ខេត្តស្វាយរៀង: នៅព្រឹកថ្ងៃទី១៧ ខែមិថុនា ឆ្នាំ២០២០ មន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តស្វាយរៀង សហការជាមួយសមាគមអតីតយុទ្ធជនកម្ពុជាខេត្តស្វាយរៀង បានរៀបចំប្រារព្ធខួបលើកទី១៣ ទិវាអតីតយុទ្ធជនកម្ពុជា ២១ មិថុនា ២០០៧ – ២១ មិថុនា ២០២០ ក្រោមអធិបតីភាពលោក ម៉ែន វិបុល អភិបាល នៃគណៈអភិបាលខេត្ត និងជាប្រធានកិត្តិយស ស.អ.ក ខេត្តស្វាយរៀង។
មានប្រសាសន៍នៅក្នុងឱកាសនោះលោកអភិបាលខេត្ត បានសម្ដែងនូវការអរគុណចំពោះមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត និងសមាគមអតីតយុទ្ធជនកម្ពុជាខេត្ត ដែលបានសហការរៀបចំពិធី នេះឡើង ស្របតាមការណែនាំរបស់រាជរដ្ឋាភិបាល ជាការរួមចំណែកក្នុងការរំលឹកដល់គំរូវីរភាពដ៏មោះមុត និងគុណបំណាច់ដ៏ធំធេងរបស់អតីតយុទ្ធជនទាំងអស់ដែលបានពលិកម្មយ៉ាងអង់អាចក្លាហានកាលពីអតីតកាល ដើម្បីបុព្វហេតុជាតិមាតុភូមិមានសុខសន្តិភាព និងការអភិវឌ្ឍ។
លោកអភិបាល ខេត្តក៏បានអំពាវនាវ ដល់បងប្អូនអតីតយុទ្ធជន និងគ្រួសារអតីតយុទ្ធជនយើងទាំងអស់ គឺ ត្រូវថែរក្សាសុខភាពអនាម័យខ្លួនប្រាណ លាងដៃ ជាមួយសាប៊ូ អាល់កុល ឬជែល គ្រប់ពេលវេលា ដើម្បីបញ្ចៀសឲ្យបាននូវការឆ្លងរីករាលដាលនៃជំងឺកូវីដ-១៩ ។ បន្តចូលរួមថែរក្សា ការពារនូវសុខសន្តិភាព និងការអភិវឌ្ឍដែលរកបានដោយលំបាករបស់ សម្ដេចប្រមុខរាជរដ្ឋាភិបាល និងកំពុងមានសព្វថ្ងៃឲ្យបានគង់វង្សជារៀងដរាប។ ចូលរួមឲ្យបានគ្រប់សកម្មភាពនៅឯមូលដ្ឋាន ពិសេសគឺចលនា ភូមិ ឃុំ មានសុវត្ថិភាព ដើម្បីបង្កលក្ខណៈរស់នៅប្រកបដោយសុខុដុមរមនាក្នុងមូលដ្ឋានរបស់យើង។ សូមជួយអប់រំណែនាំកូនចៅចៀសឲ្យឆ្ងាយពីគ្រឿងញៀន និងចូលរួមគោរពច្បាប់ចរាចរណ៍ទាំងអស់គ្នា ។ សូមមានការប្រុងប្រយ័ត្នចំពោះគ្រោះធម្មជាតិផ្សេងៗជាពិសេសរន្ទះ និងខ្យល់កន្ត្រាក់ជាដើម។
ដោយឡែក អង្គភាពពាក់ព័ន្ធ អាជ្ញាធរដែនដី និងសមាគមអតីតយុទ្ធជនកម្ពុជាគ្រប់លំដាប់ថ្នាក់ក្នុងខេត្ត ត្រូវបន្តបង្កើនសកម្មភាពក្នុងការជួយឧបត្ថម្ភ គាំទ្រដល់បងប្អូនអតីតយុទ្ធជន និងគ្រួសារអតីតយុទ្ធជនរបស់យើង ជាពិសេសនៅពេលមានតម្រូវការ និងបញ្ហាដែលត្រូវជួយដោះស្រាយ ជាក់ស្ដែងក្នុងអំឡុងពេលនៃការរីករាលដាល នៃជំងឺកូវីដ-១៩ ដែលបងប្អូនអតីតយុទ្ធជនដែលរងប៉ះពាល់ ដល់ជីវភាពរស់នៅប្រចាំថ្ងៃ ៕
ដោយ៖វ៉ៃកូ
