ខេត្តព្រៃវែង ៖ រថយន្ត សាំយ៉ុង បានបើកបុកក្មេងប្រុសម្នាក់ បណ្តាលឲ្យស្លាប់នៅកន្លែងកើតហេតុ។ ដែលករណីគ្រោះថ្នាក់ចរាចរបានកើតឡើងនៅថ្ងៃទី៨ ខែមេសា ឆ្នាំ២០១៨ វេលាម៉ោង១៥ និង ៥៥នាទី នៅចំណុចភូមិស្វាយចេក ឃុំព្រៃឈរ ស្រុកកំពង់ត្របែក ខេត្តព្រៃវែង នៅលើផ្លូវជាតិលេខ១។
រថយន្ត សាំយ៉ុង ពណ៌លឿង ពាក់ស្លាកលេខ2AQ4065 បើកដោយជនមិនស្គាល់ឈ្មោះ បានគេចខ្លួនបាត់ក្រោយពីបង្កហេតុ។ រថយន្តបង្កនេះ បើកបរពីទិសខាងកើត ឆ្ពោះទៅទិសខាងលិច តាមផ្លូវជាតិលេខ១ មកដល់ចំណុចខាងលើ បានបុកក្មេងកំពុងដើរឆ្លងកាត់ផ្លូវជាតិ បណ្តាលឲ្យស្លាប់នៅកន្លែងកើតហេតុ។
ក្មេងរងគ្រោះឈ្មោះ អេង សុភឿន អាយុ ៧ឆ្នាំ រស់នៅភូមិស្វាយចេក ឃុំព្រៃឈរ ស្រុកកំពង់ត្របែក ខេត្តព្រៃវែង។ សាកសពបានប្រគល់ឲ្យអាណាព្យាបាលយកទៅធ្វើបុណ្យ។ ចំណែករថយន្ត ត្រូវបានសមត្ថកិច្ច យកមករក្សាទុក នៅអធិការដ្ឋាន ដើម្បីកសាងសំណុំរឿង៕ ដោយ៖បញ្ញាស័ក្តិ
