ភ្នំពេញ៖ ក្រសួងមហាផ្ទៃ បើកកិច្ចប្រជុំពិភាក្សាបន្ត លើសេចក្តីព្រាងច្បាប់ស្តីពីបទល្មើសបច្ចេកវិទ្យាព័ត៌មាន ដើម្បីទប់ស្កាត់ និងបង្ក្រាបបទល្មើសបច្ចេកវិទ្យាព័ត៌មានវិទ្យា ហើយការពិភាក្សា ក្នុងការកែសម្រួលសេចក្តីព្រាងច្បាប់នេះដែរ នឹងធ្វើឡើងជាបន្តបន្ទាប់ទៀត ដើម្បីស្វែងរកនូវធាតុចូលបន្ថែមទៀត សម្រាប់រៀបចំសេចក្ដីព្រាងច្បាប់មួយនេះ ឲ្យសមស្របតាមការវិវឌ្ឍនៃបរិបទសង្គម និងដើម្បីឱ្យកាន់តែមានភាពសុក្រិតល្អថែមទៀត។
នៅទីស្តីការក្រសួងមហាផ្ទៃ នារសៀលថ្ងៃព្រហស្បតិ៍ ទី២៨ ខែឧសភា ឆ្នាំ២០២០ ក្រសួងមហាផ្ទៃ បើកកិច្ចប្រជុំបន្តពិភាក្សា និងពិនិត្យលើសេចក្តីព្រាងច្បាប់ស្តីពី បទល្មើសបច្ចេកវិទ្យាព័ត៌មាន ក្រោម អធិបតីភាព ឯកឧត្តម ប៊ុន ហុន រដ្ឋលេខាធិការ ក្រសួងមហាផ្ទៃ ទទួលបន្ទុកក្រុមប្រឹក្សានីតិកម្ម ដោយ មានការចូលរួមពី រដ្ឋលេខាធិការ អនុរដ្ឋលេខាធិការ អគ្គលេខាធិការក្រសួងមហាផ្ទៃ ប្រធាន អនុប្រធានក្រុមប្រឹក្សានីតិកម្ម តំណាងអគ្គនាយកដ្ឋាន នាយកដ្ឋាននានាចំណុះក្រសួងមហាផ្ទៃ មន្ត្រី ជំនាញផ្នែកច្បាប់ និងអង្គភាពជំនាញពាក់ព័ន្ធជាច្រើនផងដែរ។
មានប្រសាសន៍ក្នុងកិច្ចប្រជុំនោះ ឯកឧត្តម ប៊ុន ហុន បានឱ្យដឹងថាកិច្ចប្រជុំស្តីពី បទល្មើស បច្ចេកវិទ្យាព័ត៌មានពេលនេះ គឺបានធ្វើចាប់ផ្តើមដំណើការឡើងវិញបន្ទាប់ពីបានខកខាន រយៈពេលជាងពីរខែមកហើយ គឺតាំងពីខែថ្ងៃទី ៦ មីនា ឆ្នាំ២០២០ ដោយសារ តែវិបត្តិ នៃជំងឺកូវីដ១៩ ។
ឯកឧត្តម ប៊ុន ហុន បានលើកឡើថា សេចក្តីព្រាងច្បាប់ស្តីពីបទល្មើសបច្ចេកវិទ្យាព័ត៌មាន ដែលបានកែសម្រួលមកដល់ពេលនេះ មានភាពល្អប្រសើរហើយ ជាងនេះទៅទៀត ឯកឧត្តមសង្ឃឹមថាការពិភាក្សា ក្នុងការកែសម្រួលសេចក្តីព្រាងច្បាប់ស្តីពីបទល្មើសបច្ចេកវិទ្យាព័ត៌មាននេះដែរ នឹងធ្វើឡើងជាបន្តបន្ទាប់ទៀត ដើម្បីស្វែងរកនូវធាតុចូលបន្ថែមទៀត សម្រាប់រៀបចំសេចក្ដីព្រាងច្បាប់មួយនេះអោយសមស្របតាមការវិវត្តនៃបរិបទសង្គម និងដើម្បីឱ្យកាន់តែមានភាពសុក្រិតល្អថែមទៀត។
ក្រៅពីនេះឯកឧត្តមសង្ឃឹមថា សេចក្តីព្រាងច្បាប់បទល្មើសបច្ចេកវិទ្យានេះនឹងបញ្ចប់ក្នុងពេលឆាប់ៗខាងមុខនេះ ព្រោះច្បាប់នេះមានសារសំខាន់ខ្លាំងណាស់ ក្នុងការគ្រប់គ្រង ព្រមទាំងទប់ស្កាត់នូវបទល្មើសបច្ចេកវិទ្យាផ្សេងៗដែលកើតមានក្នុងសង្គមជាតិទាំងមូលផងដែរ៕
ដោយ៖កូឡាប
