ប្រធានាធិបតីមិចស៊ិចកូ លុបចោលដំណើរទស្សនៈកិច្ចទៅអាមេរិច ដោយសារនិយាយទូរស័ព្ទតឹង សរសៃកដាក់គ្នាជាមួយ ដូណាល់ ត្រាំ

ប្រធានាធិបតីមិចស៊ិចកូ Enrique Peña Nieto លុបចោលដំណើរទស្សនៈកិច្ចទៅកាន់ទីក្រុងវ៉ាស៊ីនតោន ក្រោយពេលសន្ទនាតាមទូរស័ព្ទមិនត្រូវគ្នាជាមួយនឹង ប្រធានាធិបតីអាមេរិច ដូណាល់ ត្រាំ ជុំវិញភាពចំរូងចំរាស់លើ ការសាងសង់របងព្រំដែន។

បើតាមមន្រ្តីសេតវិមានអាមេរិចបានឲ្យដឹងថា លោក Enrique Peña Nieto មានគំរោងធ្វើដំណើរមកអាមេរិច ដើម្បីជួប ប្រធានាធិបតី ដូណាល់ ត្រាំនៅខែមីនា ប៉ុន្តែដំណើរទស្សនៈកិច្ចនោះត្រូវបានលុបចោលវិញ ដោយសារបញ្ហាមិនចុះសំរុងគ្នាក្រោយនិយាយគ្នាតាមទូរស័ព្ទ។

បើតាមសេចក្តីរាយការណ៏របស់ The Washington Post ដែលមន្រ្តីនៃប្រទេសទាំងពីរបានប្រាប់ការសែតនេះ បានឲ្យដឹងថា លោក Peña Nieto បានលុបចោលដំណើរទស្សនៈកិច្ច ក្រោយពេលលោក ដូណាល់ ត្រាំមិនបានយល់ស្របទៅនឹង ការប្រកាសជាសាធារណៈរបស់មិចស៊ិចកូ ដែលមេដឹកនាំប្រទេសនេះបញ្ជាក់ថា នឹងមិនចំណាយលើ ការសាងសង់ជញ្ជាំងព្រំដែនឡើយ។

សូមបញ្ជាក់ថា កន្លងទៅ មេដឹកនាំអាមេរិច បានទាមទារឲ្យប្រទេសមិចស៊ិចកូជាអ្នកចំណាយលើការសាងសង់ របងព្រំដែនខ័ណ្ឌប្រទេសទាំងពីរ ប៉ុន្តែមេដឹកនាំមិចស៊ិចប្រកាសថា មិនចេញលើការចំណាយ នោះទេ ដែលមានតម្លៃរាប់ពានលានដុល្លាអាមេរិច៕ សុភ័ក្ត្រ