្ពុជា និងកិច្ចសហប្រតិបត្តិការ លើវិស័យទេសចរណ៍ ជាមួយក្រសួងទេសចរណ៍។
លោកស្រី ខាមិន ក៏បានមើលឃើញពីការខិតខំរបស់កម្ពុជា ដែលបានខិតខំអភិវឌ្ឍន៍វិស័យទេសចរណ៍ ប្រកបដោយចីរភាព និងមានទំនួលខុសត្រូវខ្ពស់។ ដោយហេតុនេះហើយ ទើបសហភាពអឺរ៉ុប ចេញមុខបន្តគាំទ្រជួយអភិវឌ្ឍន៍វិស័យនេះបន្តទៀត ហើយសង្ឃឹមថា កិច្ចសហប្រតិបត្តិការទាំងឡាយ នឹងកាន់តែល្អប្រសើរឡើង ក្រោយវិបត្តិជំងឺកូវីដរសាត់បាត់ទៅ។
ឯកអគ្គរដ្ឋទូតអឺរ៉ុបរូបនេះ ថែមទាំងបានប្ដេជ្ញា នាំព័ត៌មានពាក់ព័ន្ធនឹងគោលដៅទេសចរណ៍នៅកម្ពុជា ក៏ដូចជាការត្រៀមខ្លួនរបស់ពលរដ្ឋកម្ពុជា ក្នុងការទទួលភ្ញៀវទេសចរពីអឺរ៉ុប គឺកិត្តិនាមមនុស្សធម៌មិនចេះរីងស្ងួត ដែលសម្តេចតេជោ ហ៊ុន សែន នាយករដ្ឋមន្ត្រីកម្ពុជា ក៏ដូចជាប្រជាជនកម្ពុជា បានជួយយកអាសាភ្ញៀវអន្តរជាតិនៅលើនាវា Westerdam យកទៅផ្សព្វផ្សាយ ទៅក្នុងទីផ្សារទេសចរណ៍អឺរ៉ុប គ្រប់ច្រកល្ហក៕
ដោយ៖កូឡាប
