ភ្នំពេញ៖ហាង iOne ដែលជាភ្នាក់ងារលក់ធំបំផុតរបស់ Apple នៅប្រទេសកម្ពុជា បានបើកសម្ពោធជាផ្លូវការ នូវសាខាថ្មីបំផុត ដែលមានទីតាំងនៅជាន់ទី១ នៃផ្សារទំនើបអ៊ីអនម៉លសែនសុខស៊ីធី នៅថ្ងៃទី២ ខែ មិថុនា ឆ្នាំ ២០១៨ នេះដោយមានការចូលរួម យ៉ាងច្រើនកុះករ ពីសំណាក់ភ្ងៀវកិត្តិយស និង បណ្តាអ្នកគាំទ្ររបស់ iOne ។
ជាមួយនឹងការបើកសម្ពោធនូវសាខាថ្មីនេះគី iOne សែនសុខ ជាហាងទី៥ ហើយ របស់ក្រុមហ៊ុន iOne ដែលបានបង្កើតឡើង ដើម្បីផ្តល់ភាពងាយស្រួល ដល់អតិថិជនរបស់ខ្លួន ក្នុងការស្វែងរកទិញ នូវផលិតផលម៉ាក Apple ក៏ដូចជា គ្រឿង Accessories ម៉ាកល្បីៗជាច្រើន ដែលមានការធានាត្រឹមត្រូវ ពីក្រុមហ៊ុន និងអាចជឿទុកចិត្តបាន។
ជាមួយនឹងការបើកសម្ពោធនូវសាខាថ្មីនេះ យើងសង្កេតឃើញថា មានក្រុមអ្នកគាំទ្រ របស់ iOne បានឈរតម្រង់ជួរ រង់ចាំចាប់តាំងពីម៉ោង៣ទៀបភ្លឺថ្ងៃនេះ ដើម្បីរង់ចាំទទួលយកនូវការ ផ្តល់ជូនពិសេសពីហាង iOne ជាមួយនឹងការបញ្ចុះតម្លៃរហូតដល់ទៅ ៥០ភាគរយ សម្រាប់ផលិតផលម៉ាក Apple លើកលែងតែ កុំព្យូរទ័រ MAC និង Premium Accessories ម៉ាកល្បីៗជាច្រើនទៀត។
ក្នុងឱកាសនោះដែរ លោកស្រី សុខ សុភ័ក្ត្រ អគ្គនាយិកាក្រុមហ៊ុន iOne បានថ្លែងដោយសង្ឃឹមជឿជាក់ថា ភ្ញៀវកិត្តិយសទាំងអស់ នឹងបន្តគាំទ្ររបស់ហាងយើងខ្ញុំតទៅមុខទៀត ។ លោកស្រីបញ្ជាក់ថា ប្រសិនបើគ្មានការគាំទ្រពីភ្ញៀវទាំងអស់នោះ ក៏គ្មានវត្តមានរបស់ក្រុមហ៊ុន iOne នៅក្នុងផ្សារទំនើបអ៊ីអនម៉លនាថ្ងៃនេះទេ ហើយក្រុមហ៊ុន iOneនឹងនាំចូលនូវផលិតផលថ្មីៗសម្រាប់បំពេញតាមតម្រូវការរបស់អតិថិជន ៕ ដោយ៖បញ្ញាស័ក្តិ
