បន្ទាយមានជ័យ ៖ ក្រុមឆ្លើយតប បន្ទាន់(RRT) មន្ទីរសុខាភិបាលខេត្តបន្ទាយមានជ័យ បន្តនិងបង្កើនការចុះអន្តរាគមន៍ស្រាវជ្រាវ ដាក់ថ្នាំអាបែត បាញ់ថ្នាំអប់រំផ្សព្វផ្សាយ និងការលុបបំបាត់ជម្រកមូសខ្លា ការពារជំងឺ គ្រុនឈីក និងគ្រុនឈាមនៅភូមិនានាក្នុងឃុំអូរប្រាសាទស្រុកមង្គលបូរី ពោលគឺជាតំបន់ដែលបានផ្ទុះឡើងថ្មីនូវជម្ងឺគ្រុនឈីកកាលពីថ្ងៃទី៧ខែកញ្ញាឆ្នាំ២០២០កន្លងមក ។ នេះបើយោង លោករឿន សុធី ប្រធានការិយាល័យប្រយុទ្ធនឹងជំងឺឆ្លងនៃមន្ទីរសុខាភិបាលខេត្តបន្ទាយមានជ័យឲ្យដឹងកាលពីថ្ងៃទី១៤ខែកញ្ញា។
លោកបានបន្តថា ៖ ការគ្រប់គ្រង់បានស្ថានភាពនៃការផ្ទុះជំងឺគ្រុនឈីកនៅ៥ភូមិនៃឃុំអូរប្រាសាទបានទាំងស្រុងហើយ តែមន្ត្រីជំនាញបន្តអប់រំផ្សព្វផ្សាយ បង្ការទប់ស្កាត់ឱ្យបាត់ទាំងស្រុង ។
ស្រដៀងគ្នានោះដែរ លោកវេជ្ជបណ្ឌិត ឡេ ច័ន្ទសង្វាត ប្រធានមន្ទីរសុខាភិបាលខេត្តបន្ទាយមានជ័យឲ្យដឹងថា ៖ មន្ទីរសូមអរគុណយុទ្ធមិត្តសុខាភិបាលទាំងអស់ ដែលបានលះបង់កម្លាំងកាយចិត្ត ស្មារតីមិនចេះនឿយហត់ ក្នុងបុព្វហេតុថែរក្សាការពារសុខភាពភាពប្រជាពលរដ្ឋយើង ។
ជាមួយគ្នានោះដែរ ចំពោះបងប្អូនប្រជាពលរដ្ឋ មន្ទីរសូមបងប្អូនមានការប្រុងប្រយ័ត្ន ចំពោះជំងឺគ្រុនឈីក (Chikunngunya) ដែលបានផ្ទុះកើតឡើងក្នុងភូមិអូរស្ងួត ឃុំអូរប្រាសាទ ស្រុកមង្គលបូរី នៅថ្ងៃទី៧ ខែកញ្ញា ឆ្នាំ២០២០។
សូមរំលឹកថា តាមលទ្ធផលមន្ទីរពិសោធន៍ វិទ្យាស្ថានប៉ាស្ទ័របានរកឃើញ វិជ្ជមានមេរោគគ្រុនឈីកចំនួន ១៧នាក់ ក្នុងចំណោម ២៤នាក់នៃវត្ថុសំណាកដែលបានធ្វើការវិភាគ។
ក្រុមការងារឆ្លើយតបបន្ទាន់(RRT) មន្ទីរសុខាភិបាលខេត្ត បានចុះអន្តរាគមន៍ ជាបន្ទាន់រួមមាន: ការចុះស្រាវជ្រាវ ការបញ្ជូនអ្នកជំងឺមកព្យាបាលនៅមន្ទីរពេទ្យខេត្តមិត្តភាពកម្ពុជា -ជប៉ុនមង្គលបូរី ការចុះអប់រំសុខភាពដោយផ្ទាល់ដល់ប្រជាពលរដ្ឋក្នុងភូមិ ការចាក់ផ្សាយសារអប់រំសុខភាពតាមមេក្រូ ការចងបដា ការចុះដាក់ថ្នាំអាបែត និងការបាញ់ថ្នាំសម្លាប់មូសខ្លាជាដើម។
មន្ទីរសុខាភិបាលខេត្ត សូមអំពាវ ឲ្យបងប្អូនប្រជាពលរដ្ឋ ចូលរួមសហការ អនុវត្តន៍តាមការណែនាំរបស់ក្រសួងសុខាភិបាល ដូចជាសម្អាតបរិស្ថានជុំវិញផ្ទះសម្បែង លុបបំបាត់ជម្រកមូសខ្លា ដាក់ថ្នាំអាបែតក្នុងពាងទឹក គេងក្នុងមុង ។ល។
បើសិនមានការសង្ស័យ ក្តៅខ្លួន ចេញកន្ទួលលើស្បែក ឈឺសន្លាក់ដៃជើង វិលមុខ ក្អួតចង្អោរ ត្រូវមកពិគ្រោះ និងពិនិត្យព្យាបាល នៅមណ្ឌលសុខភាព /មន្ទីរពេទ្យឲ្យបានទាន់ពេលវេលា ឬផ្តល់ព័ត៌មានជូនដល់អាជ្ញាធរមូលដ្ឋានដើម្បីឲ្យមានការអន្តរាគមន៍ជាបន្ទាន់ ៕ ដោយ ៖ បន្ទាយ
