ខេត្តស្វាយរៀង៖នៅព្រឹកថ្ងៃទី២៨ ខែតុលា ឆ្នាំ២០១៧នេះ ពិធីប្រណាំងទូកនៅទន្លេវ៉ៃគោខេត្តស្វាយរៀង ចាប់ផ្តើមហើយស្ថិតក្រោមវត្តមានចូលរួមដ៏ខ្ពង់ខ្ពស់លោកជំទាវបណ្ឌិតម៉ែនសំអនឧបនាយករដ្ឋមន្ត្រីរដ្ឋ មន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភានិងអធិការកិច្ចនិងជាប្រធានក្រុមការងារថ្នាក់ជាតិចុះជួយខេត្តស្វាយរៀង។
ក្នុងពិធីនេះដែរក៏មានការចូលរួមពីឯកឧត្តមលោកជំទាវដែលជានាយឧត្តមសេនីយ៍ ឧត្តមសេនីយ៍ ក្រុមការងារគណៈពង្រឹងចុះជួយខេត្តស្វាយរៀង មន្ត្រីរាជការ ប្រជាពលរដ្ឋចូលរួមយ៉ាងអធិកអធម្មផងដែរ។
ទូកដែលត្រូវប្រណាំងនៅទន្លេវ៉ៃគោនាពេលនេះមានចំនួន៤៦គ្រឿងមានកីឡាករសរុបចំនួន១២១៦នាក់(នារី០៦)ក្នុងនោះកីឡាពេញសិទ្ធ៩៣៥នាក់និងកីឡាករបម្រុង២៧៩នាក់និងមានប្រតិភូដឹកនាំទូក២៣៩នាក់មកពីបណ្តាខេត្តរាជធានីជាការឧបត្ថមគាំទ្រនាំមកប្រណាំងពីលោកនាយឧត្តមសេនីយ៍សៅសុខាមេបញ្ជាការកងរាជអាវុធហត្ថលើផ្ទៃប្រទេសអ៊ុំប្រណាំងមានរយៈពេល១ថ្ងៃគឺថ្ងៃទី២៨តុលានេះ។
ថ្លែងនៅក្នុងពិធីបើកការប្រណាំងទូកនៅទន្លេវ៉ៃគោ ខេត្តស្វាយរៀង លោក ម៉ែន វិបុល អភិបាលខេត្តស្វាយរៀង បានធ្វើការថ្លែងអំណរគុណយ៉ាងជ្រាវជ្រៅនិងសូមសម្តែងនូវការស្វាគមន៍យ៉ាងកក់ក្តៅចំពោះវត្តមានដ៏ខ្ពង់ខ្ពង់បស់លោកជំទាវម៉ែនសំអនដែលបានអញ្ជើញជាគណៈអធីបតីនៅក្នុងពិធីនេះនិងសម្តែងនូវការស្វាគមន៍ចំពោះវត្តមានឯកឧត្តម លោកជំទាវ លោកឧកញ៉ា អ្នកឧកញ៉ា លោកលោកស្រីភ្ញៀវកិត្តិយសទាំងអស់ដែលចូលរួម។
លោកបានបញ្ជាក់ថាអាស្រ័យដោយកត្តាសុខសន្តិភាពពេញលេញនៅទូទាំងប្រទេសដែលជាមនុញ្ញផលនៃគោលនយោបាយឈ្នះៗនិងការដឹកនាំដ៏ត្រឹមត្រូវប្រកបដោយគតិបណ្ឌិតរបស់សម្តេចតេជោហ៊ុនសែននាយករដ្ឋមន្ត្រីនៃព្រះរាជាណាចក្រកម្ពុជាព្រមទាំងការខិតខំអនុវត្តយ៉ាងសកម្មនូវកម្មវិធីនយោបាយនិងយុទ្ធសាស្ត្រចតុកោណដំណាក់កាលទី៣របស់រាជរដ្ឋាភិបាលនិងការចូលរួមសហការអនុវត្តនូវគោលនយោបាយភូមិ ឃុំមានសុវត្ថិភាពប្រកបដោយការទទួលខុសត្រូវពីសំណាក់កងកំលាំងគ្រប់ប្រភេទមន្ទីរ អង្គភាពពាក់ពន្ធ័និងអាជ្ញាធរដែនដីគ្រប់លំដាប់ថ្នាក់បានធ្វើអោយសភាពការណ៍សន្តិសុខសណ្តាប់ធ្នាប់សាធារណៈនៅទូទាំងខេត្តទាំងភូមិសាស្ត្រក្នុងខេត្តនិងនៅតាមបណ្តោយខ្សែបន្ទាត់ព្រំដែនមានលក្ខណៈល្អប្រសើរបង្ករលក្ខណះអំណោយផលយ៉ាងធំធេងសម្រាប់ខេត្តស្វាយរៀងក្នុងការកសាងនិងអភិវឌ្ឍខេត្តអោយមានការរីកចម្រើនលើគ្រប់វិស័យទាំងពុទ្ធចក្រនិងអាណាចក្រ៕ ដោយ ៖ វ៉ៃកូ
