កំពង់ឆ្នាំង ៖ ស្ត្រីម្នាក់ត្រូវបានកម្លាំងសមត្ថកិច្ចចាប់ខ្លួនក្រោយពីស្ត្រីជាជនសង្ស័យរូបនេះយកកាំបិតចុងស្រួច (កាំបិតចិតបន្លែ)ចាក់ទៅលើប្តីរបស់ខ្លួនបណ្តាលអោយរបួសធ្ងន់។ ស្ត្រីដៃឆៅដែលត្រូវសមត្ថកិច្ចចាប់ខ្លួននេះឈ្មោះសុខ ធីតា អាយុ២៥ឆ្នាំ រីឯបុរសជាប្តីរងគ្រោះឈ្មោះអៀង ណាវីន អាយុ២៧ឆ្នាំ ស្នាក់នៅផ្ទះជួលក្នុងភូមិកណ្តាល សង្កាត់កំពង់ឆ្នាំង ក្រុងកំពង់ឆ្នាំង។
សមត្ថកិច្ចបានអោយដឹងថា កាលពីវេលាម៉ោង៧និង៣០នាទីយប់ បុរសជាប្តីស្រវឹងស្រាហើយបានរករឿងប្រពន្ធរឿងទិញម្ហូបច្រើន ហើយបានបង្ករទៅជាជម្លោះស្រែកតឹងសសៃកដាក់គ្នានិងឈានទៅដល់ការប្រតាយប្រតប់គ្នាទៀតផង។
ហេតុការណ៍នោះស្ត្រីជាប្រពន្ធស្រវាបានកាំបិតចិតបន្លែចាក់ទៅលើបុរសជាប្តីត្រូវចំពោះផ្នែកខាងឆ្វេងបណ្តាលអោយរងរបួសតែម្តង។ ក្រោយពេលកើតហេតុស្ត្រីសង្ស័យជាប្រពន្ធត្រូវបានសមត្ថកិច្ចចាប់ខ្លួននិងចាត់ការទៅតាមនិតិវីធី ៕ ដោយ៖ ចៅ សន