ភ្នំពេញ៖ស្ថានទូតសហរដ្ឋអាមេរិក បានបញ្ជាក់ពីការសម្រេចចិត្តបន្តជំនួយសម្រាប់គាំទ្រកម្លាំងប្រតិបតិ្តការស៊ីម៉ាក់បន្តចំនួន២ខែទៀតគឺខែមករា និងខែកុម្ភៈឆ្នាំ២០១៨។
លោកហេង រងនា អគ្គនាយកស៊ីម៉ាក់ បានថ្លែងក្នុងហ្វេសប៊ុកផ្លូវការនៅថ្ងៃព្រហស្បតិ៍នេះថា ល្ងាចថៃ្ងទី១៥ ខែវិច្ឆិកា ឆ្នាំ២០១៧នេះ ខ្ញុំបាទទទួលលិខិតពីស្ថានទូតសហរដ្ឋអាមេរិកប្រចាំនៅភ្នំពេញ បានបញ្ជាក់ពីការសម្រេចចិត្តបន្តជំនួយសម្រាប់គាំទ្រកម្លាំងប្រតិបតិ្តការសុីម៉ាក់បន្តចំនួន២ខែទៀតគឺខែមករា និងខែកុម្ភៈ ឆ្នាំ២០១៨ ប្រយោជន៍លើកចិត្តឱ្យ អង្គភាពស៊ីម៉ាក់រៀបចំខ្លួនបន្តចូលរួមដេញថ្លៃសម្រាប់បន្តគម្រោង ឆ្នាំ២០១៨។ ដោយសារករណីនេះត្រូវបានសម្តេចតេជោប្រមុខរាជរដ្ឋាភិបាលបានប្រកាសគាំទ្ររក្សាកម្លាំងស៊ីម៉ាក់ប្រតិបតិ្តការឱ្យដំណើរធម្មតាករណីគ្មានជំនួយអាមេរិកនោះ ខ្ញុំបានគោរពស្នើសុំមតិណែនាំដ៏ខ្ពស់ខ្ពង់ពីសម្តេចតេជោ។
លោកអគ្គនាយក បានបញ្ជាក់ថា “ខ្ញុំសង្ឃឹមថាជាមួយការបន្តផ្តល់ជំនួយរបស់អាមេរិកនេះ អាចបន្ថយការលំបាករបស់រាជរដ្ឋាភិបាល និងបានបង្ហាញនូវការបន្តរួមគ្នាដោះស្រាយវិបត្តិសំណល់ជាតិផ្ទុះពីសង្គ្រាម។ ខ្ញុំយល់ថា រដ្ឋាភិបាលអាមេរិកនិងរាជរដ្ឋាភិបាល នៅតែជាដៃគូយ៉ាងសំខាន់ក្នុងការដោះស្រាយវិបតិ្តនេះ។ សូមអរគុណចំពោះការបន្តជួយគាំទ្រនេះ ហើយកម្លាំងស៊ីម៉ាក់បន្តខិតខំលុបបំបាត់នូវមរតកដ៏អាក្រក់មួយនេះចេញពីទឹកដីនិងប្រជាជនកម្ពុជា”៕ ដោយ៖កូឡាប
