ប្រទេសវៀតណាមនឹងធ្វើការជម្លៀសប្រជាជនចំនួន ៨០.០០០នាក់ ដែលភាគច្រើនជាអ្នកទេសចរក្នុងស្រុក ចេញពីទីក្រុងដាណាង (Danang) ក្រោយប្រជាជន ៣នាក់ត្រូវបានគេធ្វើតេស្តមានផ្ទុកវីរុសកូរ៉ូណា កាលពីចុងសប្តាហ៍។ នេះបើតាមការបញ្ជាក់របស់រដ្ឋាភិបាលវៀតណាមនៅថ្ងៃចន្ទនេះ។
ការជន្លៀសនឹងត្រូវប្រើរយៈពេល ៤ថ្ងៃ ដោយប្រើប្រាស់ជើងហោះហើរក្នុងស្រុកប្រហែល ១០០ដងក្នុងមួយថ្ងៃពីទីក្រុងដាណាង ទៅកាន់ទីក្រុងចំនួន ១១របស់វៀតណាម។
ប្រទេសវៀតណាមចាប់ផ្តើមបង្កើនការប្រុងប្រយ័ត្នឡើងវិញចំពោះវីរុសកូរ៉ូណា កាលពីចុងសប្តាហ៍ ក្រោយមានការរកឃើញករណីឆ្លងវីរុសក្នុងមូលដ្ឋានជាលើកដំបូង នៅក្នុងរយៈពេល ៣ខែចុងក្រោយនេះ។
ដោយសារតែមានវិធានការដាក់មនុស្សឲ្យនៅដោយឡែកដ៏តឹងរ៉ឹង និងកម្មវិធីធ្វើតេស្តដ៏ទូលំទូលាយ ប្រទេសវៀតណាមបានទប់ស្កាត់ការរីករាលដាលយ៉ាងមានប្រសិទ្ធភាព ដោយរក្សាការឆ្លងមកកម្រិតទាប ដោយមានអ្នកឆ្លងសរុបត្រឹមតែ ៤១៥នាក់ ហើយប្រទេសនេះមិនមានការឆ្លងក្នុងមូលដ្ឋានរយៈពេល ១០០ថ្ងៃចុងក្រោយ។
មិនមានអ្នកជំងឺណាម្នាក់ឡើយស្លាប់ដោយសារវីរុសកូរ៉ូណា។
សូមបញ្ជាក់វា វីរុសកូរ៉ូណា ដែលមានឈ្មោះផ្លូវការថា COVID-19 បានផ្ទុះចេញដំបូងពីទីក្រុងវូហាន ប្រទេសចិន កាលពីចុងឆ្នាំ ២០១៩ និងបានរីករាលដាលយ៉ាងលឿនទៅកាន់ជុំវិញពិភពលោក។
បើតាមតួលេខចុងក្រោយ វីរុសនេះបានផ្តាច់ជីវិតមនុស្សជាង ៦៤០.០០០នាក់ និងឆ្លងទៅកាន់មនុស្សជិត ១៦,២លាននាក់ទូទាំងពិភពលោក៕
អត្ថបទប្រែសម្រួលដោយ៖ សុភ័ក្រ
ប្រភព៖ Reuters
