បន្ទាយមានជ័យ ៖ ជនជាតិចិនបង្ករឿងនៅក្រុងប៉ោយប៉ែតទៀតហើយ ពោលគឺជនជាតិចិនធ្វើឃាតជនជាតិចិនគ្នានៅក្នុងបន្ទប់សណ្ឋគារនៃកាស៊ីណូហ្គ្រេនដាយមិនស៊ីធី( Hotel of Grand Diamond City casino,PoiPet) ។
សមត្ថកិច្ចចម្រុះនគរបាល កងរាជអាវុធហត្ថ មន្ត្រីពេទ្យ អយ្យការអមសាលាដំបូងខេត្ត បានធ្វើការស្រាវជ្រាវអង្កេត កំណត់មុខសញ្ញាជនល្មើសជាឃាតករនោះថាមានជនជាតិចិនយ៉ាងតិច៥នាក់បានសមគំនិតនិងប្រព្រឹត្តដោយយកកូនកន្សែងបិទខ្ទប់ច្រមុះនិងមាត់ជនរងគ្រោះបណ្តាលឱ្យដាច់ខ្យល់ស្លាប់។
ប៉ុន្តែមកទល់ពេលនេះ ជនសង្ស័យជនជាតិចិនជាឃាតករបានរត់គេចខ្លួនបាត់អស់ហើយ ។ សមត្ថកិច្ចនៅខេត្តបន្ទាយមានជ័យកំពុងតាមស្វែងរកចាប់ខ្លួន។
សូមរំលឹកថា កាលពីរសៀលថ្ងៃទី៥ខែមីនាឆ្នាំ២០១៨ ជនជាតិចិនម្នាក់ត្រូវបានគេប្រទះឃើញស្លាប់លើពូកនៃគ្រៃបន្ទប់លេខ ៣០៨ ជាន់ទី៣ សណ្ឋាគារនៃកាស៊ីណូហ្គ្រេនដាយម៉ិនស៊ីធី ។ សមត្ថកិច្ចសន្និដ្ឋានថានោះជាអំពើឃាតកម្មត្បិតលើរាងកាយជនរងគ្រោះមានស្នាមជាំ ជាច្រើនកន្លែង។
ជនរងគ្រោះសមត្ថកិច្ចមិនស្គាល់ អត្តសញ្ញាណនោះទេ។ ប៉ុន្តែសាកសពជនរងគ្រោះត្រូវបាននគរបាលដឹកបញ្ជូនយកទៅធ្វើកោសល្យវិច្ច័យបន្ថែមទៀតនៅក្រសួងមហាផ្ទៃ។
សូមរំលឹកដែរថា កាលពីថ្ងៃទី១៦ កុម្ភ: ឆ្នាំ២០១៨កន្លងមក ស្នងការដ្ឋាននគរបាលខេត្តបន្ទាយមានជ័យដឹកនាំដោយលោកឧត្តមសេនីយ៍ទោ អាត់ ខែម បានប្រជុំពិនិត្យ វាយតម្លៃនិងពង្រឹងការងារលើការគ្រប់គ្រងជនជាតិចិនរាប់ពាន់នាក់នៅក្នុងខេត្ត ពិសេសនៅក្រុងប៉ោយប៉ែត។
នោះមកពី មានបាតុភាពបន្តបន្ទាប់បង្កពីជនជាតិចិនមៅខេត្តព្រះសីហនុកន្លងមកថ្មីៗនេះ ។ និងនៅក្រុងប៉ោយប៉ែត ក៏មានករណីបង្កពីជនជាតិចិនលើជនជាតិចិនគ្នាឯងដែរដូចជា ចាប់ជម្រឹតតាមអនឡាញឬតាមប្រព័ន្ធ(VOIP) , ការបង្ខាំងមនុស្ស ,ការប្រព្រឹត្តអាណាចារ្យនានានៅក្រុងប៉ោយប៉ែតខេត្តបន្ទាយមានជ័យកាលពីឆ្នាំ២០១៧ ,ឆ្នាំ២០១៦ ជាដើម៕ ដោយ ៖ បន្ទាយ
