តាមឃ្លីបរបស់មន្ទីរពេទ្យ Hoan My របស់វៀតណាមបានចុះផ្សាយនោះ គឺគេបានរកឃើញក្នុងឧទ្យានជាតិ នៅខេត្ត Ninh thuan មានចេកមួយប្រភេទដែលកម្រមានអ្នកស្គាល់ហើយវាត្រូវបានជនជាតិ Raglai ចាត់ទុកជាឱសថទិព្វ ។ ពូជចេកប្រភេទនេះ វាពុំដុះផ្តុំគ្នាជាគុម្ព ដោយដុះរាយប៉ាយ ទើបគេហៅវាថា ចេកឯកោ ។ ដើមចេកនេះចេញផ្លែនៅនិទាឃរដូវ ហើយផ្ការបស់វា ស្រដៀងនឹងផ្កាឈូកអីចឹង ។
ក្រៅពីលក្ខណៈចម្លែកខាងលើអម្បូរចេកនេះមានប្រសិទ្ធភាពចំពោះសុខភាពមនុស្ស ជាអាទិ៍ ៖ ចេកនេះវាមានគ្រាប់ប៉ុនកូនដៃ ហើយគ្រាប់នេះឯងត្រូវបានជនជាតិរស់នៅទីនោះយកទៅដាំ ។ គ្រាប់ចេកនេះត្រូវបានពួកគេប្រើប្រាស់ជាឱសថព្យាបាលជំងឺ ។
អនុរក្សឧទ្យានជាតិប្រាប់ថា ដើមចេកទាំងនេះវាដុះរាយប៉ាយនៅក្នុងឧទ្យានជាតិ Bac Ai វាមានលក្ខណៈពិសេសគឺពុំដុះកូនចេញពីគ្រាប់ទេ ។ កន្លងមកវាដុះរាយប៉ាយអាស្រ័យដោយអ្នកបរិភោគផ្លែវា រួចទៅបន្ទោរបង់ ធ្វើឲ្យវាមានលក្ខណៈរាយប៉ាយដូចពោលខាងលើ ចំពោះផ្នែកអភិរក្សយើងខ្ញុំ ចេកឯកោស្ថិតក្នុងអម្បូររុក្ខជាតិដែលត្រូវអភិរក្ស ដោយហេតុថាប្រជាជនចាប់ផ្តើមរុករកគ្រាប់របស់វាដើម្បីយកទៅដាំ ឬធ្វើថ្នាំ ។ បណ្តាផ្នែកទាំងឡាយរបស់ដើមចេកនេះ សុទ្ធសឹងមានប្រសិទ្ធភាពក្នុងការព្យាបាលជំងឺគ្រោះក្នុងក្រលៀន តម្រងនោម ចុករោយសន្លាក់ បញ្ចុះទឹកនោម បន្ថយកម្កៅ ជួយសម្រួលប្រព័ន្ធរំលាយអាហារ គេងមិនលក់ ទល់លាមក បំប៉នសុខភាព ។ល។ តាមជំងឺនីមួយៗ គេមានរបៀបកែច្នៃជាអាទិ៍ ៖ ចំពោះក្រួសក្នុងតម្រងនោម ចុករោយសន្លាក់ ក្រលៀនខ្សោយ ប្រព័ន្ធរំលាយអាហារមិនប្រក្រតី គេយកផ្លែវាទៅត្រាំជាមួយស្រាអង្ករសុទ្ធ ។ ពិសេសប្រសិនបើប្រើគ្រាប់របស់វាសុទ្ធ ដោយមុននឹងត្រាំស្រាគេហាលឲ្យស្ងួត រួចលីងឲ្យឡើងពងក្រឡាត ត្រាំស្រាក្នុងឪទិនទុកផឹកបន្តិចម្តងៗជារៀងរាល់ថ្ងៃនឹងធ្វើឲ្យប្រសើរឡើងចំពោះជំងឺដូចរៀបរាប់ខាងលើ ។
ចំពោះជនជាតិ Raglai គេចាត់ទុកចេកនេះគឺជាឱសថទិព្វដែលទេវតាប្រទានឲ្យពួកគេ ៕ លីសា
