ភ្នំពេញៈ តុលាការខេត្តបាត់ដំបងបានចេញដីកាបង្គាប់ឲ្យឃុំខ្លួនលោក គឹម ពន្លក អតីតអធិការនគរបាលស្រុកកំរៀង ខេត្តបាត់ដំបង ពាក់ព័ន្ធរឿងដោះលែងមេខ្លោងនាំពលករឆ្លងដែនខុសច្បាប់។ ដីកាបង្គាប់ឲ្យឃុំខ្លួននេះ គឺចេញដោយលោក ឃី ឆៃ ចៅក្រមស៊ើបសួរសាលាដំបូងខេត្តបាត់ដំបងកាលពីថ្ងៃទី១២ ខែកុម្ភៈ ឆ្នាំ២០២១។
នៅក្នុងដីកា គឺបានបញ្ជាឲ្យភ្នាក់ងារមានសមត្ថកិច្ច នៃកម្លាំងសាធារណៈធ្វើការនាំខ្លួនជនត្រូវចោទឈ្មោះ គឹម ពន្លក ទៅពន្ធនាគារខេត្តបាត់ដំបង ដោយអនុវត្តឲ្យបានត្រឹមត្រូវតាមនីតិវិធី។
ការបបង្គាប់ឲ្យឃុំខ្លួនអតីតអធិការនគរបាលស្រុកកំរៀង ខេត្តបាត់ដំបង បានធ្វើឡើងខណៈដែលសមត្ថកិច្ចកំពុងតែស្រាវជ្រាវរកមន្ត្រីដែលពាក់ព័ន្ធដែលបានឃុបឃិតគ្នាប្រព្រឹត្តអំពើពុករលួយដោះលែងមេខ្លោងនាំពលករឆ្លងដែនខុសច្បាប់។
ពាក់ព័ន្ធករណីនេះ កម្លាំងសហការប្រចាំការច្រកអន្តរជាតិដូង កាលពីថ្ងៃទី១៥ ខែកុម្ភៈ ឆ្នាំ២០២១ បានចាប់មេខ្យល់ម្នាក់បាននាំពលករចូលមកកម្ពុជា។ មេខ្យល់ដែលចាប់ឈ្មោះ សាំ ចាន់ធូ ភេទប្រុស អាយុ៤០ឆ្នាំ មុខរបរអាជីវករក្នុងផ្សារថៃ រស់នៅភូមិដូង ឃុំបឹងរាំង ស្រុកកំរៀង ខេត្តបាត់ដំបង។
សមត្ថកិច្ចបានឲ្យដឹងថា មេខ្យល់ខាងលើនេះ ធ្លាប់បានឃាត់ខ្លួនម្ដងរួចមកហើយនិងបញ្ជូនទៅឲ្យអធិការដ្ឋាននគបាលស្រុកកំរៀងដើម្បីអោយសួរនាំ និងធ្វើកំណត់ហរតុទៅតាមផ្លូវច្បាប់តែត្រូវអធិការដ្ឋានគបាលស្រុកកំរៀងដោះលែងវិញ ។ បច្ចប្បន្ន ត្រូវបានឃាត់ខ្លួនម្ដងទៀតហើយបញ្ជូនអោយខាងអធិការស្រុកកំរៀងចាត់ការបន្ត។
ប្រភពបានបញ្ជាក់ថា មេខ្យល់ដែលចាប់ខ្លួន អាចប្រឈមមុខនឹងការរត់ពន្ធមនុស្សដោយខុសច្បាប់។ ហើយសមត្ថកិច្ចកំពុងតែតាមរកមេខ្យល់មួយចំនួនដែលនាំពលករឆ្លងដែនខុសច្បាប់ ដើម្បីចាត់ការតាមនីតិវិធីច្បាប់។
សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីព្រឹកថ្ងៃទី១៦ ខែកុម្ភៈ បានបញ្ជាក់ថា ទាក់ទងករណីអធិការនគរបាលស្រុកកំរៀង ដែលបានដោះលែងមេខ្លោងនាំពលករឆ្លងដែនដោយខុសច្បាប់ គឺសមត្ថកិច្ចកំពុងតែធ្វើការស្រាវជ្រាវបន្ថែមទៀតដើម្បីរកអ្នកដែលពាក់ព័ន្ធ។ ការបញ្ជាក់នេះនៅក្រៅពិធីប្រគល់រថយន្តជូនស្នងការ ដ្ឋាននគរបាលខេត្តចំនួន ១៩ខេត្ត នៅព្រឹកថ្ងៃទី១៦ ខែកុម្ភៈ ឆ្នាំ២០២១ នៅទីស្តីការក្រសួងមហាផ្ទៃ។
ជាមួយគ្នានេះ សម្តេចក្រឡាហោម ស ខេង បានប្រាប់ទៅស្នងការនគរបាលរាជធានី ខេត្ត រួមទាំងមន្ត្រីនគរបាលដែលពាក់ព័ន្ធត្រូវមើលគំរូអធិការស្រុកកំរៀង ខេត្តបាត់ដំបង ដែលពាក់ព័ន្ធក្នុងរឿងដោះលែងមេខ្យល់នាំពលករខ្លងដែនខុសច្បាប់ ត្រូវបានដកហូតឋានន្តរស័ក្តិ និងបណ្តេញចេញពីក្របខណ្ឌមន្ត្រីនគរបាលជាតិកម្ពុជា។
សម្តេចក្រឡាហោម ស ខេង បានលើកឡើងថា បទពិសោធន៍អធិការស្រុកកំរៀង ខេត្តបាត់ដំបង គឺជាបទពិសោធន៍មួយ ធ្វើការរំលោភវិជ្ជាជីវៈ រំលោភលើឋានានុក្រម ដោយមិនខ្ចីរាយការណ៍ឲ្យថ្នាក់លើបានដឹង គឺខុស នេះជាបទពិសោធន៍ដែលត្រូវសិក្សារៀនសូត្រ ហើយក៏ដូចជាកញ្ចក់សម្រាប់យើងទាំងអស់គ្នាផងដែរ។
សម្តេចក្រឡាហោមបានបញ្ជាក់យ៉ាងដូច្នេះថា “បទពិសោធន៍អធិការស្រុកកំរៀង ជាបទពិសោធន៍មួយ យើងឃើញថា គាត់ធ្វ់ការរំលោភវិជ្ជាជីវៈ រំលោភលើឋានានុក្រម ដោយគាត់មិនខ្ចីរាយការណ៍ឲ្យអ្នកណាទេ គាត់សប្បាយខ្លួនគាត់ អាហ្នឹងខុស ជាបទពិសោធន៍មួយដែលយើងទាំងអស់គ្នាត្រូវសិក្សារៀនសូត្រ ហើយក៏ដូចជាកញ្ចក់សម្រាប់យើងទាំងអស់គ្នាទេ”។
សូមជម្រាបថា សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីថ្ងៃទី១៥ ខែកុម្ភៈ ឆ្នាំ២០២១ បានចេញអនុក្រឹត្យដកឋានន្តរស័ក្តិ និងបណ្តេញចេញក្របខណ្ឌមន្ត្រីនគរបាលជាតិកម្ពុជា ចំពោះវរសេនីយ៍ឯក គឹម ពន្លក នគរបាលជាន់ខ្ពស់ក្របខណ្ឌមន្ត្រីនគរបាលជាតិកម្ពុជា នៃក្រសួងមហាផ្ទៃ៕ រក្សាសិទ្ធិដោយៈ ចេស្តារ
