បាត់ដំបង៖ មន្ត្រីនៃក្រសួងអប់រំ យុវជន និងកីឡា បានជំរុញដល់សិស្សយុវជនយុវនារីទាំងអស់សិក្សាបន្ថែមនូវផ្នែកធុរកិច្ច ដើម្បីមានជំនាញច្បាស់លាស់ អាចធ្វើការឬប្រកអាជីវកម្មផ្សេងៗបាន ហើយវាក៏នឹងអាចជួយឲ្យទិសដៅរបស់រាជរដ្ឋាភិបាល ក្នុងការធ្វើឲ្យពលរដ្ឋមានប្រាក់ចំណូលធម្យមនិងកម្រិតខ្ពស់ នៅឆ្នាំ២០៣០ ទទួលបានជោគជ័យ។
ការលើកឡើងបែបនេះ ក្នុងវគ្គបណ្ដុះបណ្ដាលគ្រូសម្របសម្រួលកម្មវិធី ការយល់ដឹងពីធុរកិច្ច (KAB) មានសិក្ខាកាមមន្ត្រីអប់រំ មកពីរាជធានីខេត្តទាំង២៥ កាលពីរសៀលថ្ងៃទី៤ខែវិច្ឆិកាឆ្នាំ២០២០។
លោក ចឹក លីម អគ្គនាយករងនៃអគ្គនាយកដ្ឋានយុវជន បានមានប្រសាសន៍ថា បន្ទាប់ពីមានការបណ្ដុះបណ្ដាលជាហូរហែរ នូវកម្មវិធីការយល់ដឹងពីធុរកិច្ច ទទួលបានលទ្ធផលល្អនិងជោគជ័យ។ ឯកឧត្តមរដ្ឋមន្ត្រីក្រសួងអប់រំ យុវជននិងកីឡា សម្រេចដាក់បញ្ចូលកម្មវិធីនេះ ទៅក្នុងកម្មវិធីសិក្សាគោលនិងបញ្ចូលទៅក្នុងមុខវិជ្ជាគេហៈសេដ្ឋកិច្ច។ ជាការពិតណាស់ កម្មវិធី KAB មិនមែនបង្រៀនសិស្សឲ្យចេះរបៀបរកស៊ី ហើយឲ្យគាត់ឈប់រៀនទៅរកស៊ីនោះទេ ប៉ុន្តែគ្រាន់តែឲ្យគាត់មានជំនឿថា សហគ្រិនភាពអាចជួយគាត់ឲ្យក្លាយជាអ្នកដឹកនាំល្អ អាជីវករជោគជ័យ ជាពលរដ្ឋថ្លៃថ្នូរ ចេះគ្រប់គ្រងគ្រួសារនិងអាចលើកកម្ពស់កម្រិតជីវភាព។
លោក យី សុងគី ប្រធានមន្ទីរអប់រំ យុវជន និងកីឡាខេត្តបាត់ដំបង បានមានប្រសាសន៍លើកឡើងថា ដើម្បីឲ្យគោលដៅរបស់រាជរដ្ឋាភិបាល ពាក់ព័ន្ធនឹងប្រាក់ចំណូលរបស់ពលរដ្ឋនេះ ទាមទារឲ្យមានការចូលរួមពីយុវជនជំនាន់ក្រោយ តាមរយៈការសិក្សារៀនសូត្រជំនាញផ្សេងៗ ឲ្យបានច្បាស់លាស់ មានសមត្ថភាព អាចអនុវត្តនូវការងារបានល្អ។
គួរបញ្ជាក់ផងដែរថា វគ្គបណ្ដុះបណ្ដាលនេះ រៀបចំឡើងក្នុងគោលបំណងចង់បណ្ដុះបណ្ដាលខ្លឹមសារ ទាក់ទងនឹងសហគ្រិនភាពដល់គ្រូបង្គោល ដើម្បីឲ្យពួកគាត់បានអនុវត្តពេញលេញ និងផ្សព្វផ្សាយ ផ្ទេរចំណេះដឹងនេះដល់យុវជន តាមរយៈក្នុងប្រព័ន្ធអប់រំ ៕ដោយ៖អ៊ុងសារុំ
