បាត់ដំបង ៖ ឯកឧត្តមវេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ បានមានប្រសាសន៍ថា ប្រជាពលរដ្ឋនៅក្នុងស្រុករុក្ខគីរី ប្រមាណជាង៤០០គ្រួសារ ទទួលបានកូនត្រី សម្ភារសំពត់កៅស៊ូនិងចំណីត្រីមួយចំនួន គ្រាប់ពូជបន្លែ និងដំណាំ ព្រមទាំង កូនម្នាស់ចំនួន១ម៉ឺនកូន ដើម្បីស្ដារនិងបង្កបង្កើនផលឡើងវិញ ក្រោយទឹកស្រកនិងជួយដោះស្រាយជីវភាពប្រចាំថ្ងៃ។
ការលើកឡើងបែបនេះ ក្នុងឱកាសចុះពិនិត្យមើលពីជីវភាពរស់នៅរបស់បងប្អូនប្រជាពលរដ្ឋ ដែលទទួលរងនូវផលប៉ះពាល់ដោយទឹកជំនន់ទឹកភ្លៀងកន្លងមក ក្នុងស្រុករុក្ខគីរីនិងបន្តដំណើរបេសកកម្មការងារនៅតាមបណ្តាខេត្ត ជាប់តំបន់បឹងទន្លេសាបមួយចំនួន កាលពីពេលថ្មីៗកន្លងទៅនេះ។
ឯកឧត្តមវេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ បានបញ្ជាក់ថា ផលប៉ះពាល់យ៉ាងធ្ងន់ធ្ងរដោយជំនន់ទឹកភ្លៀងនេះ បានធ្វើឲ្យខេត្តចំនួន៣ រងនូវផលប៉ះពាល់នូវហេដ្ឋារចនាសម្ព័ន្ធរូបវន្តសង្គម ការលិចលង់ខូចខាតផ្ទះសម្បែង ការជម្លៀសមកកាន់ទីទួលសុវត្ថិភាពនិងផលដំណាំ ស្រែចម្ការ រាប់សិបម៉ឺនហិកតា ដែលរងប៉ះពាល់និងខូចខាតយ៉ាងធ្ងន់ធ្ងរ។ បញ្ហានេះ ត្រូវបានប្រមុខរាជរដ្ឋាភិបាលកម្ពុជា បានគិតគូរក្នុងការដោះស្រាយប្រជាពលរដ្ឋដែលរងគ្រោះទាំងនោះ ពីការចាប់ផ្តើមសង្គ្រោះជីវិតបងប្អូនប្រជាពលរដ្ឋឲ្យរួចផុតពីគ្រោះថ្នាក់ ដោយទឺកជំនន់កន្លងមកនិងតាមរយៈការផ្គត់ផ្គង់ស្បៀងបន្ទាន់ និងផ្តល់នូវអំណោយមនុស្សធម៌ពីគ្រប់មជ្ឈដ្ឋានទាំងថ្នាក់ជាតិថ្នាក់ខេត្ត ទាំងអាជ្ញាធរដែនដីគ្រប់លំដាប់ថ្នាក់ កងកម្លាំងទាំង៣ ពីបណ្តាក្រុមហ៊ុន អាជីវករនិងសប្បុរសជននានា បានចូលរួមយ៉ាងសកម្មជាមួយនិងរាជរដ្ឋាភិបាលទាំងនៅថ្នាក់ជាតិនិងថ្នាក់ក្រោមជាតិ ដើម្បីជួយប្រជាពលរដ្ឋរងគ្រោះទាំងអស់នោះ។
ឯកឧត្តម វេង សាខុន រដ្ឋមន្ត្រីក្រសួងកសិកម្ម បានបន្ថែមទៀតថា ដោយទទួលបាន នូវបទបញ្ជាពីសម្តេចតេជោ ហ៊ុន សែន ក្នុងថ្ងៃនេះលោកបាននាំយកនូវពូជដំណាំបន្លែ ចំនួន៦មុខ និងកូនត្រីមកចែកជួនក្នុងមួយគ្រួសារចំនួន៧០០ក្បាល ព្រមទាំងផ្តល់ចំណីត្រី រួមនិងសំពត់កៅស៊ូដល់គ្រួសារដែលទទួលកូនត្រី។ការចែកជូនបងប្អូនប្រជាកសិករ ដែលកំពុងរងនគ្រោះដោយទឹកជំនន់ ជន់លិចលង់ស្រែចម្ការនិងដំណាំនេះ ដើម្បីជួយសម្រាលនូវបញ្ហាជីវភាពនិងដើម្បីជួយស្តារ នូវ ផលិតកម្មស្បៀងឡើងវិញក្រោយពីទឹកស្រក។
ឯកឧត្តម វេង សាខុន បានអំពាវនាវដល់ប្រជាកសិករដែលរងគ្រោះទាំងអស់ ត្រូវបង្កើនស្មារតីនិងយកចិត្តទុក ក្នុងការស្តារនូវជីវភាពរបស់ខ្លួនតាមរយៈភាពសកម្មក្នុងការដាំបន្លែបង្ការធ្វើចម្ការដំណាំឆ្លងកាត់ផ្សេងៗ ដើម្បីដោះស្រាយនូវជីវភាពប្រចាំថ្ងៃ។ ក្នុងនាមថ្នាក់ដឹកនាំក្រសួងនិងបណ្តាស្ថាប័ននិងមន្ទីរជំនាញនៅខេត្ត និងបន្តខិតខំលើកទឹកចិត្ត គាំទ្រនិងជំរុញឲ្យបងប្អូនប្រជាពលរដ្ឋ ចាប់ផ្តើមស្តារ នូវផលដំណាំរបស់ខ្លួនឡើងវិញ ទៅតាមគ្រប់រូបភាព ជាពិសេសការដាំដុះដំណាំឆ្លងកាត់និងដំណាំផ្សេងៗ ទៅតាមលទ្ធភាព ហើយក្រសួងនឹងមន្ទីរ រង់ចាំផ្តល់ការអន្តរាគមន៍ជួយបងប្អូន៕ ដោយ ៖ អ៊ុងសារុំ
