តាកែវ៖ លោកគ្រូអ្នកគ្រូជាអ្នកផលិតធនធានមនុស្សដល់សំខាន់ក្នុងការបង្រៀនដល់សិស្សានុសិស្ស ដូច្នេះលោកគ្រូអ្នកគ្រូត្រូវតែមានឆន្ទៈហ៊ានលះបង់កំលាំងកាយចិត្តបង្រៀនដល់សិស្សអោយពួកគេទាំងនោះបានក្លាយខ្លួនទៅជាកូនល្អ សិស្សល្អ និងមិត្តល្អ និងត្រូវជៀសឆ្ងាយពីការដើរទៅរកផ្លូវខុស និងគេចផុតពីការសេពគ្រឿងញៀន ។ ថ្លែងបែបនេះគឺក្នុងពេលដែលលោក អ៊ូច ភា អភិបាលរងខេត្តតាកែវបានចូលរួមនៅក្នុងពិធីប្រជុំបូកសរុបចលនាប្រឡងប្រណាំង ៣ល្អ របស់កុមារ យុវជន កូនល្អ សិស្សល្អ មិត្តល្អ ក្នុងឆ្នាំសិក្សា ២០១៦_២០១៧ នាព្រឹកថ្ងៃទី ១៥ វិច្ឆិកា ២០១៧ នៅក្នុងសាលសហសិក្សាមជ្ឈមណ្ឌលគរុកោសល្យភូមិភាគតាកែវ ដែលមានលោកគ្រូអ្នកគ្រូ និងសិស្សានុសិស្ស ចូលរួមយ៉ាងច្រើន ។
ជាមួយគ្នានោះដែរលោកអ៊ូច ភា ក៏បានសំណូមពរដល់ក្មួយៗដែលឋិតក្នុងវ័យជាសិស្សានុសិស្សទាំងអស់ គប្បីតែត្រូវប្រឹងប្រែងរៀនសូត្រ អោយបានពូកែ ដើម្បីជួយខ្លួនឯង ជួយគ្រួសាររបស់ខ្លួន និងជួយដល់សង្គមជាតិ ទៅថ្ងៃខាងមុខ ។ បច្ចុប្បន្នសង្គមជាតិរបស់យើងបាននិងកំពុងត្រូវការធនធានមនុស្សដែលមានសមត្ថភាព និងជំនាញពិតប្រាកដមកធ្វើការងារ និងក្លាយជាអ្នកដឹកនាំដល់ល្អ ដែលជួយដល់សង្គមរបស់យើង ។ លោកបានបន្តថា បើធនធានមនុស្សរបស់យើងល្អ មានសមត្ថភាព ច្បាស់ណាស់ប្រទេសជាតិរបស់យើងពិតជាមានការរីកចម្រើននិងមានការអភិវឌ្ឍន៏យ៉ាងឆាប់រហស័ដូចនៅតាមបណ្តាប្រទេសផ្សេងៗដែលមានការអភិវឌ្ឍន៏លឿន ដែលយើងសឹងតែនឹកស្មានមិនដល់ គឺដោយសារតែប្រទេសរបស់គេ សំបូរទៅដោយធនធានមនុស្សដែលមានសមត្ថភាព ។
ឆ្លៀតក្នុងឳកាសនោះដែរលោកស៊ីវ សុខន ប្រធានមន្ទីរអប់រំយុវជននិងកីឡាខេត្ត ក៏បានជំរុញអោយលោកគ្រូអ្នកគ្រូបន្តបំផុសនៅសកម្មភាពចលនាប្រឡងប្រណាំង៣ល្អរបស់កុមារ យុវជន នៅក្នុងសាលាអោយពួកគាត់បានក្លាយខ្លួនឃាកូនល្អ សិស្សិល្អ មិត្តល្អ កាន់តែមានការកើនឡើង។
យុវជន ធឹម ចន្នី រៀននៅសាលាវិទ្យាល័យជាស៊ីមតាកែវ បាននិយាយថា ការចូលរួមនៅក្នុងចលនាប្រឡងប្រណាំង៣ល្អ កុមារ យុវជននេះ វាពិតបានជួយអោយខ្ញុំយល់ដឹងច្រើនពីអ្វីដែលជាគុណធ៍ម សីលធម៍ និងការចេះជួយគ្នាទៅវិញទៅមក រវាងមិត្តនិងមិត្ត មិនថែមទាំងប៉ុណ្ណោះ វាបានជំរុញអោយខ្លួនគេផ្ទល់ ខិតខំរៀនសូត្របានពូកែថែមទៀត និងជៀសឆ្ងាយពីគ្រឿងញៀន ដូច្នេះសូមមិត្តសិស្សានុសិស្សទាំងអសើគ្នាចូលរួមក្នុងសកម្មភាពនេះទាំងអស់គ្នាដើម្បីខ្លួន និងគ្រួសារ៕ តាកែវ
