នេះជាខណៈពេលដ៏មហាស្លុតរន្ធត់បំផុតមួយ ដែលបង្ហាញឲ្ឃើញបុរសម្នាក់ បានរួចផុតពីអាយុជីវិតដ៏មិននឹកស្មានដល់ ពីរថយន្តដឹកទំនិញធុនតូច១គ្រឿង ដែលបើកបរលឿនដូចហោះ ខ្វះការប្រុងប្រយ័ត្ន។ ហើយករណីដ៏ហួសចិត្តនេះផងដែរ ត្រូវបានគេចាត់ទុកថា គឺជាសំណាងមួយក្នុង១ម៉ឺនគ្រោះថ្នាក់។
តាមរយៈវីដេអូឃ្លីប បានបង្ហាញឲ្យឃើញបុរសម្នាក់ស្ថិតក្នុងសម្លៀកបំពាក់អាវក្រណាត់សដៃវែង ស្លៀកសារ៉ុង កន្សែងបង់ក ដៃកាន់ឈើ ប្រៀបដូចតាអាចារ្យ ដើរនៅលើចិញ្ចើមផ្លូវជាតិយ៉ាងសង្ហារ។ ប៉ុន្តែ រំពេចភ្លាមៗនោះ ស្រាប់តែរថយន្តដឹកទំនិញ១គ្រឿង ប្រហែលតៃកុងវាក់មួយភាំង បានបើកចូលមកគេចគាត់ខាងស្តាំដៃផុតប៉ុន្មានចុងស្រូវប៉ុណ្ណោះ ហើយបន្តបោះពួយយ៉ាងលឿនទីណាត់ទីណែង ទៅបុកនឹងបង្គោលឈើ១ដើមនៅខាងមុខយ៉ាងសាហាវ។ ទោះយ៉ាងណា រថយន្តនេះពុំបានឈប់នោះទេ ដោយនៅតែបន្តបោះពួយទៅមុខទៀត។
ចំពោះហេតុការណ៍ដ៏ញាក់សាច់នេះផងដែរ គេពុំបានដឹងថា បានកើតឡើងនៅក្នុងទីកន្លែងណានោះទេ ដោយវីដេអូនេះត្រូវបានអ្នកលេងហ្វេសប៊ុកចែករំលែកតៗគ្នា ដើម្បីទស្សនាប៉ុណ្ណោះ៕ ដោយ៖ លឹម ហុង
