ភ្នំពេញ៖មិនបាច់រៀបរាប់ច្រើនក៏បងប្អូនប្រិយមិត្តស្គាល់ច្បាស់រួចហើយដែរថា ឱក សុគន្ធកញ្ញា គឺជាតារាចម្រៀងមួយរូបប្រចាំផលិតកម្ម ហង្សមាស ដែលមានកេរ្តិ៍ឈ្មោះល្បីតាំងនៅវ័យកុមារមកម្ល៉េះ និងត្រូវបានចាត់ទុកថាជាកំពូលតារាចម្រៀងស្រីលំដាប់ជួរមុខ ទទួលបានប្រជាប្រិយភាពខ្លាំងលើសតារាស្រីនានានៅក្នុងប្រទេស ដោយសារតែមានទឹកដមសំឡេងពីរោះអាចច្រៀងបានគ្រប់ទម្រង់បទចម្រៀង និងទេពកោសល្យសិល្បៈជាច្រើនទៀត និងព្រមទាំងមានរូបសម្រស់ស្រស់ស្អាតផងដែរ។
បច្ចុប្បន្ននេះ គេសង្កេតឃើញថា ឱក សុគន្ធកញ្ញា ហាក់មានជីវិតគ្រួសារដ៏មានសុភមង្គលខ្លាំង បន្ទាប់ពីបានសាងគ្រួសារ ទទួលបានកូនប្រុសជាទីស្រឡាញ់ម្នាក់ដែលមានឈ្មោះថា អ៊ឹង បញ្ចបុត្រ ឬ ហៅថា (អូនជូលី) ហើយបើគិតមកទល់ពេលនេះ កូនប្រុសរបស់អ្នកនាងមានអាយុជិត១ខួបហើយ ដែលមានសាច់ឈាមធំធាត់ទ្រលក់ទ្រលន់គួរឲ្យខ្នាញ់ខ្លាំងណាស់។
ពិតមែនហើយ ឱក សុគន្ធកញ្ញា កំពុងសាងជីវិតគ្រួសារតូចមួយនេះដ៏រីករាយនាពេលនេះ ត្រូវបានគេមើលឃើញថា តារាស្រីរូបនេះហាក់កំពុងជោគជ័យទាំងព្រមមិនថាជីវិតការងារទាំងក្នុង និងក្រៅសិល្បៈនោះទេ ពោលគឺដើរទន្ទឹមគ្នាល្អណាស់ ដែលតារាស្រីរូបនេះតែងតែបង្ហោះនូវរូបភាពផ្អែមល្ហែមក្នុងគ្រួសារ តាមរយៈបណ្តាញសង្គមជារឿយៗ ដែលធ្វើឲ្យមហាជនលាន់មាត់សរសើរពុំដាច់ពីមាត់នោះទេ។
ជាក់ស្តែង ថ្មីៗនេះ កំពូលតារាចម្រៀងស្រីស្ថិតនៅលំដាប់ជួរមុខរូបនេះ បានបញ្ចេញរូបថតប៉ុន្មានសន្លឹក នាំគ្រួសារដ៏តូចរបស់អ្នកនាងទៅវត្ត ក្នុងថ្ងៃដាក់បិណ្ឌទី១ នៃ រដូវកាលបុណ្យភ្ជុំបិណ្ឌ ឆ្នាំ ២០២០ ដែលមើលទៅពិតជា ស្រស់ស្រាយ និងមានសុភមង្គលខ្លាំងមែនទែន។
នៅលើគណនីហ្វេសប៊ុកផ្ទាល់របស់ខ្លួន នៅថ្ងៃទី៣ ខែកញ្ញា ឆ្នាំ២០២០ ឱក សុគន្ធកញ្ញា បានបង្ហោះរូបភាព ៦ សន្លឹក ភ្ជាប់នឹងសារសរសេរថា៖ «អរុណសួរស្ដី ពុកម៉ែ បងប្អូន ព្រឹកនេះ ត្រៀមចេញដំណើរ ទៅ ដាក់បិណ្ឌជុំគ្នា ។ សូមអនុមោទនាបិណ្ឌ១»៕ ដោយ៖ លឹម ហុង
