មហាជននៅទូទាំប្រទេស ជាពិសេសអ្នកប្រើប្រាស់បណ្តាញសង្គម បានស្គាល់ហើយពីអភិបាលខេត្តពោធិ៍សាត់ គឺឯកឧត្ដម ម៉ៅ ធនិន ដែលកំពុងទទួលបានការកោតសរសើរខ្លាំងណាស់ តាមរយៈការដឹកនាំដ៏ពូកែរបស់លោក ពិសេសនោះគឺការដោះស្រាយទំនាស់រឿងក្តីក្តាំងជាច្រើនរាប់មិនអស់ ជូនបងប្អូនប្រជាពលរដ្ឋនៅក្នុងខេត្តពោធិ៍សាត់ទាំងមូល។
ជាពិតណាស់ នៅរៀងរាល់សប្តាហ៍ ថ្នាក់ដឹកនាំពោរពេញដោយចំណេះដឹងជ្រៅជ្រះ និងមានគុណធម៌រូបនេះ តែងបើកវេទិកាដោះស្រាយជំទាស់រាប់រយជំពូក ដែលបានកើតឡើងសម្រាប់ប្រជាពលរដ្ឋនៅតាមមូលដ្ឋានស្រុកភូមិ ដែលក្នុងនោះមិនថាទំនាស់ដីធ្លី ទំនាស់គ្រួសារដណ្តើមទ្រព្យដីធ្លី និងផ្ទះសម្បែងជាដើម គឺលោកអាចដោះស្រាយជូនបានដោយជោគជ័យ និងប្រកបដោយភាពសមស្រប មិនលម្អៀងទៅលើខាងណានោះទេ ដែលគួរឲ្យគោរពសរសើរជាខ្លាំង។
អ្វីដែលធ្វើឲ្យមហាជនពេញចិត្តខ្លាំងនោះ គឺលោកតែងប្រើទឹកដមសម្តីដ៏ស្រទន់ ជាមួយឧត្តមគតិដ៏ខ្ពង់ខ្ពស់យកភាពយុត្តិធម៌ត្រឹមត្រូវជាគោល ដោយបញ្ចប់ទំនាស់បញ្ហា មិនឲ្យភាគីណាចាញ់ឈ្នះដោយទឹកភ្នែកនោះទេ និងផ្ទុយទៅវិញ ចុងក្រោយគឺនាំមកនូវស្នាមញញឹមរកគ្នា ក្រោមការអបអរសាទរទះដៃកងរំពងពីសំណាក់អ្នកចូលរួម។
ពិតមែនហើយ ជាមួយនឹងចិត្តសាស្ត្រដ៏ពូកែ និងការផ្តល់ដំបូន្មានល្អៗ ឃើញថាលោកតែងតែធ្វើឲ្យមនុស្សមានចិត្តរឹងរូស តែងតែខ្លាំងជានិច្ចទៅលើអ្នកទន់ខ្សោយ ឲ្យងាកមកស្ងប់ចិត្ត ហើយអាចយកគំនិតរបស់លោកទៅដេកគិតពិចារណាឡើងវិញ ថាតើទង្វើដ៏អាក្រក់របស់ខ្លួន ដែលបានប្រព្រឹត្តខុសនោះត្រឹមត្រូវដែរ ឬទេ។
ជាក់ស្តែង មហាជនប្រហែលជានៅចាំមិនទាន់ភ្លេចនោះទេ ចំពោះករណីមួយដែលលោកអភិបាលពោធិ៍សាត់ បានដោះស្រាយបញ្ហាជូនលោកយាយម្នាក់ ដែលត្រូវបានកូនប្រុសតិរច្ឆានប្រើអំពើហិង្សា រហូតដល់ថ្នាក់ចង់សម្លាប់ម្តាយ និងព្រមទាំងជេរប្រមាថម្តាយគ្រប់សារពើរ តែចុងក្រោយ កូនប្រុសរូបនោះ និងប្រពន្ធខ្លួនជាកូនប្រសារ បានលុតជង្គង់ក្រាបសំពះសុំទោសម្តាយដល់បាតជើង ដែលធ្វើឲ្យមហាជនរំជួលចិត្តស្ទើរស្រក់ភ្នែក។
អ្វីដែលធ្វើឲ្យមហាជនទះដៃកងរំពងនោះ គឺលោកយាយជាម្តាយ ដែលបានអះអាងថា មិនព្រមទទួលស្គាល់ និងលើកលែងឲ្យកូនប្រុសរូបនោះដាច់អហង្ការយ៉ាងណា តែចុងក្រោយ នៅតែតែមិនអាចយកឈ្នះឥទ្ធិពលនៃពាក្យពេចន៍ដ៏ស្រទន់រកអ្វីប្រៀបមិនបានរបស់លោកផងដែរ។ ចំណែកកូនប្រុសរមិលគុណនោះ ដែលហ៊ានលើកដៃវាយម្តាយដូចសត្វធាតុ បានដឹងកំហុសដ៏ធ្ងន់ធ្ងររបស់ខ្លួន លុតក្រាបសំពះម្តាយទាំងទឹកភ្នែក ក្រោយត្រូវទឹកមន្តសណ្តំផ្លូវចិត្តដ៏ប៉ិនប្រសប់របស់លោក និងការដាក់សម្ពាធក្នុងលក្ខណៈមិនឲ្យរួចខ្លួន ប្រសិនបើហ៊ានប្រព្រឹត្តលើម្តាយទៀត។
ដោយសារតែបានមើលឃើញពីគុណធម៌ដ៏ធំធេង តាមរយៈការដោះស្រាយទំនាស់ដោយមិនលម្អៀង និងថែមទាំងផ្តល់នូវដំបូន្មានអប់រំល្អៗ ជាហេតុធ្វើឲ្យប្រជាជនមានការពេញចិត្ត និងគោរពបំផុត ចំពោះឯកឧត្តម ម៉ៅ ធនិន ជាខ្លាំងរហូតដល់ថ្នាក់មហាជន ចាត់ទុកលោកជាថ្នាក់ដឹកនាំមួយរូប ដែលប្រកបដោយទសពិធរាជធម៌។ រីឯអ្នកខ្លះទៀត ក៏បានបង្ហាញអារម្មណ៍ពិតចេញពីចិត្តថា៖ «លើកទីមួយហើយដែលខ្ញុំបានស្តាប់ រហូតដល់ចប់ ខ្ញុំ គោរពលោកឯកឧត្តម ដែលបានរកយុត្តិធម៌ និងផ្តល់នូវការទូន្មានដ៏ល្អចំពោះអ្នកមិនដឹងថា ខ្លួនធ្វើអ្វីខុស ខ្ញុំសូមគោរពពីចម្ងាយ»៕ រក្សាសិទ្ធិដោយ៖ លឹម ហុង
