ភ្នំពេញ៖ ប្រិយមិត្តប្រាកដជានៅចាំបានហើយ ចំពោះហេតុការណ៍នៃករណីអំពើឃាតកម្ម ដែលស្ត្រីជាប្រពន្ធរៀបចំគម្រោងឲ្យដៃប្រុសសហាយ បាញ់សម្លាប់ប្តីជាគ្រូបង្រៀនជំនួសខ្លួនកាលពីឆ្នាំមុន (២០១៩) ដោយសារតែរឿងរស់នៅមិនចុះសម្រុងគ្នា ខណៈស្ត្រីជាប្រពន្ធរូបនេះតែងតែជំពាក់លុយគេ ហើយខឹងប្ដីឧស្សាហ៍រករឿងស្តីបន្ទោសចេញសងជំនួស ទើបកើតជាជម្លោះញឹកញាប់។
សូមបញ្ជាក់ថា ករណីឃាតកម្មបាញ់សម្លាប់គ្រូបង្រៀនឈ្មោះ រឿន រតនា បានកើតឡើងនៅវេលាពាក់កណ្ដាលអធ្រាត្រថ្ងៃទី២៧ ខែសីហា ឆ្នាំ២០២០ បន្ទាប់ពីស្ត្រីជាប្រពន្ធបានរៀបចំគម្រោងឲ្យសហាយស្ទាក់ចាំបាញ់សម្លាប់នៅកន្លែងផ្លូវបេតុងស្ងាត់ ជិតមណ្ឌលឱកាសខ្ញុំ នៅភូមិសែនសុខ៥ សង្កាត់ឃ្មួញ ខណ្ឌសែនសុខ ខណៈប្តីវិលត្រឡប់ពីធ្វើទៅបុណ្យនៅឯស្រុកកំណើត ស្ថិតក្នុងភូមិស្វាយជ្រុំ ស្រុកខ្សាច់កណ្តាល ខេត្តកណ្តាល។ ហើយក្រោយហេតុការណ៍បានកើតឡើង ស្ត្រីជាប្រពន្ធមានគំនិតអាក្រក់នេះ ក៏បានមកមើលសពប្តី ដោយធ្វើជាយំសោកសៅ ដើម្បីបំភាន់ភ្នែកសមត្ថកិច្ច។ ប៉ុន្តែឈាមស្រែកស្បែកហៅ នៅទីបំផុត ស្ត្រីជាប្រពន្ធរូបនេះក៏ឆ្លើយសារភាពថាខ្លួននាងជាអ្នករៀបចំគម្រោងនេះឡើង។
តែអ្វីដែលគួរឲ្យភ្ញាក់ផ្អើលនោះ ស្រាប់តែថ្មីៗនេះ បានលេចធ្លាយដំណឹងថា ស្ត្រីជាប្រពន្ធរូបនេះបានស្លាប់ហើយ បន្ទាប់ឈឺនៅក្នុងគុក។ នេះបើយោងតាមគណនីហ្វេសប៊ុកឈ្មោះ សួង សុផុន បានបង្ហោះរូបភាព និងលើកឡើងយ៉ាងដូច្នេះថា «ក្នុងលោកនេះ ដូចជា មិនមានបាប ឬ បុណ្យទេ មានតែទង្វើវិលត្រឡប់ទៅ ម្ចាស់ទង្វើដើមប៉ុណ្ណោះ ធ្វើល្អ គឺទង្វើល្អ នឹងវិលទៅរកមនុស្សល្អវិញ ហើយបើសាងអំពើអាក្រក់ គឺទង្វើអាក្រក់ នឹងវិលទៅរកដូចគ្នា។ នេះជាករណីប្រពន្ធដែលបានរៀបគម្រោងសម្លាប់ប្តី ឥឡូវប្រពន្ធក៏ស្លាប់បាត់ដែរ!»។
គណនីខាងលើ ក៏បានបញ្ជាក់ថា លោកគ្រូ រតនា បានស្លាប់យប់ថ្ងៃទី២៧ ខែសីហា ឆ្នាំ២០១៩ រីឯប្រពន្ធស្លាប់នៅថ្ងៃទី២៨ ខែធ្នូ ឆ្នាំ២០២០»៕ រក្សាសិទ្ធិដោយ៖ លឹម ហុង
