ព្រះសីហនុ ៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជា នាព្រឹកថ្ងៃទី២ ខែធ្នូ ឆ្នាំ២០២១ បានអញ្ជើញជាអធិបតីដ៏ខ្ពង់ខ្ពស់ សម្ពោធដាក់ឲ្យប្រើប្រាស់ ជាផ្លូវការផ្លូវចំនួន ៣៧ខ្សែ និងអាងប្រព្រឹត្តកម្មទឹកកខ្វក់ចំនួន៣ និងសមិទ្ធផលនានា ក្នុងក្រុងព្រះសីហនុ ដែលចំណាយថវិកាជាតិសម្រាប់សាងសង់សរុបប្រមាណ ៣០០លានដុល្លារអាមេរិក ។
បើតាម គណៈកម្មការសាងសង់ផ្លូវឱ្យដឹងថា ផ្លូវ ៣៤ ខ្សែ និងសមិទ្ធផលមួយចំនួន នៅក្រុងព្រះសីហនុ បានដាក់ឱ្យប្រើប្រាស់ជាបណ្ដើរៗហើយ បន្ទាប់ពីសាងសង់រួចមកនោះ។
ផ្លូវទាំង៣៤ខ្សែនេះ មានប្រវែងសរុបជាង ៨៤គីឡូម៉ែត្រ មានរង្វង់មូលចំនួន៣ និងស្ពានចំនួន៦ប្រវែង ២៥២ម៉ែត្រ។ ផ្លូវទាំង៣៤ខ្សែនេះចែកចេញជា៣ប្រភេទរួមមាន៖
១៖ មហាវិថីចំនួន ៣ខ្សែប្រវែងជាង ២២គីឡូម៉ែត្រ មានទទឹង ៥០ម៉ែត្រ ទ្រូងផ្លូវទទឹង ២៥.៧៥ម៉ែត្រ មានគន្លងផ្លូវរថយន្ត៦គន្លង (៣ទៅ ៣មក) ផ្លូវទោចក្រ យានយន្ត២គន្លង រួមមាន៖ មហាវិថីរាម (លេខ៤៥), មហាវិថីឆ្នេររាម និងមហាវិថីជំទាវម៉ៅ (លេខ៤៧)។
២៖ វិថីមានចំនួន ១៦ខ្សែ មានប្រវែងជិត ៥០គីឡូម៉ែត្រ មានទទឹង ២០ម៉ែត្រ ទៅ ៤០ម៉ែត្រ ទ្រូងផ្លូវទទឹង ១០.២៥ម៉ែត្រ ទៅ ១៧.២៥ម៉ែត្រ មានគន្លងផ្លូវរថយន្ត២គន្លង ទៅ៤គន្លង, ផ្លូវទោចក្រយានយន្ត២គន្លង។ វិថីទាំង ១៦ខ្សែនេះរួមមាន៖ វិថីលេខ ៨៣៧-១ វិថីអូត្រេះ, វិថីឆ្នែរអូរឈើទាល (លេខ៥០) វិថីកោះពូឡូវៃ (លេខ៣០០), វិថីឯករាជ្យ (លេខ១០០), វិធី២ធ្នូ (លេខ៦០០), វិថីលំហែព្រះភូមិន្ទ, វិថីឆ្នេរអូរត្រេះ, វិថីគុជអា ស៊ី (លេខ១២៣៧), វិថីបុរីកម្មករ (លេខ ១១២), វិថីជោតញ្ញាណ (លេខ៧០១), វិថី២៨មិថុនា (លេខ១២៣), វិថីមិត្តភាពកម្ពុជា-រុស្ស៉ី (លេខ៧០៥) វិថីចំណោតអូរត្រាវ និងវិថីឆ្នេរពយជំទាវម៉ៅ និងវិថីអូរត្រជាក់ចិត្ត។
៣៖ អនុវិថី មានចំនួន ១៥ខ្សែ មានប្រវែងជិត១២គីឡូម៉ែត្រ មានទទឹងផ្លូវពី១៥ ម៉ែត្រ ទៅ៤៥ម៉ែត្រ ទ្រូងផ្លូវទទឹង ១០. ២៥ម៉ែត្រ មានគន្លងផ្លូវរថយន្ត ២គន្លង និងផ្លូវទោចក្រយានយន្ត២គន្លង។ អនុវិថីទាំង ១៥ខ្សែនេះ រួមមាន៖ ផ្លូវកាត់ទទឹងវិថីអូរត្រេះ និងវិថីឆ្នេរអូរត្រេះ, ផ្លូវលេខ៨០១, ផ្លូវលេខ៥០១, ផ្លូវលេខ៥០៣, ផ្លូវលេខ ៥០៥, ផ្លូវលេខ៥០៧, ផ្លូវលេខ១១៥, ផ្លូវលេខ៦០២, ផ្លូវលេខ៥០២, ផ្លូវលេខ ៨១០, ផ្លូវលេខ ៨១៨៨, ផ្លូវលេខ១០២, ផ្លូវលេខ៨០៦, ផ្លូវលេខ១០៦ និងផ្លូវលេខ១២៦ លើកលែងតែកំណាត់ទី៣ នៃផ្លូវលេខ៨០១ ប្រវែង ១០៣ម៉ែត្រ ផ្លូវមានទទឹង ១០ម៉ែត្រ។
