ធនាគារកណ្តាលរបស់តៃវ៉ាន់ បានដំឡើងអត្រាការប្រាក់គោលរបស់ខ្លួននៅក្នុងការផ្លាស់ប្តូរដ៏គួរឱ្យភ្ញាក់ផ្អើលមួយកាលពីថ្ងៃព្រហស្បតិ៍ ដោយមានអត្រាខ្ពស់ជាងការរំពឹងទុក ដោយសារមានការព្រួយបារម្ភចំពោះអតិផរណា ហើយថែមទាំងបានកែសម្រួលនូវការព្យាករកំណើននៃពាណិជ្ជកម្មឆ្នាំ 2022 របស់កោះដែលពឹងផ្អែកលើពាណិជ្ជកម្មមួយនេះ។
ការសម្រេចដំឡើងអត្រាការប្រាក់របស់តៃវ៉ាន់កើតឡើង បន្ទាប់ពីធនាគារកណ្តាលអាមេរិកកាលពីថ្ងៃពុធបានដំឡើងអត្រាការប្រាក់ជាលើកដំបូងចាប់តាំងពីឆ្នាំ 2018 ជាមួយនឹងការកើនឡើងមួយភាគបួនភាគរយនៃអត្រាមូលនិធិគោលដៅរបស់ធនាគារកណ្តាលអាមេរិក។
ធនាគារកណ្តាលរបស់តៃវ៉ាន់ បានដំឡើងអត្រាការប្រាក់បញ្ចុះតម្លៃគោលប្រមាណ 25 ពិន្ទុមូលដ្ឋាន (bps) ដល់ 1,375 ភាគរយពី 1,125 ភាគរយ ដែលខ្លួនមានតាំងពីខែមីនា ឆ្នាំ 2020 នៅពេលដែលខ្លួនបានកាត់បន្ថយអត្រាដល់កម្រិតទាបជាប្រវត្តិសាស្ត្រដើម្បីទប់ទល់នឹងជំងឺរាតត្បាតកូវីដ-១៩។
អ្នកសេដ្ឋកិច្ចចំនួន 16 នាក់ក្នុងចំណោម 20 នាក់នៅក្នុងការស្ទង់មតិរបស់សារព័ត៌មានរ៉យទ័របានរំពឹងថាធនាគារកណ្តាលនឹងរក្សាអត្រាការប្រាក់នៅក្នុងកិច្ចប្រជុំគោលនយោបាយរូបិយវត្ថុប្រចាំត្រីមាសរបស់ខ្លួន។ អ្នកសេដ្ឋកិច្ចបួននាក់ផ្សេងទៀតបានព្យាករណ៍ថានឹងកើនឡើង 12,5 bps ។ អ្នកសេដ្ឋកិច្ចក៏បានដាក់ការប៉ាន់ប្រមាណពីផលិតផលក្នុងស្រុកសរុប (GDP)សម្រាប់ឆ្នាំ 2022 មានកំណើនដល់ 4,05 ភាគរយពី 4,03 ភាគរយដែលបានឃើញនៅក្នុងខែធ្នូ ដោយនិយាយថាសន្ទុះនៃការនាំចេញនៅតែរឹងមាំ។
ទាក់ទងទៅនឹងអតិផរណា ធនាគារកណ្តាលបាននិយាយថា ខ្លួនបានឃើញសន្ទស្សន៍តម្លៃទំនិញប្រើប្រាស់កើនឡើង 2,37 ភាគរយក្នុងឆ្នាំ 2022 ដោយបានកែសម្រួលការរំពឹងទុកពី 1,59 ភាគរយដែលបានព្យាករណ៍នៅក្នុងខែធ្នូ។ នៅក្នុងសេចក្តីថ្លែងការណ៍មួយ បាននិយាយថាការដំឡើងអត្រាការប្រាក់នឹង “អំណោយផលដល់ការទប់ស្កាត់ការរំពឹងទុកនៃអតិផរណាក្នុងស្រុក ហើយនឹងជួយរក្សាស្ថិរភាពតម្លៃ” ក៏ដូចជាស្ថិរភាពសេដ្ឋកិច្ច និងការអភិវឌ្ឍន៍ហិរញ្ញវត្ថុ៕ ប្រភព៖រ៉យទ័រ