លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានថ្លែងប្រាប់អ្នកសារព័ត៌មាន នៅព្រឹកថ្ងៃទី២៧ ខែធ្នូ ឆ្នាំ២០២០ ថា ដោយមានការណែនាំដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រី គឺបានអនុញ្ញាតឱ្យ ភោជនីយដ្ឋាន ជាមួយនឹងហាងទំនិញផ្សេងៗ ដែលមានពាក់ព័ន្ធនឹងព្រឹត្តិការណ៍ សហគមន៍២៨វិច្ឆិកា បើកដំណើរការដូចធម្មតាឡើងវិញ ប៉ុន្តែការបើកឡើងវិញនេះ គឺត្រូវគោរពតាមវិធានការអនាម័យ របស់ក្រសួងសុខាភិបាលជាចាំបាច់ ។
គួររំលឹកថា បន្ទាប់ពីផ្ទុះឡើងនូវការឆ្លងជំងឺកូវីដ-១៩ ចូលសហគមន៍លើកដំបូង នៅថ្ងៃទី២៨ ខែវិច្ឆិកា ឆ្នាំ២០២០ រាជរដ្ឋាភិបាលកម្ពុជា បានដាក់ចេញនូវវិធានការបន្ទាន់ និងចាំបាច់មួយចំនួនភ្លាមៗ ដោយមានការបិទភោជនីយដ្ឋាន និងហាងទំនិញដែលឆ្លងជំងឺកូវីដ-១៩ និងអ្នកដែលបានចូលទៅពិសាអាហារ និងទិញទំនិញនៅទីនោះ ទាំងអ្នកពាក់ព័ន្ធផ្ទាល់ និងប្រយោល ធ្វើចត្តាឡីស័ក និងយកសំណាកទៅធ្វើតេស្តវិភាគរកមេរោគកូវីដ-១៩ ក្នុងនោះ មនុស្សខ្ទង់ម៉ឺននាក់ ដែលជាប់ពាក់ព័ន្ធព្រឹត្តិការណ៍ «សហគមន៍២៨វិច្ឆិកា» ត្រូវបានធ្វើតេស្តរកវីរុសកូវីដ-១៩ ឃើញវិជ្ជមានចំនួន ៤១នាក់ ប៉ុន្តែពួកគេព្យាបាលជាសះស្បើយជិតអស់ហើយ ។
សូមបញ្ជាក់ថា គិតត្រឹមព្រឹក ថ្ងៃទី២៧ ខែធ្នូ ឆ្នាំ២០២០ ក្នុងចំណោមអ្នកជំងឺទាំង៤១នាក់ មានចំនួន៣៧នាក់បានជាសះស្បើយ និងចេញពីមន្ទីរពេទ្យ ខណៈអ្នកជំងឺ៤នាក់ទៀត កំពុងសម្រាកព្យាបាល នៅមន្ទីរពេទ្យនៅឡើយ។
សរុបអ្នកឆ្លងកូវីដ-១៩ នៅកម្ពុជា មានចំនួន ៣៦៤នាក់ ក្នុងនោះ អ្នកជាសះស្បើយ ចំនួន ៣៥៦នាក់ និងអ្នកកំពុងសម្រាកព្យាបាល នៅមន្ទីរពេទ្យចំនួន ៨នាក់ ៕រក្សាសិទ្ធិដោយ៖CEN
