ភ្នំពេញ ៖ ក្រសួងសុខាភិបាល បានប្រកាសប្រាប់ដល់សាធារណជន អំពីឱសថបំប៉នផ្លូវភេទបុរសឈ្មោះ Male extra ផលិតនៅប្រទេសអង់គ្លេស ដែលគ្មានការចុះបញ្ជិកា និងគ្មានច្បាប់អនុញ្ញាតពីត្រឹមត្រូវពីក្រសួង ខណៈថ្នាំនេះកំពុងតែផ្សព្វផ្សាយយ៉ាងគគ្រឹកគគ្រេងលើបណ្តញសង្គមហ្វេសប៊ុកជារៀងរាល់ថ្ងៃ។
ក្រសួងសុខាភិបាល បានបញ្ជាក់ថា ឱសថបំប៉នផ្លូវភេទបុរសនេះ បានផ្សព្វផ្សាយអួតអាង បំផ្លើសហួសពីការពិត ហើយដើម្បីចៀសវាងការខាតបង់ប្រាក់កាស និងប៉ះពាល់ដល់សុខភាព ឬអាចឈានដល់បាត់បង់អាយុជីវិត ដោយគាំងបេះដូង របស់អ្នកប្រើប្រាស់ទៀតនោះ ក្រសួងសុខាភិបាល តម្រូវឲ្យម្ចាស់គណនីហ្វេសប៊ុក ត្រូវបញ្ឈប់ការនាំចូល ការផ្សព្វផ្សាយ លក់ ឬចែកចាយឱសថខុសច្បាប់នេះជាបន្ទាន់។
ក្រសួងសុខាភិបាល នឹងមានវិធានការតឹងរ៉ឺងទៅតាមផ្លូវច្បាប់ ចំពោះម្ចាស់គណនីនោះ ទៅតាមច្បាប់វិសោធនកម្មច្បាប់ ស្តីពីការគ្រប់គ្រងឱសថជាធរមាន ហើយក្រសួងក៏បានស្នើសុំដល់បងប្អូនប្រជាពលរដ្ឋ បានជួបប្រទះឃើញជនណាកំពុងប្រើប្រាស់ លក់ ចែកចាយ ផលិតផលឱសថបំប៉នសុខភាពផ្លូវភេទបុរសឈ្មោះ Male extra ដោយគ្មានការអនុញ្ញាតពីក្រសួងសុខាភិបាល។ ដោយ៖បញ្ញាស័ក្តិ
