ទីក្រុង LVIV ប្រទេសអ៊ុយក្រែន៖ កាលពីថ្ងៃទី១៦មីនាម្សិលមិញនេះ ក្រសួងការបរទេសអ៊ុយក្រែនថ្លែងថា កងកម្លាំងរុស្ស៊ីបានទម្លាក់គ្រាប់បែកដ៏ខ្លាំងមួយទៅលើរោងមហោស្រពមួយក្នុងទីក្រុងកំពង់ផែ ម៉ារ៉ូផូល (Mariupol) របស់ប្រទេសអ៊ុយក្រែន ដែលឡោមព័ទ្ធដោយជនស៊ីវិលរាប់រយនាក់កំពុងរស់នៅក្បែរនោះ។
ក្រសួងបាននិយាយថា មនុស្សជាច្រើនបានជាប់ក្នុងរោងកុន ហើយបានចោទរុស្ស៊ីថាបានប្រព្រឹត្តឧក្រិដ្ឋកម្មសង្គ្រាម។ ក្រសួងបន្តថាចំនួនអ្នកស្លាប់មិនទាន់ដឹងនៅឡើយទេ។ ដោយឡែក ប្រភពរ៉យទ័រ មិនអាចផ្ទៀងផ្ទាត់ព័ត៌មានដោយឯករាជ្យបានទេ។
រុស្ស៊ីបដិសេធការកំណត់គោលដៅជនស៊ីវិល។ ទីភ្នាក់ងារសារព័ត៌មាន RIA បាននិយាយថា នៅទីក្រុងមូស្គូ ក្រសួងការពារជាតិបាននិយាយថា កងកម្លាំងរបស់ខ្លួនមិនបានវាយលុកអគារនោះទេ ហើយជំនួសមកវិញបានចោទប្រកាន់កងវរសេនាតូច អេហ្សូវ (Azov) ដែលជាកងជីវពលអ៊ុយក្រែនស្តាំនិយម ដែលបានបំផ្ទុះវាឡើង។
មិនមានភស្តុតាងដើម្បីអះអាងពីករណីនេះទេ។ រុស្ស៊ីធ្លាប់បានចោទប្រកាន់កងវរសេនាតូចថា បានរារាំងជនស៊ីវិលមិនឱ្យចាកចេញពីទីក្រុងដែលបានរងការទម្លាក់គ្រាប់បែកយ៉ាងខ្លាំង។ ក្រុមហ៊ុន ម៉េកសារ ថិកណូឡូជី (Maxar Technologies) ដែលជាក្រុមហ៊ុនឯកជនរបស់សហរដ្ឋអាមេរិក បានចែកចាយរូបភាពផ្កាយរណប ដែលខ្លួនបាននិយាយថា ប្រមូលបាននៅថ្ងៃទី 14 ខែមីនា ហើយបានបង្ហាញពាក្យថា “កុមារ” ជាអក្សររុស្ស៊ីដ៏ធំដែលគូរនៅលើដីនៅខាងក្រៅរោងមហោស្រព Mariupol Drama ដែលមានដំបូលក្រហម។ Maxar បាននិយាយថា ខ្លួននឹងចែកចាយរូបភាពថ្មីនៃរោងមហោស្រពភ្លាមៗនៅពេលដែលវាមាន៕ប្រភព៖ រ៉យទ័រ
