ភ្នំពេញ៖ លោក នាយឧត្តមសេនីយ៍ ប៉ុល សារឿន អគ្គមេបញ្ជាការ នៃកងយោធពលខេមរភូមិន្ទ បានថ្លែងថា កងយោធពលខេមរភូមិន្ទ ត្រូវតែប្រឆាំង និងកម្ចាត់ចោលភ្លាមចំពោះចលនាសង្គ្រោះជាតិ ដែលមានបំណងបំផ្លិចបំផ្លាញសន្តិភាព និងសុខដុមរមនីយកម្មរបស់ប្រជាជនកម្ពុជា។
លោកថ្លែងបែបនេះ ក្នុងពិធីបូកសរុបលទ្ធផលការងារយោធាឆ្នាំ២០១៧ និងផ្សព្វផ្សាយផែនការ សកម្មភាពការងារយោធាឆ្នាំ២០១៨ របស់កងពលធំអន្តរាគមន៍លេខ២ នៅព្រឹកថ្ងៃទី២៧ ខែមករា ឆ្នាំ២០១៧នេះ។ លោកបានបន្ថែមថា កងយោធពលខេមរភូមិន្ទ គឺជាឧបករណ៍បម្រើរដ្ឋនិងប្រជាជន កើតចេញពីប្រជាជន មានតួនាទីភារកិច្ច ការពាររដ្ឋ ការពាររាជរដ្ឋាភិបាលស្របច្បាប់ ការពារសន្តិភាព និងសេចក្តីសុខរបស់ប្រជាជន ឱ្យបានគង់វង្ស ដើម្បីប្រមូលផ្តុំនូវសក្តានុពលទាំងឡាយ ក្នុងគោលដៅតែមួយគត់ គឺការអភិវឌ្ឍប្រទេសជាតិឱ្យកាន់តែរីកចម្រើនរុងរឿងថែមទៀត។ ប្រសិនបើចលនាសង្គ្រោះជាតិកើតមានឡើង នៅកម្ពុជាពេលណា នោះកងយោធពលខេមរភូមិន្ទ នឹងកម្ទេចចោល នៅពេលនោះភ្លាមៗតែម្តង។
កងយោធពលខេមរភូមិន្ទ បានប្តេជ្ញាចិត្តរួចជាស្រេចក្នុងការការពារបុព្វហេតុការថែរក្សាសន្តិភាព ស្ថិរភាព ពង្រឹងសន្តិភាព ហើយមិនអនុញ្ញាតជាដាច់ខាតឲ្យអ្វីដែលជាចលនានេះកើតឡើង នាំឲ្យប៉ះពាល់ដល់សន្តិភាពជាដដាច់ខាត៕ ដោយ៖បញ្ញាស័ក្តិ
