តាកែវ៖ មានមនុស្ស២នាក់ បានស្លាប់ភ្លាមៗនៅនឹងកន្លែងកើតហេតុដោយសារគ្រោះថ្នាក់ចរាចរណ៍រវាងម៉ូតូបះនិងម៉ូតូយ៉ាងពេញទំហឹង ក្នុងទិសដៅច្រាសគ្នា ហេតុការណ៍គ្រោះថ្នាក់ចរាចរណ៍ដ៏រន្ធត់នេះបានកើតឡើងកាលថ្ងៃទី២៦ ខែតុលា ឆ្នាំ២០១៧ វេលាម៉ោង១៧,៤៨នាទី ចន្លោះគីឡូម៉ែត្រលេខ០៤-០៥ នៅចំណុចភូមិជ្រោយ ព្រះបាទជាន់ជុំ ស្រុកគិរីវង់ ខេត្តតាកែវ ។
លោក យុគ សារ៉ាត់ អធិការស្រុកគិរីវង់បានអោយដឹងថា ១.អ្នកបើកម៉ូតូឈ្មោះ ដា ភេទប្រុស អាយុ២២ឆ្នាំ ទីលំនៅខេត្តព្រះសីហនុ មិនបានពាក់ម៉ូកសុវត្ថិភាព ត្រូវទទួលរងរបួសឆ្ងន់ បានស្លាប់នៅកន្លែងកើតហេតុកើត ម៉ូតូម៉ាកCBR 150 CCគ្មានស្លាកលេខ ។ ២.អ្នកបើកបរម៉ូតូឈ្មោះ ពេញ ដាវី ភេទប្រុស អាយុ១៨ឆ្នាំ ទីលំនៅភូមិត្រពាំងស្រង់ ឃុំព្រះបាទជាន់ជុំ ស្រុកគិរីវង់ ខេត្តតាកែវ មុខរបរសិស្ស មិនបានពាក់ម៉ូកសុវត្ថិភាពត្រូវទទួលរងរបួសធ្ងន់ បានស្លាប់នៅនិងកន្លែងកើតហេតុ ម៉ូតូម៉ាក Wave C100 គ្មានស្លាកលេខ ។
អ្នកឃើញហេតុការណ៍បាននិយាយប្រាប់ប៉ូលីសថា មុនពេលកើតហេតុគេឃើញម៉ូតូមួយគ្រឿង បើកបរយ៉ាងលឿនពីទិសខាងលិចទៅទិសខាងកើត លុះមកដល់ចំណុចកើតហេតុក៍ឃើញម៉ូតូមួយគ្រឿងទៀតបើកបរច្រាសទិសគ្នា ទំនងជាគេចមិនទាន់ក៍បុកគ្នាពេញទំហឹងបណ្ដាលអោយមានមនុស្សស្លាប់តែម្ដង ។ បច្ចុប្បន្នសាកសព ទាំងពីរបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណីខ្មែរ រីឯវត្ថុតាងម៉ូតូទាំងពីរគ្រឿងត្រូវបានដកហូតរក្សាទុកនៅកន្លែងអធិការដ្ឋាននគរបាលស្រុក នឹងកំពងស្រាវជ្រាវបំពេញសំណុំរឿងតាមនិតិវិធីច្បាប់ ៕ តាកែវ
