ភ្នំពេញ ៖ សម្តេចតេជោ ហ៊ុន សែន ថ្លែងហៅ លោកសម រង្ស៊ី ថាជាភេរវករ ។ សម្តេចតេជោ បានបញ្ជាក់ថា “ប្រសិនបើអ្នកឯងតាំងខ្លួនជាភេរវករហើយ ខ្ញុំត្រូវតាមចាប់ឲ្យបាន ហើយកុំឱ្យមកកាន់តំបន់អាស៊ីឱ្យសោះ បើមិនដូច្នោះទេ នឹងត្រូវចាប់ខ្លួនឱ្យទាល់តែបាន ដោយសារតែរូបគេបានប្រកាសខ្លួនជាមេភេរវករទៅហើយ ជនភេរវករកម្ពុជា យើងអាចសហការជាមួយបរទេស ដើម្បីឈានដល់ការចាប់ខ្លួនបាន”។
នៅព្រឹកថ្ងៃទី១ ខែកុម្ភៈ ឆ្នាំ២០១៨នេះ ក្នុងពិធីចែកសញ្ញាបត្រ និងសម្ពោធអគារទេព្យកោសល្យវិស្វកម្ម នៅវិទ្យាស្ថានបច្ចេកវិទ្យាកម្ពុជា សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងថា លោក សម រង្ស៊ី នៅពេលនេះ គឺជាមេភេរវកម្មដ៏ធំមួយ ដែលមានចេតនាបង្កអសន្តិសុខ ដល់ប្រទេសកម្ពុជា។
សម្តេចតេជោ បានមានប្រសាសន៍ថា “អ្នកខ្លះ អាអ្នករត់ចោលស្រុកនឹងថា សម្ពាធៗៗ អញ្ជើញមកសម្ពាធ វាត្រូវក្បាលហ៊ុន សែនហើយ។ សម្ពាធតិចប៉ះលើខ្លួនឯង ហើយខ្ញុំសូមផ្តាំកុំមកអាស៊ីឱ្យសោះ សូមកុំមកក្បែរអាស៊ី បើអ្នកឯងតាំងខ្លួនជាភេរវករហើយ ខ្ញុំនឹងតាមយកអ្នកឯងទាល់តែបាន ឥឡូវនេះគេកំពុងប្រកាសខ្លួនជាមេភេរវករហើយ មិនមែនត្រឹមតែជាអង្គការក្រៅច្បាប់ ប៉ុន្តែជាភេរវករតែម្តង ជាអង្គការភេរវកម្ម សូមអញ្ជើញចុះ”។ “ខ្ញុំគ្រាន់តែប្រាប់ទេ អ្នកឯងគួរតែកុំបង្ខំ ឱ្យគេវ៉ៃដែកគោលទៅលើក្តាមមជ្ឈូសរបស់អ្នកឯងថែមទៀត កុំសង្ឃឹមឱ្យសោះបើនៅក្នុងដៃតុលាការវាជារឿងមួយ ប៉ុន្តែបើចូលក្នុងកម្រិតអបគមន៍ហើយ សូម្បីតែ BM21 ក៏គេហ៊ានវ៉ៃចូលទៅកន្លែងនឹងដែរ គេមិនអាចឱ្យប្រទេសនេះ មានអបគមន៍ សាជាថ្មីទេ សុំទោស”។ “ខ្ញុំអត់និយាយទេ ប៉ុន្មានថ្ងៃនេះ ប៉ុន្តែចលនាឯណា សូមអញ្ជើញចុះ អញ្ជើញមកហើយមកខ្លួនឯងគឺល្អបំផុតហើយ។ អត់អីទេ ហ៊ុន សែន បើទោះបីជាមិនកាន់ទ័ពផ្ទាល់ក៏ដោយ ក៏ប៉ុន្តែបញ្ជាកម្លាំងប្រដាប់អាវុធទាំងអស់ ក្នុងក្របខ័ណ្ឌជាអនុប្រធានឧត្តមក្រុមប្រឹក្សាការពារជាតិ ដូច្នេះអ្នកត្រូវយល់ថា មេទ័ពមួយនេះ គឺមិនមែនជាមេទ័ពទន់ជ្រាយទេ”។ “នៅចាំទេ មានមួយនោះគេហៅអាឆ្កែ កាលពីជំនាន់សតវត្សរ៍ទី២០ ឥឡូវដល់សតវត្សរ៍ទី២១ កូនអាមនុស្សដដែលនឹងគេហៅអាឆ្កែទៀត”៕ ដោយ៖បញ្ញាស័ក្តិ