ក្នុងគោលដៅប្រែក្លាយក្រុងព្រះសីហនុ ទៅជាទីក្រុងទំនើបដែលមានសោភ័ណ ភាព បរិស្ថានល្អ សម្រាប់ការរស់នៅ ទេសចរណ៍ និងធុរកិច្ច ជាពិសេសធានាបានគុណភាពខ្ពស់ រឹងមាំ ប្រើប្រាស់បានយូរអង្វែង ការ ស្ថាបនាផ្លូវទាំង៣៤ខ្សែ បានគោរពតាមគោលការណ៍ និងលក្ខណៈបច្ចេកទេសដូចជា
១៖ គោរពតាមផែនការរៀបចំដែនដីខេត្តព្រះសីហនុ ចក្ខុវិស័យឆ្នាំ២០៣០។
២៖ កំណត់អ័ក្សផ្លូវតាមចំណុចកណ្តាលនៃដីចំណីផ្លូវសាធារណៈស្របតាមប្លង់សុរិ យោដី។
៣៖ សាងសង់តាមគម្រោងប្លង់បច្ចេកទេសលម្អិតនៃខ្សែផ្លូវនីមួយៗដែលសិក្សាដោយគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជាអនុលោមតាមបទ ដ្ឋានរបស់ក្រសួងសាធារណការ និងដឹក ជញ្ជូន៖ ទ្រូងផ្លូវធ្វើពីបេតុងកម្រាស់ ២៥០ មិល្លីម៉ែត្រ ក្រាលកៅស៊ូបេទីមកម្រាស់ ៧០មិល្លីម៉ែត្រ បេតុងត្រូវពង្រឹងដោយប្រើដែកសរសៃទំហំ ១២មិល្លីម៉ែត្រ, ចិញ្ចើមផ្លូវមានផ្លូវថ្មើរជើងក្រាលសន្លឹកបេតុង និងផ្លូវជិះកង់ទទឹង ១.៥០ម៉ែត្រ ក្រាលកៅស៊ូបេទីមកម្រាស់ ៥០មិល្លីម៉ែត្រ មានដាំស្មៅ និងដើមឈើជាផ្ទៃបៃតងជ្រាបទឹក, ដាំដើមតែ និងរុក្ខជាតិលម្អរនៅតាមផ្លូវដែលមានខឿនសួនកណ្តាលចែកទ្រូងផ្លូវ, បង្កប់លូទឹក ភ្លៀងមុខកាត់ ១ម៉ែត្រ និងលូទឹកកខ្វក់មុខកាត់ ១ម៉ែត្រ តាមបណ្តោយសងខាងផ្លូវ, មានបង្គោលភ្លើងបំភ្លឺសាធារណៈ, មានគំនូសចរាចរណ៍ និងផ្លាកសញ្ញាចរាចរណ៍តាមបទដ្ឋានបច្ចេកទេស។បន្ថែមពីលើនេះ ផ្លូវសំខាន់ៗនឹងត្រូវបំពាក់កាមេរ៉ាសុវត្ថិភាពផងដែរ។
បើតាមគណៈកម្មការសាងសង់ផ្លូវបានឱ្យដឹងថា ផ្លូវទាំង៣៤ខ្សែដែលត្រូវសាងសង់នៅខេត្តព្រះសីហនុនេះ ត្រូវប្រើប្រាស់ថវិកាប្រមាណជាង២០០លានដុល្លារ ។
