តាម Daily Mail ដែលដកស្រង់ពី NK News ចុះផ្សាយនៅថ្ងៃទី ២៩ ខែ១០ ឲ្យដឹងថា កូរ៉េខាងជើង ហាក់ដូចជាកំពុងធ្វើសមយុទ្ធជម្លៀសពលរដ្ឋនៅច្រើនកន្លែង សំដៅត្រៀមទុកនាពេលសង្គ្រាម។ គេហទំព័រនេះបានដកស្រង់ ប្រភពច្បាស់ការណ៍ឲ្យដឹងថា កូរ៉េខាងជើង បានរៀបចំការធ្វើសមយុទ្ធបែបនេះ នៅតាមបណ្តាទីក្រុង និងប្រជុំជនលំដាប់ទី២ និងទី៣ កាលពីសប្តាហ៍មុនម្លេះ។ គេពុំទាន់ដឹងថា តើសមយុទ្ធនេះមានប្រព្រឹត្តទៅនៅក្រុងព្យុងយ៉ាងដែរឬទេ?
មេដឹកនាំកូរ៉េខាងជើង ក្នុងដំណើរចុះត្រួតពិនិត្យការងារ
តាម NK News ខ្លឹមសារ១ ក្នុងចំណោមខ្លឹមសារនៃសមយុទ្ធនេះ គឺការ “ដាច់ចរន្តអគ្គិសនី” មានន័យថា នៅតំបន់សមយុទ្ធត្រូវកាត់ផ្តាច់ចរន្តអគ្គិសនី បំភ្លឺទាំងស្រុងនៅពេលយប់ដើម្បីបញ្ចៀសកុំឲ្យបច្ចាមិត្ររកឃើញទីតាំង។
NK News ដដែលបញ្ជាក់ថា សមយុទ្ធបែបនេះធ្លាប់បានអនុវត្តចុងក្រោយមុននេះគឺនៅឆ្នាំ២០០៣។
នៅថ្ងៃទី ២៨ ខែ១០ រដ្ឋមន្ត្រីការពារជាតិអាមេរិក Jim Mattis ក្នុងសន្និសីទ១ នៅសេអ៊ូលបានព្រមានខ្លាំងៗថា ៖ “កុំធ្វើអ្វីដែលខុសឆ្គង។ រាល់ការវាយលុកណា១ ទៅលើអាមេរិក និងសម្ព័ន្ធមិត្ត សុទ្ធសឹងត្រូវវាយឲ្យបរាជ័យ។ ប្រសិនកូរ៉េខាងជើង ហ៊ានប្រើប្រាស់នុយក្លេអ៊ែរ ប្រទេសនេះនឹងត្រូវរងទទួលការវាយប្រហារយោធា១ដ៏មានប្រសិទ្ធភាព នឹងពុំអាចងើបក្បាលរួចពីអាមេរិក និងសម្ព័ន្ធមិត្ត”។
លោក Mttis ក៏បានអះអាងថា ៖ “គ្មានពេលណាដែលអាមេរិកទទួលស្គាល់កូរ៉េខាងជើងជារដ្ឋនុយក្លេអ៊ែរឡើយ”៕ ដោយ ៖ សូយន