ភ្នំពេញ៖ ក្រសួងសុខាភិបាល នៅថ្ងៃទី២០ ខែមេសា ឆ្នាំ២០១៨នេះ បានចេញសេចក្តីប្រកាសព័ត៌មាន ច្រាលចោល នូវការចុះផ្សាយព័ត៌មានដោយបានក្លែងអត្ថបទលើទំព័រហ្វេសប៊ុកដែលមានម្ចាស់ផេកឈ្មោះមើល កុំសាន (Merl Komsan) ដែលបង្ហោះពីករណីរូបថត X-ray របស់បុរសម្នាក់ រស់នៅខេត្តព្រៃវែង ដោយអះអាងមានសត្វកន្លាតមួយក្បាល កំពុងតែរស់នៅក្នុងខ្លួន។
សេចក្តីប្រកាសព័ត៌មាន ទាត់ចោលព័ត៌មាននេះ ធ្វើឡើងបន្ទាប់ពីមាន Facebook Page មួយឈ្មោះថា មើល កុំសាន (Merl Komsan) កាលពីថ្មីនេះបានបង្ហោះករណីរូបថត X-ray របស់បុរសម្នាក់រស់នៅខេត្តព្រៃវែង ដែលគាត់ត្រូវបានលោកវេជ្ជបណ្ឌិតប្រាប់ថា មានសត្វកន្លាតមួយក្បាលកំពុងតែរស់នៅក្នុងខ្លួនរបស់គាត់ ទើបធ្វើឲ្យគាត់ចេះតែមានអាការៈឈឺចុកចាប់ស្មាបែបនេះ ហើយតម្រូវឲ្យគាត់ទៅព្យាបាលនៅបរទេសថែមទៀតផង។ បន្ទាប់មកបុរសរូបនោះបានលក់ផ្ទះ និងខ្ចីលុយធនាគារអស់ជាច្រើន ដើម្បីយកលុយទៅព្យាបាលនៅប្រទេសឥណ្ឌា។ មកដល់ប្រទេសឥណ្ឌា បន្ទាប់ពីធ្វើការថត X-rayរួចរាល់ហើយ លោកវេជ្ជបណ្ឌិតបានប្រាប់ទៅបុរសអ្នកព្រៃវែងនោះវិញថា សត្វកន្លាតដែលថតបានោះ គឺវាស្ថិតនៅក្នុងម៉ាស៊ីន X-ray របស់មន្ទីរពេទ្យខេត្តព្រៃវែង មិនមែននៅក្នុងស្មារបស់គាត់ឡើយ។ ប៉ុន្តែពេលនេះ ព័ត៌មាននេះត្រូវបានក្រសួងសុខាភិបាល ប្រកាសថា ជាព័ត៌មានក្លែងបន្លំ និងមិនមែនកើតឡើងនៅកម្ពុជាឡើយ។
ក្រសួងសុខាភិបាលបានបញ្ជាក់ថា បន្ទាប់ពីបានឃើញការចុះផ្សាយបែបនេះមក ក្រសួងបានធ្វើការស្រាវជ្រាវឃើញថា អត្ថបទនេះ បានក្លែងបន្លំខ្លឹមសារពីអត្ថបទដើម ដែលបានចុះផ្សាយហ្វេសប៊ុក មានម្ចាស់ផេកឈ្មោះ Medecine Life -ជីវិតគ្រូពេទ្យ ដែលខ្លឹមសារបានសរសេរអំពីសាច់រឿង នៅប្រទេសនីហ្សេរីយ៉ា មិនមែននៅមន្ទីរខេត្ដព្រៃវែងនោះឡើយ។ ក្រសួងសុខាភិបាលសុំប្រកាសច្រានចោលនូវព័ត៌មានច្នៃប្រឌិត និងជាការលេងសើចរបស់ម្ចាស់ផេកឈ្មោះ មើល កុំសាន ដែលធ្វើឲ្យប៉ះពាល់ដល់វិស័យសុខាភិបាលកម្ពុជា៕ ដោយ៖បញ្ញាស័ក្តិ
