ខេត្តកែប ៖ រូបសំណាក់ មច្ឆានុព្វផុសពីផ្ទៃសមុទ្រ ដែលជាគម្រោងរបស់រដ្ឋបាលខេត្តកែប និងលេចចេញជារូបរាង នាពេលខាងមុខឆាប់ៗនេះ ដើម្បីរង់ចាំទទួលភ្ញៀវទេសចរ ក្រោយជំងឺកូវីដ១៩ បានធូរស្បើយ។
រូបសំណាក់នេះ មានទីតាំងស្ថិតនៅភូមិអំពេង ឃុំអង្កោល ស្រុកដំណាក់ចង្អើរ ខេត្តកែប ដែលនឹងក្លាយទៅជាទីតាំង ចាប់អារម្ភណ៍ ពីសំណាក់ភ្ញៀវទេសចរ ដែលចូលចិត្តធ្វើដំណើរកម្សាន្តនៅតាមតំបន់មាត់សមុទ្រ។
ឯកឧត្តម សោម ពិសិដ្ឋ អភិបាលខេត្តកែប បានឱ្យដឹងថា គម្រោងសាងសង់រូបសំណាក់នេះ ជាគោលដៅទេសចរណ៍មួយ ក្រោយចប់ជំងឺកូវីដ១៩ ហើយក៏នឹងទាក់ទាញភ្ញៀវទេសចរ ដើម្បីរុញគោលដៅទេសចរណ៍ឱ្យទៅដល់ទីជនបទ តាមតំបន់ឆ្នេរនៃខេត្តកែប និងពង្រីកសក្តានុពលតំបន់ឆ្នេរ ប្រែក្លាយទៅជាទីកន្លែងសម្រាប់លំហែកាយសាធារណៈ របស់ភ្ញៀវទេសចរជាតិ អន្តរជាតិ។
ឯកឧត្តម បានបញ្ជាក់ថា គម្រោងរូបសំណាក់មច្ឆានុព្វនេះ ក៏ជាសមិទ្ធផលប្រវត្តិសាស្ត្ររបស់ខេត្តផង និងជាកេរ្តិ៍ដំណែលទុកសម្រាប់ឱ្យកូនចៅជំនាន់ក្រោយបានដឹង និងស្គាល់ពីធនធានជលផល ដែលខេត្តកែបមាន។
ខេត្តកែបនេះ ក្រៅពីរូបសំណាក់មច្ឆានុព្វ ដែលកំពុងសាងសង់ មានរូបសំណាក់ជាប្រវត្តិសាស្ត្រជាច្រើនទៀតដែលមហាជនទូទៅ បានស្គាល់រួចទៅហើយ ដូចជា រូបសំណាក់សេះសរ រូបសំណាក់ស្រីស រូបសំណាក់ក្តាមសេះ ជាដើម ដែលសុទ្ធតែមានអត្ថន័យ ទៅតាមរូបសំណាក់នីមួយៗ ឆ្លុះបញ្ជាំងឱ្យឃើញពីសក្តានុពលរបស់ខេត្តកែបទាំងមូល។
គួរបញ្ជាក់ផងដែរថា បើតាមផែនការ ការសាងសង់រូបសំណាក់នាងមច្ឆានុព្វនេះ ធ្វើឡើងក្នុងបីដំណាក់កាល នឹងប្រើរយៈពេល៣ឆ្នាំ ដោយពេលនេះ កំពុងសាងសង់ផ្ទៃខាងក្រោម។ រូបសំណាក់នេះ សាងសង់ចូលក្នុងផ្ទៃសមុទ្រប្រវែង ១៥០ម៉ែត្រ ដោយគិតទាំងផ្លូវចូល និងទីធ្លារូបសំណាក់។ ដោយឡែកសម្រាប់រូបសំណាក់វិញគឺសាងសង់ក្នុងកំពស់រហូតជាង ៤ម៉ែត្រឯណោះ៕
រក្សាសិទ្ធិដោយ៖CEN