គណៈកម្មការសាងសង់ផ្លូវ បានឱ្យដឹងទៀតថា ចំណែកផ្លូវតភ្ជាប់ពីតំបន់ទំនប់ រលក ទៅមហាវិថីសម្តេចសង្ឃទេព វង្ស ភ្ជាប់ទៅផ្លូវ ជាតិលេខ៤ ក្នុងស្រុកព្រៃនប់ ដែលនឹង អាចស្ថាបនារួចរាល់នៅខែ ១០ឆ្នាំ ២០២២ ការស្ដារអូរប្រឡាយ និងកសាងផ្លូវមួយ ចំនួនផ្សេងទៀត ក្នុងក្រុងព្រះសីហនុ។ ក្រៅពីនេះខេត្តព្រះសីហនុមានឆ្នេរ ១៧៥ គីឡូម៉ែត្រ ក្នុងនោះមានឆ្នេរខ្សាច់ ឆ្នេរភក់ ឆ្នេរកោងកាង និងឆ្នេរថ្ម ហើយក្នុងនោះឆ្នេរ ១៦គីឡូម៉ែត្រ ចាប់ពីកំពង់ផែក្រុងព្រះសី ហនុ ទៅពយជំទាវម៉ៅ ជាឆ្នេរលំហសាធារណៈសម្រាប់បងប្អូនដើលេងកម្សាន្តនិងមានឆ្នេរព្រែកត្រែង ទទួលភ្ញៀវទេសចរ។
ការអភិវឌ្ឍហេដ្ឋារចនាសម្ព័ន្ធផ្លូវថ្នល់ សម្រេចបានជោគជ័យជាបន្តបន្ទាប់ យើងក៏គិតពីការរៀបចំបេតុង បេទីម ចិញ្ចើមក្រានីត កម្រាលក្រានីត សួនជំរាបទឹក ការដាំរុក្ខ ជាតិ ភ្លើងបំភ្លឺសាធារណៈ ភ្លើងស្តុបចរាចរ និងការបំពាក់កាំម៉េរាសុវត្ថិភាព។ល។ ក្រៅ ពីការរៀបចំហេដ្ឋារចនាសម្ព័ន្ធ ក៏មានការរៀបចំសាងសង់ខ្ចូស នៅឆ្នេរអូឈើទាលតាមគំរូប្លង់គោលរបស់គណ:កម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជាផងដែរ។ នៅតាមបណ្តោយឆ្នេរលំហសាធារណ: គណ:កម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា បានសាងសង់បន្ទប់ទឹកសាធារណៈចំនួន ៧ កំពុងដាក់ឲ្យដំណើរការ និង២ ទៀត ត្រៀមបើកឱ្យដំណើរការ នាពេលខាងមុខ។ លើសពីនេះខេត្ត មានអាងប្រព្រឹត្តកម្មទឹកកខ្វក់ចំនួន ៣ ក្នុងនោះ ២សាងសង់រួច បានដាក់ឲ្យដំណើរការ អាងប្រព្រឹត្តកម្មទី ១ មានសមត្ថភាពច្រោះទឹកកខ្វក់ ៥,២០០ម៉ែត្រ គូបក្នុងមួយថ្ងៃ អាងប្រព្រឹត្តកម្មទី ២ មានសមត្ថភាពច្រោះទឹកកខ្វក់ ៧,២០០ម៉ែត្រ គូបក្នុងមួយថ្ងៃ និងអាងប្រព្រឹត្តកម្មទី៣ កំពុងដំណើរការសាងសង់ មានសមត្ថភាពច្រោះទឹកកខ្វក់បាន ២០,០០០ម៉ែត្រគូបក្នុងមួយថ្ងៃ ហើយសមិទ្ធផលទាំងអស់នេះ បានធ្វើឱ្យខេត្តព្រះសីហនុប្រែមុខមាត់ថ្មី ដែលរាជរដ្ឋាភិបាលកំណត់យកខេត្តព្រះ សីហនុ ជាតំបន់សេដ្ឋកិច្ចពិសេសគំរូពហុបំណង នាពេលខាងមុខ។
សូមបញ្ជាក់ថា សម្ដេចតេជោនាយករដ្ឋមន្ត្រីនៃកម្ពុជា បានធ្វើការសម្រេចចិត្តដកថវិកាសន្សំរបស់ជាតិចំនួន ១០០លានដុល្លារ ដើម្បីយកមកធ្វើការអភិវឌ្ឍន៍ខេត្តព្រះសីហនុ ដោយបានផ្ដល់គោលនយោបាយ “ស្លឹកត្នោត ខ្ចប់ស្ករត្នោត” ប្រើប្រាស់ធនធានក្នុងខេត្ត ដើម្បីកសាងហេដ្ឋារចនា សម្ព័ន្ធផ្លូវ ៣៤ខ្សែក្នុងខេត្តព្រះសីហនុ ដែលបានបើកការដ្ឋានកាលពីថ្ងៃទី ១៦ ខែវិច្ឆិកា ឆ្នាំ២០១៩ ៕រក្សាសិទ្ធិដោយ ៖ សុទ្ធ លី
