សោកនាដកម្ម យន្តហោះ Jeju Air ដែលបានរអិលចេញពីផ្លូវរត់ និងបានផ្ទុះឆេះ នៅអាកាសយានដ្ឋាន Muan ភាគនិរតីនៃប្រទេសកូរ៉េខាងត្បូង ដែលដំបូងឡើយ ត្រូវបានគេរាយការណ៍ថា សមាជិកនាវិកប្រុសស្រី២នាក់បានរួចជីវិត ខណៈអ្នកដំណើរ ១៧៥ នាក់ បានស្លាប់។
ក្នុងចំណោមនោះ មានជនជាតិថៃ ២ នាក់ បានស្លាប់៖ ជនរងគ្រោះទី១ឈ្មោះ Sirithon Cha-ue ឬហៅ “Nong Mei” អាយុ ២២ ឆ្នាំ ជានិស្សិតឆ្នាំទី៤ នៃសាកលវិទ្យាល័យបាងកក ដែលកំពុងធ្វើដំណើរទៅលេងម្តាយរបស់នាង នៅប្រទេសកូរ៉េខាងត្បូង និងជនរងគ្រោះជាស្រ្តីទី២.ឈ្មោះ Jonglak Duangmanee អាយុ ៤៥ ឆ្នាំ រស់នៅខេត្ត Udon Thani ដែលកំពុងធ្វើដំណើរទៅ ធ្វើការនៅកូរ៉េខាងត្បូង។
អ្នកស្រី Jonglak Duangmanee ត្រូវបានដឹងថា នាងទើបតែចំណាយពេល ទៅសម្រាកលំហែកាយ ជាមួយគ្រួសាររបស់នាង នៅក្នុងប្រទេសថៃ មុនពេលចាកចេញធ្វើការជាពលករ នៅក្នុងប្រទេសកូរ៉េខាងត្បូង។ ខណៈនិសិ្សតស្រី Nong Mei ក៏ត្រូវបានរកឃើញនាងបាន Check in ខណៈពេលដែលកំពុងធ្វើដំណើរនៅលើផ្លូវ Banthat Thong ទីក្រុងបាងកក។ ខណៈមហាជនជាច្រើនបានទៅចូលរួមរំលែកទុក្ខ និងបួងសួងសូមនាង ទៅកាន់ទីឋានសុគតិភព និងរួមទាំងសម្ដែងនូវការអាណិតអាសូរ ចំពោះកម្តាយរបស់នាង ដែលមករង់ចាំទទួលនាងនៅប្រទេសកូរ៉េខាងត្បូង។
លោក Boonchuay Duangmanee អាយុ ៧៧ ឆ្នាំ បាននិយាយអំពីការតក់ស្លុតនេះ និងសឹងតែមិនជឿសោះឡើយថា កូនស្រីរបស់គាត់ស្ថិតក្នុងចំណោមអ្នកដំណើរនៃជើងហោះហើរ Jeju Air ។ លោកបានបញ្ជាក់ថា ខណៈលោកបានឃើញហេតុការណ៍ស្រដៀងគ្នានេះតាមព័ត៌មាន លោកមិនដែលនឹកស្មានថា មានសោកនាដកម្មបែបនេះនឹងកើតឡើងចំពោះកូនរបស់លោកឡើយ។
Boonchuay បាននិយាយទាំងទឹកភ្នែកថា គាត់មានកូនបីនាក់ ដែលសុទ្ធតែធ្វើការនៅបរទេស រួមទាំង Jonglak ដែលជាកូនស្រីពៅរបស់គាត់។ នាងបានធ្វើការស្របច្បាប់ក្នុងប្រទេសកូរ៉េខាងត្បូង អស់រយៈពេលប្រហែល៧ឆ្នាំ ហើយនៅទីបំផុត នាងបានរៀបការជាមួយបុរសកូរ៉េខាងត្បូងម្នាក់។ Jonglak ធ្វើការនៅរោងចក្រមួយក្នុងទីក្រុង Naju ។
កូនស្រីរបស់គាត់នឹងមកលេងស្រុកកំណើតនៅ Udon Thani មួយឆ្នាំម្តង។ ឆ្នាំនេះនាងបាននាំប្តីទៅប្រទេសថៃ កាលពីដើមខែធ្នូ។ ក្រោយពីធ្វើដំណើរកម្សាន្តជាច្រើនថ្ងៃ នៅក្នុងប្រទេសថៃ នាងបានឲ្យប្តីទៅវិញមុន ហើយនាងនឹងវិលត្រឡប់ទៅកូរ៉េខាងត្បូងវិញនៅថ្ងៃទី២៩ ខែធ្នូ ដែលជាថ្ងៃសោកនាដកម្មដ៏រន្ធត់នេះតែម្តង៕
