ភ្នំពេញ÷ រថយន្តដឹកត្រីមួយគ្រឿងត្រូវរថយន្តប្រភេទកុងតឺន័រវ៉ាជែងទៅប៉ះពេញទំហឹង បណ្តាលឲ្យរថយន្តដឹងត្រីដាច់កាឡេទៅធ្លាក់ប្រឡាយបណ្តាលឲ្យក្រឡាប់ផ្ងារជើង។
ហេតុការណ៍នេះកើតឡើងនៅវេលាម៉ោង ៥ និ០០ នាទីថ្ងៃអង្គារ ទី៧ ខែកក្កដា ឆ្នាំ២០២០ នៅតាមបណ្តោយផ្លូវមហាវិថីវិមានឈ្នះៗ ស្ថិតនៅក្នុងសង្កាត់គោករការ ខណ្ឌព្រែកព្នៅ រាជធានីភ្នំពេញ។
បើយោងតាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុគេឃើញរថយន្តដឹកត្រីមួយគ្រឿង ដែលពាក់ផ្លាកលេខ ភ្នំពេញ 3E 77 04 ធ្វើដំណើរក្នុងទិសដៅពីត្បូង មកជើង លុះមកជិតដល់ចំណុចកើតហេតុត្រូវបានរថយន្តកុងតឺន័រមួយគ្រឿងទៀត ធ្វើដំណើរវ៉ាជែងពីក្រោយ
រួចទៅប៉ះរថយន្តដឹកត្រីពេញទំហឹងបណ្តាលឲ្យរថយន្តដឹកត្រីបួងចង្កូត ធ្លាក់ប្រឡាយក្រឡាប់ផ្ងារជើង ។
ហេតុការណ៍គ្រោះថ្នាក់ខាងលើនេះ មិនបណ្តាលឲ្យរងរបួសតៃកុង ឬបងប្អូនប្រជាពលរដ្ឋដែលធ្វើដំណើជិតនោះទេ គឺរងការខូចខាតតែរថយន្ត និងខូចខាតត្រីអស់ចំនួន ៥ តោន។
ក្រោយពេលកើតហេតុសមត្ថកិច្ចមូលដ្ឋាន ចុះមកដល់រួចទាក់ទងទៅខាងជំនាញចរាចរណ៍ផ្លូវគោក ចុះមកពិនិត្យឃើញថា មិនមានប៉ះពាល់ដល់ទ្រព្យសម្បត្តិរដ្ឋទេ ហើយក៏ឲ្យម្ចាស់រថយន្តដឹកត្រី ឲ្យរថយន្តស្ទូចយកទៅជួសជុលដោយខ្លួនឯង។
រីឯរថយន្តបង្កសមត្ថកិច្ចនិងស្រាវជ្រាវដើម្បីយកមកចាត់ការបន្តទៅតាមផ្លូវច្បាប់៕ដោយ៖ សាមេត
