នេះជាខណៈពេលដ៏រន្ធត់ណាស់ ដែលរថយន្តភីបអាប់១គ្រឿង បានរអិលរ៉េចេញពីផ្លូវ ទៅបុករថយន្តប៉ូលីស មុនពេលទៅបុកដើមឈើ លាន់សូរដូចរន្ទះ បណ្តាលឲ្យមនុស្ស២នាក់ ត្រូវខ្ទាចចេញពីក្នុងរថយន្តយ៉ាងសាហាវ។
ហេតុការណ៍នេះបានកើតឡើង កាលពីវេលាម៉ោង ៨ និង ៥៨ នាទី ព្រឹកថ្ងៃទី០៥ ខែមេសា ឆ្នាំ២០២៣ ស្ថិតនៅត្រង់ចំណុចប៉ុស្តិ៍ប៉ូលីស Wang Takhian តាមបណ្តោយផ្លូវ Suwannason ខ្សែលេខ 33 Kabinburi-Sa Kaew ឆ្ពោះទៅកាន់ ស្រុក Kabinburi ខេត្ត Prachinburi។
តាមរយៈវីដេអូ CCTV បានបង្ហាញរថយន្តភីបអាប់ពណ៌ប្រផេះ ពាក់ស្លាកលេខ 9273 Bangkok បានបើកបោះពួយយ៉ាងលឿន លុះមកដល់ចំណុចផ្លូវបំបែកភ្លើងស្តុបក្រហម ក៏ស្រាប់តែរថយន្តប្រហែលជារអិល បានរ៉េទទឹងចេញពីផ្លូវ ទៅបុករថយន្តប៉ូលីសកំពុងចតខាងមុខប៉ុស្តិ៍ និងបន្តទៅបុកដើមឈើ ខ្ទាតមនុស្សចេញពីខាងក្នុងរថយន្តដ៏រន្ធត់តែម្តង។
ប៉ូលិស Wang Takhian បានឲ្យដឹងថា អ្នករួមដំណើរ២នាក់ (បុរសម្នាក់ និងក្មេងប្រុសម្នាក់) ដែលខ្ទាតចេញ បានរងរបួសធ្ងន់-ស្រាល ខណៈអ្នកបើកបរពុំរងរបួសនោះទេ។ នៅពេលសាកសួរ ពួកគេបាននិយាយថា ពួកគេទើបតែបើកឡានចេញពីផ្ទះទៅទិញខ្សែភ្លើង។
សូមបញ្ជាក់ថា មុនពេលកើតហេតុ នៅក្នុងតំបន់ទីក្រុង Kabinburi មានខ្យល់បោកបក់ និងភ្លៀងធ្លាក់ខ្លាំង ដែលបង្កឲ្យមានគ្រោះថ្នាក់ជាច្រើន៕ រក្សាសិទ្ធិដោយ៖ លឹម ហុង
