ទីក្រុងហុងកុងបានប្រកាសវិធានការ រឹតបន្តឹងបន្ថែមនៅថ្ងៃចន្ទនេះ ដើម្បីទប់ស្កាត់ការកើនឡើងនៃវីរុសកូរ៉ូណា ដោយធ្វើការហាមប្រាមការបរិភោគអាហារទាំងអស់ នៅក្នុងភោជនីយដ្ឋាន និងការតម្រូវឲ្យពាស់ម៉ាសពេលចេញមកខាងក្រៅ។
បើតាមប្រព័ន្ធផ្សព្វផ្សាយបានឲ្យដឹងថា វិធានការបន្ថែមនឹងត្រូវអនុវត្តចាប់ពីថ្ងៃពុធតទៅ ខណៈដែលអាជ្ញាធរព្រមានថា វាគឺជារយៈពេលដ៏សំខាន់មួយក្នុងការគ្រប់គ្រងវីរុស។
នេះអាចជាលើកដំបូងហើយ ដែលទីក្រុងហុងកុងធ្វើការហាមឃាត់ ការបរិភោគអាហារទាំងស្រុងនៅក្នុងភោជនីយដ្ឋាន។ វាគឺជាការអនុវត្តវិធានការបន្ថែមកាលពីសប្តាហ៍មុន ដើម្បីទប់ស្កាត់ការរីករាលដាលនៃវីរុស។
វិធានការរបស់អាជ្ញាធរកាលពីសប្តាហ៍មុន បានហាមឃាត់ការបរិភោគអាហារក្នុងភោជនីយដ្ឋានក្រោយម៉ោង ៦ល្ងាច និងបន្តធ្វើការបិទកន្លែង ១២ប្រភេទ ដូចជា កន្លែងហាត់ប្រាណ និងមជ្ឈមណ្ឌលកម្សាន្តជាដើម រហូតដល់ថ្ងៃទី ២៨ ខែកក្កដា។
សេចក្តីប្រកាសក៏បានបង្គាប់ឲ្យមានការពាក់ម៉ាសនៅទីសាធារណៈ រួមមាននៅផ្សារទំនើបជាដើមរយៈពេល ២សប្តាហ៍ ចាប់ពីថ្ងៃទី ២២ ខែកក្កដាមក។
រដ្ឋមន្ត្រីក្រសួងសុខាភិបាលហុងកុង អ្នកស្រី Sophia Chan បាននិយាយថា “នេះជាពេលវេលាដ៏សំខាន់បំផុតសម្រាប់ហុងកុង។ យើងសូមឲ្យប្រជាជនទាំងអស់មានការអត់ធ្មត់ និងស្នាក់នៅផ្ទះឲ្យបានច្រើនតាមតែអាចធ្វើបាន”។
សូមបញ្ជាក់ថា ចាប់តាំងពីចុងខែមករាមក មនុស្សជាង ២.៦០០នាក់បានឆ្លងវីរុសកូរ៉ូណានៅក្នុងទីក្រុងហុងកុង ដោយក្នុងនោះមាន ១៩នាក់ស្លាប់។
ហុងកុងមានប្រជាជនសរុបទាំងអស់ជិត ៧,៥លាននាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ CNA
