ភ្នំពេញ៖ សហព័ន្ធកីឡាគុនល្បុក្កតោកម្ពុជា និងកងយោធពលខេមរភូមិន្ទ បានធ្វើកិច្ចសហការគ្នាប្រមាណ៤ឆ្នាំមកហើយ ដើម្បីបញ្ជ្រាបគុនល្បុក្កតោ ដែលក្បាច់គុនអត្តសញ្ញាណជាតិ ព្រលឹងជាតិខ្មែរឲ្យទៅជាក្បាច់គុនកងទ័ព ជាពិសេស ក៏កំពុងខិតខំអភិវឌ្ឍវិស័យកីឡាគុនល្បុក្កតោទៅកាន់ ស្រទាប់កុមារ យុវជន និងមហាជននានា។
ពិធីបិទវគ្គហ្វឹកហ្វឺនអន្តរាគមន៍ពិសេសក្បាច់គុនកងយោធពលខេមរភូមិន្ទ និងបើកវគ្គបំប៉នជំនាញស៊ើបការណ៍ ប្រដាប់អាវុធរបស់កងពលតូចថ្មើរជើងលេខ៥១ ស្ថិតនៅស្រុកព្រះនេត្រព្រះ ខេត្តបន្ទាយមានជ័យ ត្រូវបានប្រារព្ធធ្វើឡើងកាលពីថ្ងៃទី៦ ខែសីហា ឆ្នាំ២០២០ ដោយមានសិក្ខាកាមជិត១០០នាក់ ក្រោមអធិបតីឯកឧត្តម ឧត្តមសេនីយ៍ឯក ឯក សំអូន មេបញ្ជាការរងកងទ័ពជើគោក និងជាមេបញ្ជាការយោធភូមិភាគ៥។
លោក អ៊ួ តារា អគ្គលេខាធិការសហព័ន្ធកីឡាគុនល្បុក្កតោកម្ពុជា បានថ្លែងថា ការចូលរួមចំណែកក្នុងការអភិវឌ្ឍវិស័យការពារជាតិផ្នែកក្បាច់គុន ដោយបានចូលរួមក្នុងការដំណើរការរៀបចំចងក្រងឯកសារ សៀវភៅក្បាច់គុន កងយោធពលខេមរភូមិន្ទ ហើយបាននឹងកំពុងរៀបចំជាឯកសារវីដេអូ សម្រាប់បង្កភាពងាយស្រួល ក្នុងការផ្ទេរនូវជំនាញក្បាច់គុនក្នុងជួរកងកម្លាំងប្រដាប់អាវុធ និងបណ្តុះបណ្តាលយោធាចារ្យក្បាច់គុន សម្រាប់បំពេញតម្រូវការរបស់អង្គភាពកងកម្លាំងនានា ដែលរៀបចំវគ្គបណ្តុះបណ្តាលក្បាច់គុនកងយោធពលខមរភូមិន្ទ។
អគ្គលេខាធិការរូបនេះបានលើកឡើងថា សហព័ន្ធកីឡាគុនល្បុក្កតោកម្ពុជា និងកងយោធពលខេមរភូមិន្ទ បានធ្វើកិច្ចសហការគ្នាប្រមាណ៤ឆ្នាំមកហើយ ដើម្បីបញ្ជ្រាបគុនល្បុក្កតោ ដែលក្បាច់គុនអត្តសញ្ញាណជាតិ ព្រលឹងជាតិខ្មែរឲ្យទៅជាក្បាច់គុនកងទ័ព ក្នុងពេលដំណាលគ្នានេះដែរ ក៏កំពុងខិតខំអភិវឌ្ឍវិស័យកីឡាគុនល្បុក្កតោទៅកាន់ ស្រទាប់កុមារ យុវជន និងមហាជននានា ដែលជាយុទ្ធសាស្ត្រដ៏ធំរបស់ខ្លួនក្នុងគោលដៅចម្បងៗចំនួន២ ដែលទី១ គឺកំពុងជំរុញបន្ថែមឲ្យក្បាច់គុនព្រលឹងជាតិមួយនេះទទួលបានជោគជ័យនៃការដាក់បញ្ជូលជាសម្បត្តិបេតិកភណ្ឌអរូបី នៃមនុស្សជាតិ ដែលបានដាក់ការស្នើសុំរួចហើយនៅអង្គការយូណេស្កូ ដោយរង់ចាំការប្រកាសលទ្ធផល នាពេលខាងមុខ។ ទី២-ការបញ្ជ្រាបក្បាច់គុននេះ គឺជាយុទ្ធសាស្ត្រចម្បង ក្នុងដំណើរឆ្ពោះទៅទទួលរៀបចំធ្វើជាម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣ ប្រកបដោយភាពជឿជាក់ និងក្តីសង្ឃឹមបំផុត ដោយក្រុមទី១ គឺរំពឹងលើក្រុមកីឡាករ កីឡាការិនីជម្រើសជាតិ និងក្រុមទី២រំពឹងលើក្រុមយោធា ដែលអាចជាកីឡាករមានទេពកោលស្យត្រៀមចូលរួមប្រកួតស៊ីហ្គេមបាន តាមរយៈការប្រកួតជម្រុះជាដើម។ ដូច្នេះហើយទើបសហព័ន្ធកីឡាគុនល្បុក្កតោកម្ពុជាកំពុងខិតខំ បញ្ជ្រាបការហ្វឹកហាត់ ការបណ្តុះបណ្តាលកាន់តែសម្បូរបែប ដើម្បីឲ្យសហព័ន្ធមានជម្រើសកាន់តែច្រើន ក្នុងការជ្រើសរើសអត្តពលិកប្រកបដោយសក្តានុពល ដណ្តើមបាននូវភាពជោគជ័យជាប្រវត្តិសាស្ត្រ ក្នុងឋានៈជាម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣៕
ដោយ៖បញ្ញាស័ក្តិ
