តាកែវ៖គិតត្រឹមម៉ោង ២១និង៣០នាទី នៅថ្ងៃទី១៧ ខែកញ្ញា ឆ្នាំ២០២០ អគ្គិភ័យឆេះផ្សារសំរោងយ៉ោង បានរលត់ទៅវិញហើយគ្រប់គ្រងបាន១០០ភាគរយ ដោយ
អន្តរាគមន៍ពីខាងរថយន្តពន្លត់អគ្គិភ័យចំនួន២៣គ្រឿង តាមបណ្តាលស្រុក អង្គភាព ក្រុមហ៊ុនឯកជន។
បន្ទាប់ពីហេតុការណ៍អគ្គីភ័យនោះបានកើតឡើងភ្លាម ក៏មានការបញ្ជាដឹកនាំពីផ្ទាល់ ឯកឧត្តម អ៊ូច ភា អភិបាលខេត្តតាកែវ និងលោកឧត្តមសេនីយ៍ទោ សុខ សំណាង ស្នងការនគរបាលខេត្ត លោក ភួន ឈីម អភិបាលស្រុកបាទី និងក្រុមពន្លត់អគ្គីភ័យ ជាច្រើនអង្គភាព រួមជាមួយនិងបងប្អូនប្រជាពលរដ្ឋបានរួមគ្នាជួយបញ្ជាចរាចរណ៍ឲ្យឡានទឹក និងជួយពន្លត់ភ្លើងឆេះផ្សារសំរោងយ៉ោងនេះបាន ក្រោយកើតហេតុជិត ៣ម៉ោង ។
បើតាមការឲ្យដឹងពីប្រជាពលរដ្ឋនៅក្បែរផ្សារ បាននិយាយថាមូលហេតុ នៃការឆាបឆេះនេះ គឺបណ្តាលមកពីផ្ទុះហ្គាស ។
ហើយមកទល់ព្រឹកថ្ងៃទី ១៨ ខែកញ្ញា ឆ្នាំ២០២០នេះ យើងសង្កេតឃើញថា បងប្អូនប្រជាពលរដ្ឋដែលជាម្ចាស់តូបបានមកមើលតូបរបស់ខ្លួន ស្វែងរករបស់របរខ្លះៗដែលសល់ពីការឆេះកាលពីយប់មិញ ។
សូមបញ្ជាក់ផងដែរថា ចំពោះអគ្គិភ័យឆាបឆេះផ្សារសំរោងយ៉ោងកាលយប់មិញនេះ គឺឆេះសឹងតែ ៩០%ហើយ ខណៈដែរផ្សារសំរោងយោងនេះមាន តបលក់ដូរសរុប ជិត២៩០តូប ហើយក្នុងនោះមានជាង ២៣០តូបត្រូវបានអគ្គិភ័យឆាបឆេះ នេះបើតាមការឲ្យដឹងពីលោកអធិកានគរស្រុកបាទី ៕ដោយ៖ តាកែវ
