ភ្នំពេញ៖ នារីម្នាក់ត្រូវក្រុមចោរបាញ់បណ្តាលអោយរងរបួសធ្ងន់ ហើយប្លន់យកម៉ូតូមួយគ្រឿងម៉ាកហុងដារស្កុបពី បានម្រេច ចំណែកនារីរងគ្រោះដឹកទៅសង្គ្រោះនៅមន្ទីរពេទ្យកាល់មែត ហេតុការណ៍ភ្ញាក់ផ្អើលនេះនៅវេលាម៉ោង២០និង៥០នាទី នៅក្រោយសាលាបឋមសិក្សាបាក់ទូក មុខហាងខ្មៅសាងស្នេហ៍ ផ្លូវ១៤៩ ស្ថិតក្នុងសង្កាត់វាលវង់ ខណ្ឌ៧មករា រាជធានីភ្នំពេញ ។ ជនរងគ្រោះ ឈ្មោះ ស្រីពេជ្រ អាយុ២៤ឆ្នាំ ស្នាក់នៅម្តុំវត្តសន្សំកុសល ខណ្ឌមានជ័យ ដោយឡែកម៉ូតូដែលចោរយកទៅបាត់ម៉ាក ស្កុបពីពណ៌ស ស្លាកលេខ 1GP-0078 ជាម៉ូតូរបស់មនុស្សប្រុសម្នាក់ដោយនារីរងគ្រោះខ្ចីជិះ។
តាមប្រភពពីកន្លែងកើតហេតុ បានឲដឹងថា មុនដំបូងគេឃើញនារីរងគ្រោះមានគ្នា២នាក់ជិះម៉ូតូម៉ាកខាងលើ មកឈប់និយាយជាមួយមិត្តម្នាក់ទៀតនៅកន្លែងក្បែរកន្លែងកើតហេតុ លុះមួយសន្ទុះធំក្រោយមកក៏ជិះចេញទៅវិញ បានបន្តិច ស្រាប់លេចមុខជនសង្ស័យមិនស្គាល់អត្តសញ្ញាណម្នាក់ដើរសំដៅ មករួចដកកាំភ្លើងបាញ់ទៅលើនារីរងគ្រោះដែលជាអ្នកបើកម៉ូតូត្រូវចំថ្គាមបណ្តាលអោយរងរបួសធ្ងន់ រួចបានយកម៉ូតូម៉ាក ស្កុបពីពណ៌ស ស្លាកលេខ 1GP-0078 ជិះចេញទៅ។
ក្រោយកើតហេតុមានមិត្តភក្តិនារីរងគ្រោះដឹកទៅក្លីនិកឯកជន តែដោយធ្ងន់ធ្ងរបានដឹកទៅសង្គ្រោះនៅកាល់មែតបន្ត។ បច្ចុប្បន្នសមត្ថកិច្ចមូលដ្ឋាន និងសមត្ថកិច្ចជំនាញកំពុងចុះស្រាវជ្រាវនៅកន្លែងកើតហេតុរកឃើញសំបកគ្រាប់ម៉ាក K59 ១គ្រាប់ និងពិនិត្យមើលជុំវិញទីតាំងក្រែងមានកាមេរ៉ាថតបានសកម្មភាពនិងភិនភាគជនសង្ស័យ៕ ដោយ៖កូឡាប
