ជាការពិតណាស់ ករណីវិវាទ ឬ សង្គ្រាមពាក្យសម្តី រវាងកូនបំណុល និងបុគ្គលិកគ្រឹះស្ថានចងការប្រាក់ តែងតែកើតមានឡើងជារឿយៗ ប៉ុន្តែ កន្លងៗមក ក៏មានបុគ្គលិកមួយចំនួនខ្លះ បានប្រព្រឹត្តនូវទង្វើគ្មានការយោគយល់ ឬ ឈានបំផ្លិចបំផ្លាញទ្រព្យសម្បត្តិកូនបំណុល រហូតត្រូវសមត្ថកិច្ចធ្វើការឃាត់ខ្លួនផងដែរ។
តែដោយឡែក ករណីនេះវិញ គឺពិតជាគួរឲ្យហួសចិត្តខ្លាំងណាស់ ខណៈស្ត្រីជាកូនបំណុលម្នាក់ ពិតជាមិនធម្មតាបានស្រែកឡាំប៉ាយ៉ាងសាហាវ ទៅលើ CO មួយក្រុមដែលមានទាំងមេ និងកូនចៅ។ ក្នុងនោះ ស្ត្រីជាកូនបំណុលរូបនោះ បាននិយាយខ្លាំងៗថា៖ «ខ្ញុំទៅធ្វើការយកលុយមកសងគ្រូឯង ជំពាក់គ្រូឯងតែ ២០, ៣០ ម៉ឺនរៀល កុំរបៀបលើកទ័ព ១០, ២០ ក្បាល កង់បីខ្ញុំៗ មិនទាន់បង់គេ៦ ៧ ខែ គេមិនទាន់លើកទ័ពមករាប់រយរាប់នាក់ដូចគ្រូឯងទេ»។
ស្ត្រីរូបនេះបានស្រែកបន្តថា «មុនខ្ញុំមានលុយរាប់ថ្ងៃ តែឥឡូវខ្ញុំចូលធ្វើការបើកប្រាក់ខែ អ៊ីចឹងខ្ញុំគ្មានលុយឲ្យគ្រូឯងរាល់ថ្ងៃទេ ១ខែខ្ញុំបង់គ្រូឯង ២០ ដុល្លារ គ្រូឯងមិនយក ខ្ញុំមិនដឹងធ្វើម៉េចទេ..។ ប៉ុន្តែ ក្រោយមកទៀត ស្រាប់តែស្ត្រីរូបនេះដែលមិនទទួលយការជជែគដោះស្រាយគ្នាឲ្យស្រួលបួល និងសូម្បីពុំគោរពតាមពាក្យសន្យា ក៏បាននិយាយគួរឲ្យហួសចិត្តថា «ខ្ញុំអត់មានលុយឲ្យគ្រូឯងច្រើនទេ ឥឡូវ១ខែខ្ញុំឲ្យតែ១០ដុល្លារទេ (ពីមុន២០ ឥឡូវ១០) ព្រោះតែគ្រូឯងលើកគ្នាមកច្រើនពេក»។ ហើយចុងក្រោយ ស្រែកថា មិនសងចង់ប្តឹងអីប្តឹងទៅ ព្រោះចោទថាបានមកជេរដៀលកូនខ្លួន លើកគ្នា ២០ , ៣០ នាក់មកជំរិត និងចង់បង្កអំពើហិង្សាដល់ក្នុងផ្ទះ ហើយក៏បានបាចទឹកបញ្ជេ CO ទាំងនោះឲ្យចេញផុតពីផ្ទះខ្លួនទៀតផង។
ក្រោយពីបានឃើញបែបនេះ មហាជនជាច្រើនបានសម្តែងការហួសចិត្តជាខ្លាំង ដោយរិះគន់ទៅលើស្ត្រីរូបនេះថា៖ «មីងជំពាក់លុយគេហើយ ធ្វើចរិកធូរថ្លៃទៀត គេមិនអាណិតមីងទេ មីងធ្វើចឹងខុសហើយ ទោះមួយរយឬហាសិប ក៏មីងជំពាក់គេដែរ ចូរមីងនិយាយជាមួយពួកគាត់ឲ្យស្រួលទៅ ពួកគាត់អនុគ្រោះឲ្យហើយ, ខូចមែន ពេលខ្ចីស្រួល ពេលទារពិបាក, ចែនេះសាហាវណាស់ និយាយជេគេអ៊ីចឹងដើម្បីចង់ឲ្យគេវៃរួចយកលេសប្តឹងទារលុយគេទើបថតទុកអ៊ីចឹង សាហាវមិនធម្មតាមែន មីងអាចធ្វើជាអ្នកលក់លេបានហើយ»៕ ដោយ៖ លឹម ហុង
